Category: Siyasət

0

28 May — Müstəqillik Günüdür.
1918-ci ilin bu günü müsəlman Şərqində ilk dünyəvi demokratik respublika olan Azərbaycan Xalq Cümhuriyyətinin (AXC) əsası qoyulmuşdur. Bu əlamətdar tarix xalqımızın azadlıq əzmini və dövlətçilik ənənələrini dünyaya bəyan edən şanlı bir gündür.
Azərbaycan Respublikasının rəsmi dövlət bayramı olan 28 May tarixi haqqında əsas məqamlar aşağıdakılardır:
• 1918-ci il mayın 28-də Azərbaycan Milli Şurası İstiqlal Bəyannaməsini imzalayaraq Azərbaycanın müstəqilliyini elan etdi.
• Müsəlman aləmində ilk parlamentli respublika olan AXC-nin ilk rəsmi hökumət başçısı Fətəli Xan Xoyski, Milli Şuranın sədri isə Məmməd Əmin Rəsulzadə olmuşdur
• 1990-cı ildən etibarən “Respublika Günü” kimi qeyd edilən bu bayramın adı 2021-ci ilin oktyabr ayından dəyişdirilərək rəsmi olaraq Müstəqillik Günü adlandırılmışdır.

“Yeni Balakən” olaraq Azərbaycan xalqını “28 May Müstəqillik Günü” münasibətilə təbrik edirik.
Yeni Balakən

1

Prezident İlham Əliyevin Zəngilana səfəri və sakinlərlə görüşü həm mənəvi, həm də siyasi baxımdan dərin rəmzi məna daşıyır. Ulu Öndər Heydər Əliyevin ən böyük arzusu və vəsiyyəti torpaqlarımızın işğaldan azad edilməsi idi. Bu tarixi missiyanı uğurla yerinə yetirən Müzəffər Ali Baş Komandan bu gün həmin ərazilərdə suverenliyimizin tam bərpa olunduğunu və hər qarış torpağın öz sahibinə qayıtdığını qürurla bəyan edir. Dövlətimizin başçısının azad edilən ərazilərə hər bir səfəri sadəcə yerli xarakter daşımır, həm ölkə ictimaiyyətinə, həm də beynəlxalq birliyə yönələn strateji mesajlar platformasıdır.

Bu fikirləri AZƏRTAC-a açıqlamasında Milli Məclisin deputatı Nəsib Məhəməliyev bildirib.

“Prezident İlham Əliyevin Zəngilan sakinləri ilə görüşündə səsləndirdiyi fikirlərin əsas xəttini Azərbaycanın qurucu və yaradıcı missiyası təşkil edir. Ermənistan işğal dövründə Azərbaycan torpaqlarında məqsədli şəkildə dağıntılar törədib, şəhər və kəndləri viran qoyub, tarixi, dini və mədəni abidələri məhv edib. Bu vandalizm aktları artıq beynəlxalq ictimaiyyətə faktlarla təqdim olunub. Bunun əksinə olaraq Azərbaycan qısa müddət ərzində Qarabağ və Şərqi Zəngəzurda nəhəng quruculuq və bərpa layihələrinə start verib. Müasir yolların, hava limanlarının, yaşayış komplekslərinin tikilməsi, “ağıllı şəhər” və “ağıllı kənd” konsepsiyalarının tətbiqi, yeni enerji və kommunikasiya infrastrukturunun yaradılması dövlətimizin iqtisadi gücünü, siyasi iradəsini və strateji baxışını nümayiş etdirir”, – deyə deputat diqqətə çatdırıb.

O qeyd edib ki, Prezident İlham Əliyevin çıxışında diqqətçəkən əsas məqamlardan biri də Azərbaycanın Vətən müharibəsi zamanı nümayiş etdirdiyi humanist yanaşma olub. Dövlətimizin başçısının “Onlar bizim şəhərlərimizi, kəndlərimizi “İsgəndər-M”, “Skad” və digər ballistik uzaqmənzilli raketlərlə vururdular, mülki əhaliyə qarşı müharibə aparırdılar. Biz isə ermənilərə məxsus bir dənə də mülki obyekti dağıtmamışdıq” fikirləri Ermənistanın terror və vandalizm siyasəti ilə Azərbaycanın beynəlxalq humanitar hüquqa əsaslanan müharibə strategiyası arasındakı fərqi açıq şəkildə ortaya qoyur. Azərbaycan Ordusu döyüş əməliyyatları zamanı yalnız legitim hərbi hədəfləri zərərsizləşdirib və bununla da müasir müharibə tarixində beynəlxalq hüquqa sadiqliyin nümunəsini nümayiş etdirib.

