Author: Ramazan Abal

1

Bədən Tərbiyəsi və İdman Günü münasibətilə keçirilən Balakən məktəblilərinin Spartakiadasının açılışı olub

Olimpiya İdman Kompleksində keçirilən tədbirdə Balakən Rayon İcra Hakimiyyətinin başçısı Natiq Ağayev, hüquq-mühafizə orqanlarının rəhbərləri, YAP rayon təşkilatının rəhbərliyi, icra aparatının əməkdaşları, dövlət orqanlarının yerli idarə və xidmət sahələrinin rəhbərləri, idmançılar və rayon ictimaiyyəti iştirak ediblər.

Əvvəlcə Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad edilib. Daha sonra Balakən Atçılıq və Velosiped İdmanı Klubunun üzvlərinin nümunəvi keçidi baş tutub.

Balakən rayonu üzrə gənclər və idman sektorunun müdiri vəzifəsini müvəqqəti icra edən Sarxan Hacıyev çıxış edərək dövlətin idmana olan qayğısı, bədən tərbiyəsinin inkişafı və gənclərin idmana cəlb olunması istiqamətində görülən tədbirlərdən danışıb, idmançılara gələcək yarışlarda uğurlar arzulayıb.

Balakən Rayon İcra Hakimiyyətinin başçısı Natiq Ağayev idmançıları və idmansevərləri 5 mart – Bədən Tərbiyəsi və İdman Günü münasibətilə təbrik edərək bildirib ki, Azərbaycanın idman sahəsində qazandığı uğurlar ölkəmizin beynəlxalq arenada nüfuzunun göstəricisidir. Dünya miqyasında idman ölkəsi kimi tanınan Azərbaycanın qazandığı yüksək nəticələrin təməli Ulu Öndər Heydər Əliyev tərəfindən qoyulub və bu gün də Prezident, Milli Olimpiya Komitəsinin Prezidenti İlham Əliyev tərəfindən uğurla davam etdirilir.

Sonra Spartakiadanın proqramına daxil olan sərbəst güləş, mini futbol, atletika və voleybol yarışlarına start verilib.

                                                                               Yeni Balakən

0

Balakənin İncisi – R.Səmədov adına şəhər 2 nömrəli körpələr evi–uşaq bağçası

Balakənin mədəni həyatında özünəməxsus yeri olan R.Səmədov adına şəhər 2 nömrəli körpələr evi–uşaq bağçası illərdir ki, rayonumuzun ən böyük və nümunəvi məktəbəqədər müəssisəsi kimi fəaliyyət göstərir. 1984-cü ildən qapılarını balaca fidanlara açan bu bağça, I Qarabağ müharibəsinin qəhrəman şəhid müəllimi Rafiq Səmədovun adını daşımaqla həm tarixi yaddaşımızı yaşadır, həm də gələcək nəsillərə vətənpərvərlik ruhunu aşılayır.

2014-cü ildən etibarən bağçaya YAP Balakən rayon Təşkilatı Qadınlar Şurasının sədri Züleyxa Cavad qızı Dibirova rəhbərlik edir. Onun gərgin zəhməti, incə düşüncəsi və böyük hədəflərə ağılla yönələn idarəçilik bacarığı sayəsində müəssisə inkişaf edir.Dövlətin dəstəyi,Elm və Təhsil Nazirliyinin xətti ilə bağça 2025-ci ildə əsaslı təmir olunmuş, uşaqların hərtərəfli inkişafı üçün müasir şərait yaradılmışdır.Rayon Təhsil Sektorunun müdiri Mehparə Mirzəyevanın diqqət və qayğısı,müəssisənin problemləri ilə yaxından maraqlanması ümumi işin keyfiyyətinə müsbət təsir edir.

Bağçanın fəaliyyət istiqamətləri genişdir:

•             uşaqların əqli, fiziki və yaradıcı potensialının inkişafı,

•             sosial–emosional bacarıqlarının möhkəmləndirilməsi,

•             estetik tərbiyə və əmək vərdişlərinin formalaşdırılması,

•             sağlam həyat tərzinə həssas münasibətin aşılanması,

•             milli-mənəvi dəyərlərə, ana dilimizə və dövlətçiliyimizə bağlılığın gücləndirilməsi.

Burada hər bir uşaq yalnız biliklə deyil, həm də sevgi ilə böyüyür. Müəssisənin pedaqoji kollektivi balacaların istedadını üzə çıxarmağa, onları cəmiyyət üçün sağlam və faydalı fərdlər kimi yetişdirməyə çalışır.

8 Mart – Analara Həsr Olunan Bayram

Bu gün bağçada “8 Mart Beynəlxalq Qadınlar Günü” münasibətilə möhtəşəm tədbir keçirildi. Tədbirin iştirakçıları bağçanın kollektivi, balaca fidanlar və onların anaları idi.

Balacalar analarına bayram konserti təqdim etdilər:

•             hər biri analarına təbii çiçək hədiyyə etdi,

•             şeirlər söylədilər, mahnılar oxudular,

•             rəqslər ifa etdilər, oyunlar oynadılar.

Bu anlarda anaların sevinc dolu baxışları, qürurla parlayan göz yaşları salonda xüsusi bir ab-hava yaratdı. Çünki övladın valideynə bəxş etdiyi duyğu, yaşatdığı hisslər bənzərsizdir.

Tədbirin gözəl və uğurla keçirilməsində bağçanın müəllim və tərbiyəçilərinin zəhməti danılmazdır. Onların fədakar işi, uşaqlara göstərdikləri qayğı və sevgi, rəhbər Züleyxa xanımın uzaqgörən idarəçiliyi ilə birləşərək bu günün bayram ovqatını daha da möhtəşəm etdi.

