Category: Mədəniyyət

0

Balakən rayonunda Ümummilli Lider Heydər Əliyevin anadan olmasının 103 illik yubileyinə həsr edilən silsilə tədbirlər çərçivəsində rəngarəng bir mədəniyyət bayramı yaşandı. Mayın 22-də Rayon İcra Hakimiyyəti, Mədəniyyət Mərkəzi və MİHİ Balakən rayon Komitəsinin birgə təşkilatçılığı ilə keçirilən “Rəqslərin sehri” adlı rəqs müsabiqəsinin nəticələri elan olundu.

Müsabiqənin I və II turunda 76 nəfər gənc və yeniyetmə iştirak etmiş, 5 duet, 3 qrup və 7 solo çıxış olmaqla 4 nominasiya üzrə ümumilikdə 35 nəfər istedadlı iştirakçı mükafatlandırılmışdır. Qaliblərə kubok, medal və diplomlar münsiflər heyəti tərəfindən təqdim olunaraq onların zəhməti və istedadı yüksək qiymətləndirildi.

Tədbir çərçivəsində uğur qazanan iştirakçılar öz rəqs nömrələrini bir daha səhnədə nümayiş etdirərək tamaşaçılara unudulmaz anlar yaşatdılar. Rəngarəng çıxışlar, milli geyimlər və musiqi ilə müşayiət olunan performanslar tədbiri əsl bayrama çevirdi.

Balakən ictimaiyyəti tərəfindən böyük maraqla izlənilən müsabiqə həm gənclərin yaradıcılıq potensialını üzə çıxardı, həm də Heydər Əliyevin mədəniyyətə verdiyi önəmin bariz nümunəsi kimi yadda qaldı. Bu günün sevinci bir daha göstərdi ki, Balakən gəncliyi milli-mənəvi dəyərlərə bağlıdır və onları incəsənət vasitəsilə yaşatmağa hazırdır.

                                                                   Yeni Balakən

0

Balakən rayonunda Ümummilli Lider Heydər Əliyevin anadan olmasının 103-cü ildönümü münasibətilə keçirilən silsilə tədbirlər yaddaşlarda dərin iz buraxır. Bu tədbirlərin ən təsirli məqamlarından biri isə  rayon Mədəniyyət Mərkəzində nümayiş olunan “Qarabağnamə” tamaşası oldu.

İlyas Əfəndiyevin “Hökmdar və qızı” əsasında hazırlanan tamaşa Mədəniyyət Mərkəzinin bədii rəhbəri Zöhrə Bakeyeva tərəfindən səhnələşdirildi. Tamaşadan əvvəl foyedə Heydər Əliyevin həyat və fəaliyyətinə həsr olunmuş kitab sərgisi ziyarət olundu, bu isə tədbirə xüsusi mənəvi rəng qatdı.

Şəki–Zaqatala Regional Mədəniyyət İdarəsinin Balakən üzrə nümayəndəsi Şəfəq Hacıyeva çıxışında Ulu Öndərin Azərbaycan mədəniyyətinə göstərdiyi qayğıdan danışaraq vurğuladı ki, “Qarabağnamə” tamaşasının məhz bu günə həsr olunması təsadüfi deyil, milli-mənəvi dəyərlərimizin yaşadılmasına bir töhfədir.

Səhnədə Arzu Ocaxverdiyev, Qürbət Muradov, Nərgiz Hacıyeva, Nazim Manafov və dram dərnəyinin üzvləri – Kəmalə Qurbanova, Vüqar Mikayılov, Rasim Sərkərov, Rəfail Nəbiyev, Namiq Novruzov, Ramazan Mollaçıyev, Ramazan Abalov, Zamin Yüzbaşiyev, Nani Cavadova və Səadət Cerçiyeva obrazları böyük ustalıqla canlandırdılar. Tamaşaçılar onların ifasını alqışlarla qarşıladı, səhnədəki hər bir söz, hər bir duyğu salonda dərin rəğbət doğurdu.

Tamaşanın sonunda Heydər Əliyevin “Qarabağnamə” haqqında fikirlərinin yer aldığı videoçarx nümayiş olundu. Bu məqam tamaşanın emosional təsirini daha da gücləndirdi, izləyicilərə həm tarixi, həm də mənəvi bir mesaj verdi.