Deputatın sözlərinə görə, İlham Əliyev regionda yaranan yeni reallıqları təhrif etməyə çalışan qüvvələrin fəaliyyətini kəskin tənqid edib, qərb siyasətçilərinin Ermənistanda özlərini “xilaskar” kimi qələmə vermək cəhdlərinə toxunaraq, Azərbaycanın hər zaman beynəlxalq hüquq normalarına sadiq qaldığını diqqətə çatdırıb. Eyni zamanda, dövlətimizin başçısı sərhəddə yerləşdirilən avropalı müşahidəçilərin fəaliyyəti və Azərbaycanın guya hərbi niyyətləri olması barədə yayılan dezinformasiyaları da kəskin şəkildə ifşa edib, davamlı sülh təşəbbüslərinin əsl müəllifinin Azərbaycan olduğunu bir daha xatırladıb.

“Bu mesajlar bir daha sübut edir ki, Azərbaycan həm döyüş meydanında, həm də diplomatik müstəvidə diktə edən tərəfdir və regionun inkişafı və təhlükəsizliyi məhz Azərbaycanın təklif etdiyi, beynəlxalq hüquqa söykənən ədalətli sülh prinsipləri üzərində qurulmalıdır”, – deyə N.Məhəməliyev əlavə edib.

                                                                                                                               Yeni Balakən

0

Respublika Ağsaqqallar Şurasının IX Qurultayından qayıdan Balakən rayon Ağsaqqallar Şurasının sədri Xəlifə Mirəliyev bir neçə gün əvvəl şəhərdəki qərargahda idarə heyəti ilə iclas keçirərək qurultayın tövsiyələrini bölüşmüş, qarşıda duran vəzifələri müzakirə etmişdi. Bu gün isə iş planına uyğun olaraq nəzərdə tutulan görüşlərdən biri Qaysa kəndində baş tutdu.

Rayon Ağsaqqallar Şurasının sədri Xəlifə Mirəliyev, idarə heyətinin üzvləri Maqsud müəllim, Rəşid müəllim və Meysarat xanım uzun illər təhsil sahəsində xidmət göstərmiş, 42 il Qaysa kənd tam orta məktəbində Azərbaycan dili və ədəbiyyat müəllimi işləmiş, böyük şair Səməd Vurğunun əmizadəsi olan 1936-cı il təvəllüdlü Vəkilova Fəridə Cəlal qızını evində ziyarət etdilər.

90 yaşlı ağbirçək Fəridə müəllimə bu diqqətdən məmnunluğunu bildirərək, şanlı nəslinin sürgünlərə və güllələnmələrə məruz qalan nümayəndələrindən, öz həyat yolunun acı və şirin xatirələrindən səlis və dəqiq danışaraq dinləyənləri sanki tarixi ekskursiyaya apardı. Sözünün sonunda isə gənclərə çox önəmli bir tövsiyə verdi: ailə bağlarını qorumaq, ailə dəyərlərinə sahib çıxmaq. Onun fikrincə, insanın ən əziz sərvəti ailədir və bu kiçik dövləti qorumaq hər kəsin borcudur.

Xəlifə Mirəliyev görüşdə çıxış edərək cənab Prezidentin hər bir Azərbaycan vətəndaşına göstərdiyi diqqət və qayğıdan danışdı. O, dövlət başçısının Qurultaya ünvanladığı təbrik məktubunda ağsaqqallara və ağbirçəklərə verdiyi dəyəri, xoş sözləri görüş iştirakçılarının diqqətinə çatdırdı.

Fəridə xanımın maraqlı həyat yolu və zəngin xatirələri gələcəkdə onun şagirdlərinin qələmindən daha geniş təqdim olunacaq. Rayon Ağsaqqallar Şurasının bu görüşü önəmli bir dəyərə vurğudur ki, ağsaqqallar və ağbirçəklər cəmiyyətin mənəvi dayağı, gənclərin isə ən böyük örnəyidir.