R.Səmədov adına şəhər 2 nömrəli körpələr evi–uşaq bağçası Balakənin təkcə ən böyük məktəbəqədər müəssisəsi deyil, həm də gələcəyimizin təməlini qoyan bir mədəniyyət ocağıdır. Burada böyüyən hər bir uşaq milli dəyərlərə bağlı, sağlam düşüncəli və yaradıcı bir fərd kimi formalaşır. Bu isə həm rayonumuz, həm də bütövlükdə ölkəmiz üçün böyük qürur mənbəyidir.

                                                                                              Ramazan Abal

0

Qadınlar tarixən ölkənin ictimai-siyasi həyatında mühüm rol oynayıb

Azərbaycanda qadınlar yalnız 8 Mart – Beynəlxalq Qadınlar Günü ərəfəsində diqqət və qayğı ilə əhatə olunmur, onlara yalnız ildə bir dəfə diqqət göstərilmir. Zərif cinsin nümayəndələri hər zaman bu diqqəti, qayğını öz üzərlərində hiss edir, onu yaşayırlar. Əslində, bu da qəribə yaxud təsadüfi deyil. Çünki qadınlar tarixən ölkənin ictimai-siyasi həyatında mühüm rol oynayıb, öz potensialları, bacarıqları ilə dövlət idarəetmə sistemində kişilərlə çiyin-çiyinə çalışıblar. Tomrisdən tutmuş Möminə Xatun, Sara Xatun, Nüşabə, Nigar, Həcər kimi dövlət idarəetmə sistemində ad-san qazanmış, həm də döyüş meydanında qəhrəmanlıq göstərmiş qadınlarımız olub ki, bu gün onların zamanında ortaya qoyduqları fəaliyyətlərlə fəxr edirik.

Azərbaycan qadını həm də maarifçilik hərəkatında mühüm rol oynayıb, bu prosesə öz töhfəsini verib. Bu tendensiya xüsusilə XIX əsrin sonu – XX əsrin əvvəllərində özünü daha qabarıq şəkildə göstərib. Həmin dövrdə ölkədə genişlənmiş maarifçilik hərəkatı qadınların təhsilə cəlb olunmasını sürətləndirdi. Bu prosesdə Hacı Zeynalabdin Tağıyev kimi xeyriyyəçilərin təşəbbüsü ilə Bakıda qızlar üçün məktəblərin açılması mühüm rol oynadı. Bu addım qadınların savadlanmasına və gələcəkdə cəmiyyətin müxtəlif sahələrində fəal iştirakına zəmin yaratdı.

Təkcə uzaq tarixdə deyil, elə keçən əsrdə də Azərbaycan tarixində qadınlar ictimai fəallıqları ilə seçiliblər. Şərqdə ilk dəfə seçib-seçilmək hüququnun məhz XX əsrin əvvəllərində Azərbaycanda verilməsi də bu məsələdə xüsusi rol oynayırdı. Belə ki, 1918-ci ildə qurulmuş Azərbaycan Xalq Cümhuriyyəti Şərqdə qadınlara seçki hüququ verən ilk dövlətlərdən biri olmuşdur.

Azərbaycan qadını tarixən ailənin dayağı, milli-mənəvi dəyərlərin qoruyucusu, eyni zamanda cəmiyyətin formalaşmasında mühüm rol oynayan şəxsiyyət kimi səciyyələndirilib. Bütün bu xüsusiyyətləri Azərbaycan qadını tarixin bütün dövrlərində şərəflə, qüsursuz şəkildə həyata keçirib.

Qadınların cəmiyyətdə iştirakçılıq göstəricisinin, onların ictimai-siyasi həyatda rolunun artması müstəqillik illərində daha açıq şəkildə müşahidə edilməyə başlandı. Azərbaycan qadınlarına yaradılan şərait nəticəsində onlar dövlət quruculuğu, elm, mədəniyyət, biznes və beynəlxalq münasibətlər sahəsində fəal iştirak etməyə başladılar. Məhz qadınlar üçün yaradılmış şəraitin nəticəsidir ki, bu gün qadınlar parlamentdə, dövlət strukturlarında, qeyri-hökumət təşkilatlarında və özəl sektorda geniş şəkildə təmsil olunurlar.

Bütün müşahidə edilən bu müsbət tendensiya, heç şübhəsiz ki, Ümummilli Lider Heydər Əliyevin ölkədə qadınlara yönəlik həyata keçirdiyi siyasətdən irəli gəlirdi. Heydər Əliyev ölkə həyatının bütün sahələrində qadınlara xüsusi yer ayırır, onların hərtərəfli fəaliyyətinə geniş meydan verirdi. Beləliklə, həyata keçirilən uğurlu siyasət nəticəsində Azərbaycan cəmiyyətində lider qadınlar yetişirdi.

Ölkəmizdə dövlət səviyyəsində qadın siyasətinin əsasını qoyan Ümummilli Lider Heydər Əliyev qadın şəxsiyyətinə böyük hörmətlə yanaşaraq deyirdi:

“Azərbaycan qadını tarix boyu öz ağlı, zəkası, namusu, qeyrəti, isməti ilə, fədakarlığı, çalışqanlığı, mərdliyi, vətənpərvərliyi ilə, millətinə, torpağına olan hədsiz məhəbbəti ilə və gözəlliyi, Azərbaycan xalqının xüsusiyyətləri ilə tanınmışdır. Ancaq bununla bərabər, əsrlər boyu Azərbaycan qadınının üzərinə böyük zəhmətlər düşmüşdür. O zəhməti də qadın həmişə mərdliklə, cəsarətlə çəkmişdir və heç vaxt bu zəhmətdən inciməmişdir”.