Balakən Rayon İcra Hakimiyyətinin başçısı Natiq Ağayev tədbir iştirakçıları ilə görüşərək onlara fəaliyyətlərində uğurlar arzuladı. Sonda yaradıcı heyətlə xatirə şəkli çəkildi.

              Yeni Balakən

0

28 aprel 2026-cı il tarixində Balakən Mərkəzi Kitabxanasında Mədəniyyət Mərkəzinin birgə təşkilatçılığı ilə Azərbaycan Yazıçılar Birliyinin üzvü, “Qızıl qələm” mükafatı laureatı, tanınmış şair Ramazan Xutra ilə görüş keçirildi.

Tədbirdə Rayon İcra Hakimiyyətinin, Mədəniyyət Mərkəzinin nümayəndələri, Balakən yazarları, Zaqataladan şairin sənət dostları, rayon ziyalıları, şəhid anaları, mədəniyyət işçiləri, kitabxana əməkdaşları, qiraət ustaları və gənclər iştirak etdilər.

Görüşdə şairin həyat və yaradıcılığı haqqında ətraflı məlumat verildi, onun şeirləri və hekayələri səsləndirildi. İştirakçılar Ramazan Xutranın sənət yolunu əks etdirən videoçarxa da baxdılar. Tədbirin ən yaddaqalan məqamlarından biri isə şairin yeni çapdan çıxmış kitabının ilk dəfə oxuculara təqdim olunması oldu.

Bu görüş Balakənin ədəbi-mədəni həyatında əlamətdar hadisəyə çevrildi. Şairin yaradıcılığına göstərilən maraq, onun söz dünyasının gənclərə və oxuculara çatdırılması, həmçinin şəhid analarının və ziyalıların iştirakı tədbirə xüsusi mənəvi dəyər qatdı.

                                                                       Yeni Balakən

1

Ali Osmanov və “Cahan” avar xalq kollektivinin möhtəşəm konserti

Balakən rayon Heydər Əliyev adına mədəniyyət və istirahət parkı bu gün baharın gəlişini musiqi və rəqs ahəngi ilə qarşıladı. Tanınmış sənətkar Ali Osmanovun ifası və “Cahan” avar xalq kollektivinin rəngarəng çıxışları tamaşaçılara unudulmaz anlar yaşatdı.

Parkda qurulan səhnə bahar bayramının ruhunu əks etdirən bəzəklərlə işıqlandırılmış, ətrafı isə yüzlərlə insanın sevinc dolu alqışları ilə canlanmışdı. Uşaqların şən oyunları, gənclərin coşqusu və böyüklərin maraqlı izləyici dəstəyi tədbirə xüsusi rəng qatdı.

Konsert boyu milli musiqi alətlərinin sədası, avar xalq rəqslərinin ritmik hərəkətləri və Ali Osmanovun ürəklərə toxunan ifası Balakənlilərin qəlbində baharın təzə nəfəsini oyatdı. “Cahan” kollektivinin milli geyimlərdə səhnəyə çıxışı isə həm estetik gözəlliyi, həm də mədəni irsin zənginliyini nümayiş etdirdi.

Bu tədbir bir daha sübut etdi ki, Balakən mədəniyyətin, dostluğun və bahar sevincinin mərkəzidir. İştirakçılar konsertdən ruh yüksəkliyi ilə ayrıldılar, baharın gəlişini musiqi və rəqs vasitəsilə qarşılamağın fərəhini yaşadılar.

                               Yeni Balakən

1

Baharın gəlişi böyük coşqu ilə qarşılandı

Əcdadlarımızdan bizə yadigar qalan, milli ruhumuzu, yaddaşımızı və qədim adət-ənənələrimizi özündə yaşadan Novruz bayramı Balakəndə böyük coşqu ilə qeyd olunub. Martın 19-da Heydər Əliyev adına mədəniyyət və istirahət parkında ümumrayon şənliyi keçirilib. Park səmənilər, gül-çiçəklər, al-əlvan xonçalar və xalq tətbiqi sənəti nümunələri ilə bayramsayağı bəzədilib.