                                                                                                                           Ramazan Abal

0

25 aprel 2026-cı il tarixində Balakən rayonunun Hənifə kənd bələdiyyəsində Ümummilli lider Heydər Əliyevin anadan olmasının 103-cü ildönümünə həsr olunmuş şahmat üzrə həvəskarlar arasında rayon turniri baş tutdu.

Turnir Balakən Rayon İcra Hakimiyyəti, Şəki-Zaqatala Regional Gənclər və İdman İdarəsinin Balakən sektoru, Şəki-Zaqatala Regional Təhsil İdarəsinin Balakən sektoru, Balakən rayon Uşaq-Gənclər İdman Şahmat Məktəbi və Hənifə kənd bələdiyyəsinin birgə təşkilatçılığı ilə keçirildi.

Açılış mərasimində Balakən Rayon İcra Hakimiyyətinin Başçısı cənab Natiq Ağayev çıxış edərək Heydər Əliyevin Azərbaycan xalqının tarixində silinməz iz qoymuş böyük şəxsiyyət olduğunu vurğuladı. O, gənclərin intellektual inkişafına, sağlam rəqabətə və dostluq münasibətlərinə töhfə verən bu kimi yarışların əhəmiyyətini qeyd edərək iştirakçılara uğurlar arzuladı.

Turnirdə müxtəlif yaş qruplarından onlarla şahmatçı iştirak etdi və 4 nominasiya üzrə qaliblər müəyyənləşdi:

• Balacalar arasında
  🥇 Dibirov Elturan
  🥈 Dibirov Canpolad
  🥉 Əlibəşiyeva Aynur
• Gənclər arasında
  🥇 Mehdiyev Şəmsəddin
  🥈 Dibirov Şamil
  🥉 Qaysayev Rəşad
• Böyüklər arasında
  🥇 Alqayev Rəhman
  🥈 Musalimov Telman
  🥉 Musazadə Təbriz
• Gənc qızlar arasında
  🥇 Mehdiyeva Fidan
  🥈 Qunduzova Səma
  🥉 Alqayeva Səbinə

Qaliblər Şəki-Zaqatala Regional Gənclər və İdman İdarəsinin Balakən sektoru tərəfindən diplomlarla, Hənifə kənd bələdiyyəsi tərəfindən isə mükafatlarla təltif olundular.

Bu turniri Balakəndə şahmatın inkişafına, gənclərin intellektual bacarıqlarının artırılmasına və milli-mənəvi dəyərlərin təbliğinə mühüm töhfə kimi dəyərləndirmək olar.

Şahmat fiqurları taxtadan yığışdırılsa da, bu günün xatirəsi yaddaşlardan silinməyəcək. Çünki Balakən gəncləri onu da göstərdilər ki, zəka ilə qurulan hər bir gediş yalnız oyunda deyil, həyatda da qalibiyyət gətirir. Və bəlkə də bu turnirin ən böyük qələbəsi taxtada deyil, gənclərin ürəyində doğulan yeni ümidlərdə idi.

                                                                Yeni Balakən

0

Balakən rayonunda şəhidlərin əziz xatirəsinə həsr edilmiş voleybol üzrə bələdiyyə və təşkilatlar arasında rayon turnirinə start verilib. Yarış Balakən Rayon İcra Hakimiyyəti, Gənclər və İdman, Təhsil sektorları və Rayon Olimpiya İdman Kompleksinin birgə təşkilatçılığı ilə keçirilir.

Açılış mərasimində Balakən Rayon İcra Hakimiyyətinin başçısı Natiq Ağayev, aparat əməkdaşları, hüquq-mühafizə orqanlarının rəhbərləri, şəhid ailələri, qazilər və ictimaiyyət nümayəndələri iştirak ediblər. Tədbir Ulu Öndər Heydər Əliyevin və Vətən uğrunda canlarını fəda etmiş şəhidlərin xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb.

Çıxışında Natiq Ağayev şəhidlərin və şəhid ailələrinin cəmiyyətimiz üçün ən ali dəyər olduğunu vurğulayıb, turnir iştirakçılarına uğurlar arzulayıb. Digər çıxış edənlər – Sarxan Hacıyev, şəhid valideynləri Aynur Bayramova və Şəmsəddin Tuhumov – şəhidlərin qəhrəmanlığının hər birimiz üçün örnək olduğunu, bu turnirin isə onların xatirəsinə olan sonsuz ehtiramın ifadəsi olduğunu bildiriblər.