Ulu Öndər qadınlarla bağlı məsələlərə böyük diqqət yetirirdi. O, qadınların problemlərini dövlət səviyyəsində həll etmək məqsədilə 1998-ci ildə “Qadın Problemləri üzrə Dövlət Komitəsi”ni yaratdı, Azərbaycan Respublikasının Qadın Problemləri üzrə Milli Fəaliyyət Planı tərtib edildi. Azərbaycan Qadınlarının Birinci Qurultayı da məhz Ulu Öndərin hakimiyyəti dövrünə təsadüf etdi və 1998-ci ildə Heydər Əliyevin iştirakı ilə keçirildi. Bu, dövlət qadın siyasətinin tarixində mühüm hadisə idi.

Günümüzdə dövlət qadın siyasəti Prezident İlham Əliyev tərəfindən uğurla davam etdirilir. Bu siyasət yeni dünya düzənində yaranmış yeni reallıqlara, meyarlara uyğunlaşdırılaraq həyata keçirilməkdədir. Belə ki, müasir dövrün tələblərinə uyğun olaraq Azərbaycan gender siyasətinin reallaşdırılması məsələsində həm qabaqcıl ölkələrdən birinə çevrilib, həm də bu istiqamətdə mühüm yeniliklərə imza atıb.
Azərbaycan Respublikasının Konstitusiyasında da kişi ilə qadının eyni hüquq və azadlıqları təsbit olunur. Bütün bu proseslər də öz növbəsində ictimai-siyasi həyatın bütün sahələrində gender siyasətinin güclənməsinə gətirib çıxarır.

Qadın hüquqlarının müdafiəsi, onlar üçün yaradılan bütün imkanların genişləndirilməsi Prezident İlham Əliyevin dövlət siyasətində müəyyən etdiyi prioritet istiqamətlərdəndir. 2006-cı ildə qadınlarla bağlı işlərin daha mütəşəkkil və ardıcıl şəkildə aparılması, ictimai həyatın bütün sahələrində bərabər hüquqların təmin olunması sahəsində hüquqi bazanın təkmilləşdirilməsi üçün “Gender (kişi və qadınların) bərabərliyinin təminatları haqqında”, 2010-cu ildə isə “Məişət zorakılığının qarşısının alınması haqqında” Azərbaycan Respublikasının qanunları qəbul olunub.

“Azərbaycan Respublikasında gender (kişi və qadınların) bərabərliyi üzrə 2026–2028-ci illər üçün Milli Fəaliyyət Planı”nda da qadınların ictimai fəallığının artırılması, təhsil, məşğulluq, iqlim dəyişiklikləri ilə mübarizə və media sahələrində gender aspektlərinin nəzərə alınması, bu məqsədlə normativ-hüquqi bazanın, institusional mexanizmlərin təkmilləşdirilməsi və gender bərabərliyi mədəniyyətinin təbliğinin gücləndirilməsi istiqamətində tədbirlərin həyata keçirilməsi nəzərdə tutulur. Qadınlarla bağlı məsələlərin həlli üçün bir çox qanunların qəbul olunması, fərman və sərəncamların imzalanması, beynəlxalq təşkilatlara üzv olaraq mühüm sənədlərin ölkəmizdə tətbiq olunması qadın hüquqlarının reallaşması və təminatı istiqamətində inkişafın əldə olunmasına təkan verib.

Günümüzdə ölkənin ictimai-siyasi həyatında mühüm rol oynayan, ölkə rəhbəri ilə çiyin-çiyinə çalışaraq Azərbaycanı beynəlxalq aləmdə yüksək səviyyədə təmsil edən simalardan biri də ölkənin Birinci vitse-prezidenti Mehriban Əliyevadır. Uzun illər ərzində Mehriban xanım Əliyevanın göstərdiyi çoxşaxəli fəaliyyət qadınların cəmiyyətin müxtəlif sahələrində daha fəal iştirakına töhfə verib.

Hələ Heydər Əliyev Fondunun prezidenti olarkən Mehriban xanım sosial və humanitar layihələrə rəhbərlik edərək təhsil, səhiyyə, mədəniyyət və sosial müdafiə sahələrində genişmiqyaslı proqramların həyata keçirilməsi ilə qeyd edilən istiqamətlərdə mühüm nailiyyətlərə imza atıb. Paralel olaraq, Mehriban xanım Heydər Əliyev Fondunun prezidenti kimi xeyirxah missiyası ilə minlərlə insanın taleyini müsbət mənada dəyişib, onlarda yaşamaq eşqi yaradıb, ölümlə mübarizə aparan ayrı-ayrı insanlara əl tutaraq onların həyatda qalmasına vəsilə olub.

Mehriban Əliyeva da hər zaman çıxışlarında gender bərabərliyi, qadın hüquqlarının qorunması və ailə dəyərlərinin möhkəmləndirilməsinə xüsusi diqqət ayırıb. O, qadınların yalnız ailə institutunda deyil, eyni zamanda dövlət idarəçiliyi, elm, mədəniyyət və biznes sahələrində də fəal rol oynamasının vacibliyini vurğulayır.

Mehriban Əliyeva Azərbaycanı beynəlxalq humanitar platformalarda da layiqincə təmsil edir, ölkəmiz adına uğurlar qazandırır. O, mədəniyyətlərarası dialoq, multikulturalizm və humanitar əməkdaşlıq sahəsində təşəbbüslərlə çıxış edir. Bu fəaliyyət qadın liderliyinin qlobal miqyasda təşviqinə və Azərbaycanın beynəlxalq imicinin möhkəmlənməsinə xidmət edir.