Tədbirdə Balakən Rayon İcra Hakimiyyətinin başçısı Natiq Ağayev, rayon rəhbərləri, hüquq-mühafizə orqanlarının əməkdaşları, idarə və müəssisələrin kollektivləri, şəhid ailələri, qazilər və ictimaiyyətin nümayəndələri iştirak ediblər. Qonaqlar Bahar qız, kosa və keçəl, milli geyimli gənclərin təqdim etdiyi Novruz xonçaları və şərbətlə qarşılanıb. “Yallı” rəqsi bayramın ruhunu daha da canlandırıb. İcra başçısı Natiq Ağayev musiqi sədaları altında bayram tonqalını alovlandıraraq şənliyi rəsmi şəkildə açıq elan edib.

Sərgilər və bayram guşələri

Bayram çərçivəsində sahibkarların və məktəblilərin əl işlərindən ibarət satış sərgisi təşkil olunub. Tarix-diyarşünaslıq muzeyinin eksponatları, qədim məişət əşyaları, rəsm sərgiləri və milli mətbəximizin nümunələri qonaqların böyük marağına səbəb olub. İdmançılar öz məharətlərini nümayiş etdiriblər.

Təbriklər və mükafatlandırma

Rayon rəhbəri Natiq Ağayev Novruz bayramının dövlət səviyyəsində qeyd olunmasının ümummilli lider Heydər Əliyevin adı ilə bağlı olduğunu vurğulayıb. Şəhidlərin əziz xatirəsi bir dəqiqəlik sükutla yad edilib. O, həmçinin Balakən gimnaziyasının təmirinə dəstək verən iş adamı Qalib Əhmədovu təltif edib və region məktəblilərinin velosiped turnirində qalib gəlmiş idmançıları mükafatlandırıb.

Rəngarəng konsert və personajların çıxışı

Dədə Qorqud və Bahar qızı mərasim iştirakçılarını salamlayaraq xoş arzularını çatdırıblar. Mədəniyyət Mərkəzinin musiqi və rəqs kollektivləri bayram konserti ilə çıxış edib. Kosa və Keçəl məzəli zarafatları ilə tədbirə şənlik qatıb, iştirakçılarda unudulmaz təəssürat yaradıb.

Şənlik park ərazisində ağacəkmə aksiyası ilə başa çatıb. Bu addım Novruzun təbiətə sevgi və yenilənmə fəlsəfəsini bir daha təsdiqləyib.

                                                                                        Yeni Balakən

1

Torpaq Çərşənbəsi Balakəndə İncəsənət Bayramına Çevrildi

17 mart 2026-cı il tarixində Balakən Uşaq İncəsənət Məktəbi baharın gəlişini, torpağın oyandığı ilaxır – “Torpaq çərşənbəsi*ni xüsusi bir tədbirlə qeyd etdi. Bu məkanda keçirilən hər bir tədbir özəl və gözəl görünüm alır, ən kiçik məqam belə böyük təəssürat yaradır.

Tədbirdə rayon İcra Hakimiyyətinin başçısı cənab Natiq Ağayev, dövlət hüquq mühafizə orqanlarının rəhbərləri, şəhid anaları, mədəniyyət işçiləri, valideynlər və digər qonaqlar iştirak etdilər. Onların iştirakı tədbirə həm rəsmi, həm də mənəvi dəyər qatdı.

İncəsənətlə Qarşılama

Girişdə qonaqları məktəbin rəqs qrupunun şagirdləri milli “Yallı” rəqsi ilə qarşıladı. Bu qədim rəqs həm birlik, həm də milli ruhun təcəssümü kimi tədbirin başlanğıcına xüsusi rəng qatdı. Ardınca gənc rəssamların canlı yaradıcılıq prosesi və sərgilənən əsərləri təqdim olundu. Qonaqlar uşaqların fırçasından doğan bayram ovqatını, milli motivləri və yaradıcılıq həvəsini böyük maraqla izlədilər.

Xatırladaq ki, Balakən Uşaq İncəsənət Məktəbi 2020-ci ildə cənab Prezidentin iştirakı ilə açılmış, respublikada nadir layihələrdən biridir. Məktəbin özünə məxsus səs yazma studiyası, məşhur tar ustası Aydın Tağıyevin emalatxanası və zəngin yaradıcılıq mühiti tədbir iştirakçıları üçün xüsusi maraq doğurdu. Bu imkanlar Balakən gənclərinin incəsənətə olan marağını daha da artırır.