Turnirin keçirilməsində məqsəd şəhidlərin xatirəsini yad etməklə yanaşı, gənc nəslə qəhrəmanlıq nümunəsini çatdırmaq, sağlam həyat tərzini təbliğ etmək, komanda ruhunu inkişaf etdirmək və iştirakçıların fiziki hazırlığını yüksəltməkdir.

Yarışda ümumilikdə 20 komanda mübarizə aparır. İlk oyun Qazma və Balakən bələdiyyələrinin komandaları arasında keçirilib və Qazma bələdiyyəsi qalib gəlib. Turnir 25 aprel 2026-cı il tarixində yekunlaşacaq.

Gərgin və maraqlı idman mübarizəsi şəraitində keçən oyunlar tamaşaçılar tərəfindən böyük maraqla qarşılanır. Bu turnir həm idman bayramı, həm də şəhidlərimizin ruhuna ehtiramın parlaq nümunəsi kimi yadda qalacaq.

                                                                             Yeni Balakən

1

Balakəndə Şəhid Ailələrinə Ziyarət

Vətən müharibəsi yalnız torpaqlarımızın azadlığı deyil, həm də xalqımızın ruhunun ucalığı idi. Bu müharibədə şəhid olan igidlərimiz öz qanları ilə qəhrəmanlıq səlnaməsi yazdılar. Onların igidliyi dost üçün fəxarət, düşmən üçün qorxu və titrətmədir. Şəhidlərimizin ruhu daim uca tutulur, ailələri isə dövlətin diqqət və qayğısı ilə əhatə olunur.

Balakən rayonunun icra başçısı Natiq Ağayev təyin olunduğu gündən şəhid ailələrinin yanında olmağı özünün ən müqəddəs borcu sayır. Onun hər bir ziyarəti dövlətin böyüklüyünü, xalqın minnətdarlığını ifadə edir. Şəhid ailələrinin evlərinə qədəm basan icra başçısı onların dərdini dinləyir, problemlərinə çarə tapır, qayğılarını bölüşür. Bu görüşlərdə onu adətən DİN Balakən Polis Şöbəsinin və DTX Balakən rayon şöbəsinin rəhbərləri müşayiət edirlər.

Şəhid ailələri bu diqqət və qayğıdan qürur duyur, ölkə rəhbəri Cənab İlham Əliyevə yerdə onun nümayəndəsi Natiq Ağayev vasitəsilə minnətdarlıqlarını bildirirlər. Natiq müəllim səmimiyyəti, insana sayğısı və diqqətcilliyi ilə dövlətin ideal simasını təcəssüm etdirir – arxa-dayaq, haqq-ədalət və son ümid.

İcra başçısının ilk ziyarəti Vətən Müharibəsi Qəhrəmanı Amin Novruzovun ailəsinə oldu. Ardınca əfsanəvi kəşfiyyatçı “Türk Harun” ləqəbli Harun Alqayevin ailəsi, daha sonra iki ayın əsgəri olaraq şəhid olmuş Murtuzov Məhəmmədin Xalatala kəndindəki ailəsi ziyarət edildi. Bu günün görüşü isə “Vur komandir, vur” kəlamı ilə bütün türk dünyasında tanınan qəhrəman tank komandiri Vahid Əlisoltanovun ailəsində baş tutdu.

Bu evlərdə şəhidlərin otaqları bir növ muzeyə çevrilib. Hər bir şəkil, hər bir əşya onların döyüş yolunun canlı şahididir. İcra başçısı bu otaqlarda şəhidlərin ruhu ilə söhbət edir, onların keçdiyi şərəfli yolu yüksək qiymətləndirir, valideynlərinə həm maddi, həm də mənəvi dəstək olur.

Balakənin bütün şəhid ailələrinin öz doğma adamı,ailə üzvi kimi bildikləri Balakən polis şöbəsinin rəisi Çingiz Aslanov da hər görüşdə şəhid ailələrinə sevinc bəxş edir. Onun gətirdiyi hədiyyələr sadəcə bir əşya deyil, bir sevinc, bir ümid, bir diqqət nişanəsidir. Bu qayğı ilə ailələr özlərini tək hiss etmir, dövlətin nəfəsini yanlarında duyurlar.