Bu gün Mehriban xanım Əliyeva ictimai fəaliyyəti ilə yanaşı, siyasi fəaliyyəti ilə də diqqət çəkir. Ölkənin Birinci vitse-prezidenti kimi Mehriban xanım Əliyeva ölkə başçısı ilə eyni addımlayır, Azərbaycan naminə, dövlətimiz üçün təkcə daxili deyil, eləcə də beynəlxalq prizmada çiyin-çiyinə mübarizə aparır. Elə ən son Münhen Təhlükəsizlik Konfransı çərçivəsində təxribatçı ünsürlərin verdiyi suala Mehriban xanım Əliyevanın qarşısındakını nokaut vəziyyətinə salan cavabı zərif cinsin “yumşaq güc” nümayişinin göstəricisidir.

Nəsib Məhəməliyev,
Milli Məclisin deputatı

0

İnternat tipli gimnaziyada tanışlıq: problemlər və həll yolları gündəmdə

Balakən rayon rəhbəri Natiq Ağayev hüquq mühafizə orqanlarının rəhbərləri və təhsil sektorunun əməkdaşları ilə birgə İnteqrasiya Təlimli İnternat tipli Gimnaziyada olub. Tanışlıq xarakterli səfərdə gimnaziyanın ümumi vəziyyəti ilə yaxından maraqlanılıb, sinif otaqları, yataqxana, dərs prosesi və şagirdlərin istirahət şəraiti yerindəcə izlənilib.

Gimnaziya rəhbərliyi tərəfindən bir sıra çatışmazlıqlar səsləndirilib, təmirə ehtiyacı olan sahələr göstərilib. Ümumilikdə məktəbin əsaslı təmirə ehtiyacı olduğu vurğulanıb. Natiq müəllim məsələ ilə bağlı Təhsil Nazirliyi ilə əlaqə saxlayacağını, əgər proses uzanarsa, rayonda xeyirxah işlər görmək istəyən iş adamlarını bu işə cəlb edəcəyini bildirib. Bu, həm dövlət, həm də ictimai dəstəyin birgə gücünü göstərən mühüm mesaj idi.

Təhsil və gigiyena: uşaqların gündəlik həyatına təsir edən problemlər

Səfər zamanı mətbəx və anbarlarda da şəraitə baxış keçirilib. Yeməklərin hazırlanması, günün menyusu, ərzaqların saxlanılması diqqətlə izlənib. Təəssüf ki, hər şey ideal deyildi. Gigiyenik vəziyyətin zəifliyi, sanitar qovşaqlarda bərk sabun və dəsmalın olmaması, su kranlarının işləməməsi, kağız dəsmalların gec və az verilməsi kimi problemlər açıq şəkildə görünürdü. Ən əsası, qaydalara görə maye sabun istifadəsi zəruri olsa da, həftələrlə təmin olunmadığı müşahidə edildi. Bu çatışmazlıqlar uşaqların gündəlik həyatına birbaşa təsir göstərir, onların sağlamlığını və psixoloji rahatlığını risk altına qoyur.

Rəhbərliyin mövqeyi və dərhal verilən tapşırıqlar

Rayon rəhbəri dərhal təhsil sektorunun məsul şəxslərinə tapşırıq verərək, problemlərin aradan qaldırılması üçün tədbirlərin görülməsini tələb etdi. O, çətinliklər yarandığı halda icra hakimiyyətinə məlumat verilməsini və şəxsən Nazirliklə danışacağını da qeyd etdi. Bu, məsuliyyətin yalnız bir qurumun üzərinə düşmədiyini, həm yerli, həm də mərkəzi səviyyədə koordinasiyanın vacibliyini göstərirdi.

İctimai dəstək nümunəsi

Maraqlı məqam isə rayon polis şöbəsinin rəisi Çingiz Aslanovun mövqeyi oldu. O, gigiyenik vəziyyətin acınacaqlı olduğunu görərək biganə qalmadı və öz hesabına məktəbə 50 litr maye sabun (təxminən bir aylıq tələbat) hədiyyə etdi. Bu addım həm şagirdlərin sağlamlığına, həm də ümumi şəraitin yaxşılaşdırılmasına mühüm töhfə verdi. Belə nümunələr göstərir ki, təhsil müəssisələrinin problemlərinin həllində yalnız dövlət qurumları deyil, ictimaiyyətin də rolu böyükdür.

Nəticə: uşaqların gələcəyi üçün birgə məsuliyyət

İnternat tipli gimnaziyada səsləndirilən problemlər təkcə bir məktəbin deyil, bütövlükdə ölkə təhsil sisteminin qarşısında duran çətinliklərin göstəricisidir. Regionlarda təhsil müəssisələrinin vəziyyəti, onların maddi-texniki bazası, gigiyenik şəraiti birbaşa uşaqların gələcəyinə təsir edir. Bu səbəbdən hər bir qurum, hər bir vətəndaş öz imkanları daxilində bu sahəyə dəstək verməli, uşaqların sağlam və rahat mühitdə təhsil almasına töhfə verməlidir. Bu səfər bir daha göstərdi ki, təhsil müəssisələrinin problemlərinin həlli yalnız dövlətin deyil, bütün cəmiyyətin üzərinə düşən bir vəzifədir. Uşaqların sağlam, rahat və ümidli gələcəyi üçün hər birimizin kiçik də olsa töhfəsi böyük dəyişiklik yarada bilər.

                                                                                                   Ramazan Abal

0

Faciə qurbanlarına olan ümumxalq ehtiramının zirvəsi

“Xocalı şəhərində, Xocalı Soyqırımı Memorial Kompleksinin açılışı, Prezidentin və birinci xanımın iştirakı tarixi hadisədir. Soyqırım Memorial Kompleksinin məhz hadisənin baş verdiyi ərazidə inşa olunması, tarixi yaddaşın qorunması, erməni faşist-millətçilərinin həyata keçirdikləri soyqırım siyasətinin gələcək nəsillərə çatdırılması baxımından ən doğru vasitə, dərin düşünülmüş qərardır”.