Tədbirin əsas hissəsi böyük zalda baş tutdu. Azərbaycan Respublikasının Dövlət Himni səsləndi, şəhidlərimizin ruhu ehtiramla yad edildi. Ardınca uşaq xor kollektivinin, xalq çalğı alətləri ansamblının və müəllimlərin ifasında milli musiqi nümunələri səsləndi. Rəqs kollektivlərinin çıxışları isə zalda bayram ovqatını daha da gücləndirdi. Hər ifa, hər rəqs tamaşaçılar tərəfindən alqışlarla qarşılandı.

Bayramın Son Nəğməsi

Tədbirin sonunda rayon İcra Hakimiyyətinin başçısı Natiq Ağayev tədbir iştirakçılarını bayram münasibətilə təbrik edərək belə gözəl tədbirlərin davamını tövsiyyə etdi. O, məktəb kollektivi ilə birgə xatirə şəkli çəkdirərək bu günün yaddaşlarda qalacaq bir bayram səhifəsinə çevrilməsinə töhfə verdi.

                                                                                                                 Ramazan Abal

0

Balakəndə “Mədəniyyət Konsepsiyası–2040: Ənənədən Gələcəyə”adlı tədbir keçirilib

Bu gün Balakən Rayon Mədəniyyət Mərkəzində “Mədəniyyət Konsepsiyası–2040: Ənənədən Gələcəyə” başlığı altında tədbir təşkil olunub.

Tədbirdə Balakən Rayon İcra Hakimiyyətinin başçısı Natiq Ağayev, rayon hüquq-mühafizə orqanlarının, idarə və müəssisələrin rəhbərləri, kollektivlər, eləcə də rayon ictimaiyyətinin nümayəndələri iştirak ediblər.

Tədbirdən öncə rayon Mədəniyyət Mərkəzinin foyesində xalçaçılıq, dekorativ tətbiqi sənət, ağac üzərində oyma, tikmə, toxuculuq nümunələri, təbii dəridən ibarət əl işləri, həmçinin rəsm əsərləri nümayiş etdirilib. Burada yerli ustalar öz əl işlərini və yaradıcılıq nümunələrini təqdim edərək iştirakçılara Balakənin zəngin sənətkarlıq ənənələri və milli mədəni irsi ilə daha yaxından tanış olmaq imkanı yaradıblar.

Eyni zamanda tədbirdə “Azərbaycan Mədəniyyəti–2040” Azərbaycan Respublikasının Mədəniyyət Konsepsiyası haqqında məlumat verilib. Konsepsiyanın milli-mənəvi dəyərlərin qorunmasını təmin edən müasir mədəniyyət modelinin formalaşdırılması, habelə mədəniyyət sahəsində sistemli və dayanıqlı inkişafın təmin edilməsi məqsədilə qəbul edildiyi bildirilib. Qeyd olunub ki, Konsepsiya milli kimliyin qorunması, qloballaşma şəraitində Azərbaycan mədəniyyətinin rəqabətqabiliyyətinin artırılması və gələcək nəsillərə ötürülməsi baxımından fundamental əhəmiyyət daşıyır.

Tədbirin bədii hissəsində Balakən Rayon Mədəniyyət Mərkəzinin əməkdaşlarının, “Cahan” avar xalq kollektivinin, “Fidanlar” rəqs qrupu, “Nənələr” ingiloy və “Ebel” avar folklor qruplarının çıxışları, eləcə də müğənnilərin ifasında rəngarəng musiqi nömrələri təqdim olunub.

                                         Yeni Balakən

1

Balakəndə narkomaniyaya qarşı güclü mesaj: “Külə dönmüş arzular” səhnədə

Balakən, 28 yanvar – Balakən Rayon İcra Hakimiyyəti yanında Narkotiklərlə Mübarizə Komissiyası və Mədəniyyət Mərkəzinin birgə təşkilatçılığı ilə nümayiş etdirilən “Külə dönmüş arzular” tamaşası narkomaniyaya qarşı mübarizənin vacibliyini bir daha gündəmə gətirdi.

Pakizə Hüseynova və Mirzəağa Məmmədovun ssenarisi əsasında hazırlanan tamaşa, Mədəniyyət Mərkəzinin bədii rəhbəri Zöhrə Bakeyevanın quruluşunda səhnəyə qoyuldu. Tamaşada narkomaniyanın insan həyatını necə məhv etdiyini, arzuları necə külə çevirdiyini bədii dillə əks etdirən səhnələr tamaşaçılarda dərin təsir oyatdı.