Balakəndə şəhid ailələrinin ziyarəti yeni başlayıb və mütəmadi olaraq davam edəcək. Bu görüşlər bir daha onu göstərir ki, şəhidlərimizin ruhu daim uca tutulur, onların ailələri isə dövlətin və xalqın diqqət və qayğısı ilə əhatə olunur. Şəhidlərimizin qəhrəmanlıq dastanı gələcək nəsillərə örnək olacaq, onların igidlik səlnaməsi heç vaxt unudulmayacaq.

                                                     Yeni Balakən

0

15 aprel 2026-cı il tarixində Balakən Rayon İcra Hakimiyyətinin inzibati binasında vətəndaşların növbəti qəbulu təşkil olunub. Qəbulda rayon icra hakimiyyətinin başçısı, Aparatın şöbə müdirləri, aidiyyəti idarə, müəssisə və təşkilatların nümayəndələri iştirak ediblər.

Qəbul zamanı vətəndaşların müraciətləri dinlənilib, onların qaldırdıqları məsələlərlə bağlı qanunvericiliyin tələbləri izah olunub. Rayon icra hakimiyyətinin səlahiyyətləri daxilində olan problemlərin həlli üçün yerində tapşırıqlar verilib. Digər mövzularla bağlı isə aidiyyəti dövlət qurumlarının yerli nümayəndələrinə tövsiyələr çatdırılıb.

Qəbulda şəhid ailələri, qazilər və müharibə iştirakçıları növbədənkənar qəbul edilərək onların müraciətlərinə xüsusi diqqət göstərilib. Bu, dövlətin müharibə iştirakçılarına və şəhid ailələrinə göstərdiyi qayğının bariz nümunəsi kimi dəyərləndirilib.

Belə görüşlər vətəndaşların problemlərinin birbaşa dinlənilməsi, onların operativ həllinə şərait yaradılması və dövlət-vətəndaş münasibətlərinin möhkəmləndirilməsi baxımından mühüm əhəmiyyət kəsb edir.

                                                                Yeni Balakən

0

1917-ci ildə baş vermiş Oktyabr inqilabı nəticəsində imperiyanın tərkibində olan ərazilərdə yaranmış qeyri-müəyyən durum və idarəetmədə meydana çıxan boşluqlar ermənilərin Qafqazı, xüsusilə də Azərbaycanı nəzarətə götürmək istəklərini yenidən alovlandırdı. Regionda yaranmış vəziyyətdən istifadə edən erməni daşnakları bolşeviklərin köməkliyi ilə azərbaycanlılara qarşı XX əsrin ən qanlı soyqırımlarından birini həyata keçirməyə başladılar. “Böyük Ermənistan” ideyasının reallaşması istiqamətində həyata keçirilən bu soyqırım, əslində, Azərbaycan xalqını tamamilə məhv etməyə hesablanmışdı. Soyqırımın təkcə Bakı şəhərini deyil, eləcə də Azərbaycanın bölgələrini əhatə etməsi bu qətliamın planlı şəkildə, azərbaycanlıların məhvinə hesablandığını demək üçün əsas verirdi.

1918-ci ilin mart-aprel aylarını əhatə edən bu soyqırım nəticəsində Bakı şəhərində, həmçinin Bakı quberniyasına daxil olan digər şəhər və qəzalarda on minlərlə dinc sakin etnik və dini mənsubiyyətinə görə qətlə yetirildi. İnsanlara xüsusi amansızlıqla işgəncələr verildi. Tarixi faktlara əsasən, 1918-ci ilin 30 mart–3 aprel tarixlərini əhatə edən günlərdə Bakı şəhərində, eləcə də Qarabağ, Naxçıvan, Şamaxı, Quba, Xaçmaz, Lənkəran, Salyan, Zəngəzur, İrəvan və digər ərazilərdə həyata keçirilən soyqırım nəticəsində 30 mindən çox azərbaycanlı qətlə yetirilib. Erməni daşnakları təkcə insanlara qarşı vəhşilik edərək onları qətlə yetirmir, eyni zamanda azərbaycanlılara məxsus tarixi-mədəni abidələri dağıdır, onları məhv edirdilər.