Yeni Balaken.az xəbər verir ki, bunu Moderator.az-a açıqlamasında millət vəkili Nəsib Məhəməliyev bildirib. Millət vəkili qeyd edib ki, kompleks erməni faşizminin ifşasına da böyük töhfə verəcək:

“Qətliamın törədilməsindən 34 il ötür. Hər il fevral ayının 26-da, ölkəmizdə və soydaşlarımızın məskunlaşdığı bir çox ölkələrdə, böyük hüznlə faciənin qurbanları yad edilir, ruhlarına dualar oxunur.

Əfsuslar olsun ki, Xocalıda baş verənlərə dünya birliyi biganə yanaşdı. Azərbaycan hökuməti, paralel olaraq Heydər Əliyev Fondu tərəfindən, soyqırımının dünyada tanıdılması üçün sistemli siyasət aparıldı. Nəticədə, dünya Xocalıda baş verənlərdən məlumatlıdı. 10 dan artıq dövlət, ABŞ-nın bir çox ştatı tərəfindən tanındı. Gələcəkdə daha çox dövlətlər tərəfindən tanınacağına şübhə yoxdur.

Bu gün əminliklə deyə bilərik ki, Xocalıda və digər bölgələrdə şəhid olmuş soydaşlarımızın ruhu şaddır. Torpaqlarımız tamamilə işğaldan azad olunub. Xocalı sakinləri artıq öz doğma yurdlarına qayıdırlar. Dövlət Başçısının açılışını etdiyi Soyqırım Memorial Kompleksi, faciə qurbanlarına olan ehtiramın zirvəsi hesab oluna bilər. Kompleks funksional olaraq, möhtəşəmliyi ilə seçilir və erməni faşizminin ifşası baxımından son dərəcə əhəmiyyətli abidədir”.

0

Balakəndə Xocalı soyqırımı qurbanlarının xatirəsi anılıb

Balakən rayonunda Xocalı soyqırımı faciəsinin 34-cü ildönümü ilə bağlı silsilə tədbirlər keçirilib.

Balakən Rayon İcra Hakimiyyətinin başçısı Natiq Ağayev rayonda məskunlaşan Xocalı sakinləri ilə görüşüb. Rayon rəhbəri bildirib ki, Xocalı soyqırımı insanlıq tarixinin qanlı səhifəsidir. Bu faciə təkcə Azərbaycan xalqına qarşı deyil, ümumbəşəri dəyərlərə, insan hüquqlarına və beynəlxalq hüquq normalarına qarşı törədilmiş cinayətdir. Qeyd edilib ki, Vətən müharibəsi və antiterror tədbirlərində qazanılan Zəfər sayəsində torpaqlarımız işğaldan azad olunaraq suverenliyimiz təmin edilib. 2023-cü il oktyabrın 15-də Prezident, Müzəffər Ali Baş Komandan İlham Əliyev tərəfindən Xocalıda Azərbaycanın şanlı Dövlət Bayrağının ucaldılması tarixi ədalətin təntənəsi idi. Bu gün hər bir azərbaycanlı bəşər tarixində ən qanlı cinayətlərdən biri olan Xocalı soyqırımının günahsız qurbanlarının əziz xatirəsini ehtiramla yad etməklə yanaşı, şanlı Azərbaycan Ordusunun düşmən üzərində qazandığı tarixi Zəfərin qürurunu yaşayır. Öz ərazi bütövlüyünü və suverenliyini tam bərpa etmiş Azərbaycanın azad olunmuş ərazilərində həyata keçirilən quruculuq və bərpa işləri, insanların öz doğma yurdlarına qayıdışı həm də tarixi ədalətin təntənəsidir.

Saat 17:00-da Azərbaycanın bütün ərazisində olduğu kimi, Balakən rayonunda da Xocalı soyqırımı qurbanlarının xatirəsi bir dəqiqəlik sükutla yad edilib. Faciənin ildönümü ilə əlaqədar rayon ərazisində nəqliyyatın və piyadaların hərəkəti bir dəqiqəlik dayandırılıb.

Daha sonra Balakən Rayon İcra Hakimiyyətinin başçısı Natiq Ağayev, icra hakimiyyətinin əməkdaşları, hüquq-mühafizə orqanlarının rəhbərləri, şəhid ailələri, qazilər, müharibə iştirakçıları, din xadimləri, rayon ictimaiyyətinin nümayəndələri Xocalı faciəsinin 34-cü ildönümü ilə əlaqədar ağacəkmə aksiyasında iştirak ediblər. Aksiya zamanı Yevlax-Zaqatala-Gürcüstan dövlət sərhədi avtomobil yolunun Qazbinə kəndi ərazisindən keçən hissəsində həmişəyaşıl şam və şabalıd ağacları  əkilib. Yeni əkilən ağaclar suvarılıb, mövcud ağacların dibi yumşaldılıb və yaşıllıqlara aqrotexniki qaydada qulluq göstərilib.

                                                                       Yeni Balakən

1

Əli Ansuxski – Dövlətə sədaqətin və xeyirxahlığın simvolu

Müstəqil Azərbaycanın dövlət quruculuğu salnaməsində özünəməxsus iz qoymuş, xalqın rəğbətini qazanmış fədakar dövlət xadimi, siyasətçi və tanınmış xeyriyyəçi Əli Abdulqədir oğlu Ansuxskinin faciəli ölümündən sabah düz 30 il keçir. 1996-cı ilin 26 fevralında Bakının mərkəzində amansız sui-qəsd nəticəsində həyatdan vaxtsız qoparılan Əli Ansuxski, ölkəmizin ən mürəkkəb və taleyüklü illərində sarsılmaz dövlətçilik mövqeyi ilə seçilən şəxsiyyətlərdən biri idi.