Tədbir çərçivəsində məktəblilərin çəkdiyi rəsm əsərləri və mövzuya dair kitab sərgisi nümayiş etdirildi. Bu əsərlər gənc nəsli düşündürmək, onları sağlam həyata yönləndirmək məqsədi daşıyırdı. Ardınca çıxış edən ŞZRMİ-nin Balakən rayon üzrə nümayəndəsi Şəfəq Hacıyeva narkomaniyaya qarşı mübarizənin dövlətin əsas prioritetlərindən biri olduğunu vurğuladı. O, gəncləri sağlam həyat tərzinə çağıraraq, hər kəsi bu sosial bəlaya qarşı birgə mübarizəyə səslədi.

Səhnədə həyat dərsi

Mədəniyyət işçiləri Qürbət Muradov, Kəmalə Qurbanova, Vüqar Mikayılov, Rəfail Nəbiyev, Mədinə Çukayeva və dram dərnəyinin üzvləri – Zamin Yüzbaşiyev, Xacay Əhmədiyeva, Hikmət Qarayev, Ayxan Sahibovun ifasında təqdim olunan obrazlar tamaşaçılar tərəfindən böyük maraqla qarşılandı. Tamaşa narkomaniyanın faciəvi nəticələrini bir ailənin, bir gəncin taleyi üzərindən göstərərək, hər kəsə “sağlam seçim – sağlam gələcək” mesajını verdi.

Tamaşadan sonra narkomaniyaya qarşı mübarizəyə həsr olunmuş film nümayiş etdirildi. Balakən Rayon İcra Hakimiyyətinin başçısı Natiq Ağayev tədbirin sonunda çıxış edərək, bu təşəbbüsün gənclərin maarifləndirilməsində mühüm rol oynadığını qeyd etdi və təşkilatçılara təşəkkürünü bildirdi.

Son söz

Balakəndə keçirilən bu tədbir bir daha göstərdi ki, narkomaniyaya qarşı mübarizə yalnız dövlət qurumlarının deyil, bütün cəmiyyətin ortaq vəzifəsidir. “Külə dönmüş arzular” tamaşası gənclərə sağlam həyatın dəyərini, yanlış seçimlərin isə necə faciələrə yol aça biləcəyini bədii dillə çatdırdı.

Sonda səslənən təşəkkürlər və arzular bir mesajı gücləndirdi: sağlam gənclik – güclü gələcək deməkdir. Balakən ictimaiyyəti bu çağırışı ürəkdən qəbul edərək, narkomaniyaya qarşı mübarizədə həmrəy olduğunu bir daha nümayiş etdirdi.

                                                                  Yeni Balakən

0

27 dekabr tarixində Balakən rayonunda keçirilən “Mənim Azərbaycanım” adlı konsert proqramı Dünya Azərbaycanlılarının Həmrəyliyi Gününə həsr olunaraq, həm milli qürur hissini, həm də musiqi və incəsənətin birləşdirici gücünü bir daha nümayiş etdirdi.

Tədbir məktəbin müəllim və şagird kollektivinin təşəbbüsü ilə hazırlanmış, səhnədəki hər çıxış bir vətən sevgisinin ifadəsinə çevrilmişdi. Konsertin xüsusi qonağı — Azərbaycan Dövlət Mədəniyyət və İncəsənət Universitetinin baş müəllimi Səxavət Məmmədov — öz rəngarəng çıxışları,Balakən Uşaq İncəsənət Məktəbinin direktoru Arifə Tağıyevayla birgə ifaları ilə proqramın bədii dəyərini daha da artırdı.

Zəfər ruhu ilə açılan səhnə

Tədbirin açılışında məktəbin şagirdlərindən ibarət xalq çalğı alətləri ansamblı və uşaq xorunun birgə ifasında “Heyratı” muğamı əsasında hazırlanmış Zəfər marşı səsləndirildi. Bu kompozisiya təkcə musiqi deyil, həm də tarix və qürur dolu bir mesaj idi — tamaşaçılar arasında duyğulu baxışlar, alqışlar və qürur dolu anlar yaşandı.

Ardınca nümayiş olunan videoçarx, Dünya Azərbaycanlılarının Həmrəyliyi Gününün mahiyyətini və bu günün xalqımız üçün nə qədər dəyərli olduğunu vizual və emosional şəkildə çatdırdı.