O, Ümummilli Lider Heydər Əliyevin siyasi kursuna dərindən inanmış və bu yolun ən sadiq tərəfdarlarından biri kimi ölkədə sabitliyin bərqərar olması, qanunçuluğun möhkəmləndirilməsi naminə var qüvvəsi ilə çalışmışdır. Milli Məclisin deputatı olduğu dövrdə yalnız qanun yaradıcılığı prosesində deyil, həm də xalqla dövlət arasında möhkəm körpülərin qurulmasında müstəsna rol oynamışdır. Onun təşəbbüsü ilə keçirilən xeyriyyə aksiyaları bu gün də dərin hörmətlə xatırlanır.

Təkcə Balakən və Zaqatala bölgəsində deyil, bütün respublikada böyük nüfuza malik olan Əli Ansuxski, Ulu Öndər Heydər Əliyevin rəhbərliyi ilə həyata keçirilən milli birlik və həmrəylik siyasətinin ən fəal təbliğatçısı və icraçısı kimi tanınırdı. Onun xeyriyyəçilik fəaliyyəti, kimsəsizlərə və ehtiyacı olanlara göstərdiyi maddi-mənəvi dəstək, bölgənin infrastrukturunun yenilənməsindəki şəxsi təşəbbüsləri onu insanların qəlbində əbədiləşdirmişdir.

Bu gün Prezident İlham Əliyevin rəhbərliyi altında Azərbaycanın ərazi bütövlüyünün bərpası, ölkəmizin regionun ən qüdrətli dövlətinə çevrilməsi, vaxtilə Əli Ansuxski kimi dövlətə sadiq insanların ən böyük arzusu idi. Müzəffər Ali Baş Komandan bu arzunu gerçəkləşdirərək istiqlalımızı möhkəmləndirdi. Şübhəsiz ki, bu gün Əli Ansuxskinin də ruhu şaddır.

Onun vəfatından 30 il keçməsinə baxmayaraq, xatirəsi həm dövlət səviyyəsində, həm də təmsil etdiyi xalqın yaddaşında ehtiramla anılır. Əli Ansuxski Azərbaycan dövlətçilik tarixinə cəsarətli millət vəkili, sadiq silahdaş və böyük vətənpərvər kimi adını həkk etdirmişdir.

Əli Ansuxski – dövlətə sədaqətin, xalqa xidmətin və xeyirxahlığın parlaq nümunəsi olaraq yaddaşlarda yaşayır. Onun ömür yolu gələcək nəsillərə bir örnəkdir. Ruhu şad olsun!

Yeni Balakən

0

Xocalı – qan yaddaşımız Balakəndə anıldı
Balakən rayonunda Xocalı soyqırımının 34-cü ildönümünə həsr olunmuş “Xocalı – qan yaddaşımız” adlı anım tədbiri keçirildi. Tədbir Balakən Rayon İcra Hakimiyyəti, Şəki-Zaqatala Regional Gənclər və İdman İdarəsinin Balakən rayonu üzrə sektoru, Balakən rayon Heydər Əliyev Mərkəzi, Balakən Gənclər Evi və Xocalı Soyqırımını Tanıtma İctimai Birliyinin birgə təşkilatçılığı ilə Balakən Gənclər Evində baş tutdu.
İlk olaraq Xocalı soyqırımı qurbanlarının və Vətən uğrunda canından keçmiş bütün şəhidlərimizin əziz xatirəsi bir dəqiqəlik sükutla yad edildi, Azərbaycan Respublikasının Dövlət Himni səsləndirildi.
Çıxış edən natiqlər 1992-ci il fevralın 25-dən 26-na keçən gecə Ermənistan silahlı qüvvələrinin dinc əhaliyə qarşı törətdiyi Xocalı soyqırımının bəşəriyyətə qarşı ağır cinayət olduğunu vurğuladılar. Onlar yüzlərlə günahsız insanın qətlə yetirildiyini, ailələrin məhv edildiyini, uşaqların valideynsiz qaldığını diqqətə çatdıraraq, faciənin yalnız Azərbaycan xalqının qan yaddaşı deyil, həm də insanlıq əleyhinə törədilmiş cinayət kimi dünya ictimaiyyətinə çatdırılmasının vacibliyini qeyd etdilər.
Natiqlər gənclərin milli-mənəvi dəyərlər ruhunda tərbiyə olunmasının, tariximizin həqiqətlərinin düzgün öyrənilməsinin və gələcək nəsillərə ötürülməsinin önəmini vurğuladılar. Bu kimi tədbirlərin gənclərdə vətənpərvərlik hissini gücləndirdiyi, tarixi yaddaşı qoruduğu və milli həmrəyliyi möhkəmləndirdiyi bildirildi.
Tədbirin bədii hissəsində gənclər Xocalı şəhidlərinin xatirəsinə həsr olunmuş şeir kompozisiyası ilə çıxış etdilər, həmçinin “Xocalı nişanəsi” adlı qısametrajlı film nümayiş etdirildi.
Bu anım tədbiri bir daha göstərdi ki, Xocalı faciəsi xalqımızın qan yaddaşıdır və bu yaddaş gələcək nəsillərə ötürülərək, milli birliyimizin və vətənpərvərlik ruhumuzun möhkəmlənməsinə xidmət edir.
Yeni Balakən