Səhnədə birləşən ürəklər

Konsert boyu səhnədə müəllim və şagirdlərin birgə çıxışları, fortepiano və xoreoqrafiya şöbələrinin sinerjisi ilə təqdim olunan “İgidlər” mahnısı ilə kulminasiya nöqtəsinə çatdı. Bu ifa, həm estetik baxımdan, həm də məna etibarilə tədbirin ruhunu tamamladı — igidlik, birlik və vətənə sevgi.

Tədbirin qonaqları və ictimai əhəmiyyəti

Tədbirdə Rayon İcra Hakimiyyəti adından Nəzakət xanım Rüstəmova, Şəki-Zaqatala Regional Mədəniyyət İdarəsinin rəisi Ülkər Mahmudova və idarə heyəti, şəhid və qazi ailələri, mədəniyyət işçiləri, valideynlər və digər qonaqlar iştirak edirdi. Onların varlığı tədbirə həm rəsmi, həm də mənəvi dəyər qatdı.

Son söz əvəzi

“Mənim Azərbaycanım” konsert proqramı bir daha sübut etdi ki, musiqi və incəsənət təkcə sənət deyil — həm də həmrəylik, tarix və kimlik ifadəsidir. Balakənin gənc ifaçıları və müəllimləri bu axşam səhnədə təkcə notları deyil, ürəklərini bölüşdülər. Bu tədbir yaddaşlarda birlik, qürur və sevgi ilə dolu bir musiqi gecəsi kimi qalacaq.

                                                                                                   Ramazan Abal

• Facebook

Daha çox foto üçün üstdəki Facebook nişanına tıkla

0

Balakən rayonunda “Heydər Əliyev – Konstitusiyamızın və Dövlət Suverenliyimizin Memarıdır!” adlı tədbir keçirilib.

Balakən rayon Mədəniyyət Mərkəzində “Konstitusiya və Suverenlik ili” çərçivəsində ədəbi-bədii kompozisiya təqdim olunub.

19 dekabr 2025-ci il tarixində Balakən rayon Mədəniyyət Mərkəzində “Heydər Əliyev – Konstitusiyamızın və Dövlət Suverenliyimizin Memarıdır!” adlı ədəbi-bədii kompozisiya nümayiş etdirilib. Tədbir Azərbaycan Respublikasının Dövlət Himninin səsləndirilməsi ilə başlanıb, ardınca Ulu öndər Heydər Əliyevin və Vətən uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilib.

Mərasimdə Balakən Rayon İcra Hakimiyyətinin başçısı Natiq Ağayev, RİH aparatının kollektivi, idarə və müəssisə rəhbərləri, əməkdaşlar iştirak ediblər. Şəki–Zaqatala Regional Mədəniyyət İdarəsinin Balakən rayonu üzrə baş məsləhətçisi Şəfəq Hacıyeva çıxışında Ulu öndər Heydər Əliyevin müasir Azərbaycan dövlətçiliyinin formalaşmasında, Konstitusiyanın qəbulunda və dövlət suverenliyinin möhkəmləndirilməsində oynadığı əvəzsiz rolu vurğulayıb.

Daha sonra Mədəniyyət Mərkəzinin əməkdaşları və bədii qiraət dərnəyinin üzvləri xalq şairi Zəlimxan Yaqubun “Əbədiyyət dastanı” əsasında hazırlanmış kompozisiyanı təqdim ediblər. Səhnə əsəri Ulu öndərin mənalı həyat yolunu, dövlətçilik tariximizdəki misilsiz xidmətlərini və xalq yaddaşında əbədi yaşayan zəngin irsini bədii formada əks etdirib.

Tədbir çərçivəsində Şəfəq Hacıyevanın fortepiano müşayiəti ilə gənc vokalist Vasif Qasımov Sevil Əliyevanın “Əziz anam” mahnısını ifa edib. Musiqi nömrəsi dinləyicilər tərəfindən böyük maraqla qarşılanıb.

Sonda iştirakçılar Ulu öndər Heydər Əliyevin həyat və fəaliyyətinə həsr olunmuş kitab sərgisi ilə tanış olublar.

                                                                    Yeni Balakən

• Facebook

Daha çox foto üçün üstdəki facebook ikonuna tıkla