0

Prezidentlə çiyin-çiyinə

Bəşəri dəyərlərin, humanist idealların və nəcib amalların daşıyıcıları öz şərəfli ömür yolları ilə mənsub olduqları xalqa daim başucalığı gətirir, cəmiyyətin sonsuz rəğbətini qazanırlar. Zəngin fəaliyyəti, bənzərsiz siyasi-ictimai missiyası və yüksək insani keyfiyyətləri ilə nəinki ölkəmizdə, beynəlxalq aləmdə böyük nüfuz sahibi olan Birinci vitse-prezident Mehriban xanım Əliyeva da məhz bu cür şəxsiyyətlərdəndir. Azərbaycan qadınının ən ali xüsusiyyətlərini öz simasında birləşdirən, humanizm missiyasını ləyaqətlə icra edən Mehriban xanımın dövlətin ictimai-siyasi və mədəni intibahındakı xidmətləri əvəzsizdir. Onun çoxşaxəli fəaliyyəti cəmiyyət həyatının bütün sferalarını dərindən əhatə edir. Mehriban xanımın fəaliyyətinin strateji ana xəttini dövlət başçısı İlham Əliyevin həyata keçirdiyi siyasi kursun tam dəstəklənməsi, milli hədəflərin reallaşdırılması və Azərbaycanın hər bir sahədə qazandığı nailiyyətlərin möhkəmləndirilməsi təşkil edir. Mehriban xanım Əliyevanın çoxşaxəli fəaliyyətinin ən məsuliyyətli və strateji mərhələlərindən birini 2017-ci il fevralın 21-dən etibarən icra etməyə başladığı Birinci vitse-prezidentlik missiyası təşkil edir. Bu ali dövlət vəzifəsi ölkənin idarəetmə sistemində yeni bir inkişaf dinamikasının əsasını qoydu. Azərbaycanın dövlət idarəçiliyində müasir və peşəkar bir idarəetmə modelinin formalaşmasını şərtləndirdi. Məhz bu yüksək təyinatdan sonra həyata keçirilən layihələr cəmiyyətin həyatında həlledici rol oynamağa başladı. 

Birinci vitse-prezidentin ictimai-siyasi fəaliyyəti Prezident İlham Əliyevin həyata keçirdiyi strateji xəttin ən güclü dəstəkçisidir. Müzəffər Ali Baş Komandanla çiyin-çiyinə işğaldan azad edilmiş ərazilərdə aparılan bərpa işləri, Şuşanın tarixi simasının dirçəldilməsi Mehriban xanımın milli quruculuq prosesindəki müstəsna xidmətidir. Mehriban xanım dövlət başçısının ən yaxın məsləkdaşı olaraq, Azərbaycanın müasirləşməsi, xalqımızın və milli birliyinin daha da möhkəmlənməsi yolunda tükənməz enerji ilə çalışmaqdadır. Mehriban xanımın fəaliyyəti xalqımızın rifahına və ölkəmizin tərəqqisinə xidmət edir. Onun fəaliyyət fəlsəfəsinin mərkəzində mərhəmət və insan amili dayanır, nəcib təşəbbüsləri cəmiyyətin ən müxtəlif zümrələrində dərin ehtiramla qarşılanır. Şəhid ailələrinə və qazilərə göstərilən xüsusi diqqət, yaralı hərbçilərimizin yüksəktexnologiyalı reabilitasiya vasitələri ilə təmini Birinci vitse-prezidentin vətənpərvərlik ruhunun bariz təzahürüdür. Heydər Əliyev Fondunun xətti ilə aztəminatlı ailələrin və həssas qrupların problemlərinin həlli bu insanların sosial müdafiəsinin etibarlı təminatına çevrilib. 44 günlük müharibədən sonra şəhid ailələrinin sosial-məişət qayğıları, uşaqlarının təhsili və reabilitasiya prosesləri birbaşa Heydər Əliyev Fondunun və dövlət proqramlarının koordinasiyası ilə idarə olunurMehriban xanımın Birinci vitse-prezident kimi ilk rəsmi müşavirəsini məhz keçmiş qaçqın və məcburi köçkünlərin problemlərinə həsr etməsi bu sahəyə verdiyi önəmin bariz göstəricisi idi. Mehriban xanım üçün həssas təbəqələrə diqqət və qayğı, sadəcə, dövlət vəzifəsi deyil, mənəvi bir missiya, səmimiyyət və sevgidən irəli gələn davranışdır. 

30 illik işğala son qoyan tarixi zəfərimizdən sonra Mehriban xanım Əliyevanın fəaliyyətində yeni, əzəmətli bir dövr başlandı. Müzəffər Ali Baş Komandanla çiyin-çiyinə azad edilmiş ərazilərə edilən səfərlər, dağıdılmış şəhərlərin sürətli bərpası və Şuşanın mədəniyyət paytaxtı statusunun dirçəldilməsi onun fədakar əməyinin nəticəsidir. Bu gün Qarabağda aparılan genişmiqyaslı tikinti-quruculuq işləri təkcə fiziki bərpa deyil, həm də milli ruhun o torpaqlara qayıdışıdır. Qarabağın tarixi və dini abidələrinin, Şuşanın mədəni irsinin bərpası, Mehriban xanımın rəhbərliyi ilə həyata keçirilən quruculuğun həm də mənəvi təcəssümüdür. Mehriban xanım Əliyevanın təşəbbüsü ilə səhiyyədə “ölüm hökmü” kimi görünən bir çox diaqnoz artıq Azərbaycan üçün keçmişdə qalıb. Regionda analoqu olmayan Talassemiya Mərkəzi yüzlərlə uşağın həyata tutunmasına vəsilə olub. Xüsusi qayğıya ehtiyacı olan uşaqların cəmiyyətə inteqrasiyası və müalicəsi üçün yaradılan mərkəzlər birbaşa Birinci vitse-prezidentin himayəsindədir. COVID-19 ilə mübarizədə modul tipli xəstəxanaların qısa müddətdə qurulması və vaksinasiya prosesinin təşkilində də  Mehriban xanımın idarəçilik qabiliyyəti həlledici rol oynadı.Mehriban Əliyeva həm də Azərbaycanın zəngin mədəni irsini bəşəriyyətin ehtiram göstərdiyi dəyər səviyyəsinə yüksəldən mədəniyyət elçisidir. Parisdən Moskvaya, Vatikandan Berlinə qədər uzanan mədəniyyət günləri Azərbaycanın “yumşaq güc” strategiyasının möhtəşəm uğurudur. Milli musiqi irsimizin qorunması, beynəlxalq festivallar və Muğam Mərkəzinin fəaliyyəti tariximizin gələcək nəsillərə ötürülməsində misilsiz rol oynayır. “Mədəniyyət xalqları birləşdirən, ən çətin anlarda körpü salan yeganə qüvvədir” fəlsəfəsi Mehriban xanımın bütün beynəlxalq fəaliyyətinin qayəsini təşkil edir. Azərbaycanın Birinci vitse-prezidentinin ictimai-siyasi və sosial-mədəni fəaliyyət arealı o qədər zəngin və miqyaslıdır ki, bu missiyanı bir neçə istiqamətlə məhdudlaşdırmaq qeyri-mümkündür. Beynəlxalq birlik və Azərbaycan cəmiyyəti Mehriban Əliyevanı həm də ali humanizm dəyərlərinin daşıyıcısı və xeyirxahlıq mücəssiməsi kimi qəbul edir. Çünki xalqa layiqli xidmət prinsipi Mehriban xanım Əliyevanın fəaliyyətinin əsas qayəsidir. Onun diqqət mərkəzində hər zaman cəmiyyətin ən ehtiyaclı təbəqələri, valideyn himayəsindən məhrum körpələr və ahıllar dayanır. Ölkənin hər bir guşəsində ucalan müasir təhsil və səhiyyə ocaqları, tarixi-dini abidələrin restavrasiyası onun milli genofondun qorunmasına yönəlmiş strateji vətəndaşlıq missiyasının əyani sübutudur.

Ötən illərin reallığı göstərir ki, Mehriban xanımın hər bir addımı Prezident İlham Əliyevin yürütdüyü siyasi kursun uğuruna və müstəqil Azərbaycanın parlaq gələcəyinə xidmət edir. O, Ümummilli Lider Heydər Əliyevin ideyalarını yaşadan və Azərbaycanın zəfər dolu salnaməsinə öz imzasını atan nəciblik simvoludur. Mehriban xanım Əliyeva həm bir dövlət xadimi, həm də bir xeyriyyəçi kimi müasir Azərbaycan qadınının ən parlaq örnəyidir. Onun fəaliyyəti vətənə sevgi və insana hörmətin mükəmməl vəhdətidir. Birinci vitse-prezidentin nümayiş etdirdiyi yüksək peşəkarlıq və qətiyyət ölkəmizin dinamik yüksəlişinə fundamental töhfələr verməklə yanaşı, bu təyinatın nə qədər uğurlu olmasını və Mehriban xanım Əliyevanın mükəmməl idarəçilik fəaliyyətinin əzəmətini də sübuta yetirir. Mehriban xanım Əliyevanın fəaliyyətinin ən ali qiyməti isə insanların ona olan səmimi inamı və dərin rəğbətidir.

Nəsib Məhəməliyev, Milli Məclisin deputatı

Balakəndə şəhid Cavanşir Həsənovla vida mərasimi keçirilib

Balakən rayonunda uzun illər itkin kimi qeydiyyatda olan I Qarabağ müharibəsi şəhidi Cavanşir İsrafil oğlu Həsənovun nəşi ailəsinə təhvil verilib və bu gün Şəhidlər xiyabanında dəfn olunub.

Vida mərasimində Balakən Rayon İcra Hakimiyyətinin başçısı Natiq Ağayev, hüquq-mühafizə orqanlarının rəhbərləri, şəhid ailələri və ictimaiyyət nümayəndələri iştirak ediblər.

1967-ci ildə Balakənin Hənifə kəndində dünyaya gələn Cavanşir Həsənov könüllü olaraq Qarabağ müharibəsinə qatılıb. 1992-ci il iyunun 12-də Ağdam rayonu Surxavənd kəndi istiqamətində gedən döyüşlərdə itkin düşən qəhrəmanımızın taleyi uzun illər boyu ailəsi və yaxınları üçün bir ümid işığı olub. Bu gün həmin ümid gerçəyə çevrildi – şəhidimizin məzarı var, adı torpağında əbədiləşdi.

Şəhidin ailəsi üçün bu gün həm kədər, həm də qürur günü oldu. İllərlə yolunu gözlədikləri ata, övlad, qardaş nəhayət doğma torpağa qovuşdu. Onun oğlu – atasının adını daşıyan Cavanşir – atasını görməsə də, bu gün onun qəhrəmanlığını bütün Balakənlə birlikdə yaşadı.

Şəhid Cavanşir Həsənovun nəşinin tapılması və şəxsiyyətinin müəyyən olunması dövlətimizin şəhidlərimizə, itkin düşmüş soydaşlarımıza göstərdiyi diqqət və qayğının bariz nümunəsidir.

Mərasimdən sonra rayon rəhbərliyi Şəhidlər xiyabanında aparılan yenidənqurma işləri ilə tanış olub, görüləcək işlər barədə tapşırıqlar verib.

                                                          Yeni Balakən