Erməni daşnaklarının bir nömrəli hədəfi isə, heç şübhəsiz ki, Bakı şəhəri idi və Bakını ələ keçirmək ermənilər üçün böyük uduş olardı. Çünki Bakı, bu gün olduğu kimi, XX əsrin əvvəllərində də dünyanın ən mühüm neft mərkəzlərindən biri idi. Şəhərə nəzarət etmək ermənilər üçün həm iqtisadi, həm də siyasi baxımdan böyük üstünlük olardı. Bu səbəbdən Bakı uğrunda mübarizə xüsusi qəddarlıqla aparılırdı.

Mart soyqırımının ən dəhşətli günlərindən biri də Qubada yaşanıb. Quba qırğınları zamanı şəhərdə təxminən 3 minə yaxın, Quba qəzası üzrə isə ümumilikdə 4000 nəfərdən artıq şəxs erməni daşnaklarının qurbanına çevrilib. Soyqırımı nəticəsində Quba qəzasının 122 kəndi tamamilə dağıdılıb, 2750-dən çox ev yandırılıb.

Zaman keçdikcə imperiyanın məkrli planı və tarixi saxtalaşdırmağa yönəlik siyasəti ilə 31 mart – Azərbaycanlıların Soyqırımı Günü xalqın yaddaşından unutdurulmağa çalışılsa da, Azərbaycan müstəqillik əldə etdikdən sonra xalqın tarixinin yenidən öyrənilməsi, başımıza gətirilən müsibətlərin və soyqırımların gələcək nəsillərə çatdırılması tarixi həqiqətlərin üzə çıxmasına şərait yaratdı. Bütün istiqamətlərdə olduğu kimi, 31 mart – Azərbaycanlıların Soyqırımı Gününün də dərindən öyrənilməsi, ona hüquqi-siyasi qiymətin verilməsi və bu soyqırımın beynəlxalq ictimaiyyətə çatdırılması Ulu Öndər Heydər Əliyevin adı və məqsədyönlü fəaliyyəti ilə bağlıdır. 1998-ci il 26 mart tarixində Heydər Əliyevin “Azərbaycanlıların soyqırımı haqqında Fərman”ı bunun bariz sübutudur.

Həmin fərmana əsasən, 31 mart tarixi rəsmi olaraq Azərbaycanlıların Soyqırımı Günü elan edildi. Bu da öz növbəsində 1918-ci il hadisələrinə ilk dəfə dövlət səviyyəsində siyasi-hüquqi qiymətin verilməsi idi. Sözügedən fərman, eyni zamanda, azərbaycanlılara qarşı törədilmiş qırğınların araşdırılmasının dövlət siyasətinin bir hissəsinə çevrilməsi demək idi. Ulu Öndər bu məsələnin yalnız ölkə daxilində deyil, beynəlxalq səviyyədə də tanıdılmasına xüsusi önəm verirdi. Xarici ölkələrdə müxtəlif tədbirlərin və konfransların keçirilməsi, diplomatik nümayəndəliklər vasitəsilə məlumatlandırma işlərinin aparılması məhz bu məqsədə xidmət edirdi.

Heydər Əliyevin müəyyən etdiyi bu siyasət sonrakı illərdə də davam etdirildi. Heydər Əliyevin layiqli davamçısı, cənab İlham Əliyevin mühüm rolu nəticəsində bu günün beynəlxalq səviyyədə tanıdılması və dünya ictimaiyyətinə çatdırılması istiqamətində ötən illər ərzində məqsədyönlü addımlar atılıb. Öz növbəsində Prezident İlham Əliyev də müxtəlif beynəlxalq təşkilatlarda, o cümlədən Birləşmiş Millətlər Təşkilatı, Avropa Şurası və digər qurumlarda çıxışları zamanı 1918-ci il hadisələri barədə məlumat verərək bu faciənin dünya ictimaiyyətinə çatdırılmasına çalışıb. Bu gün cənab İlham Əliyevin rəhbərliyi altında Azərbaycan dövləti tariximizin saxtalaşdırılmasının qarşısını almaq üçün ardıcıl siyasət həyata keçirir. Xarici ölkələrdə konfranslar, sərgilər və təqdimatların təşkil olunması, soyqırımı ilə bağlı materialların müxtəlif dillərdə nəşr edilməsi, Azərbaycan diplomatiyası vasitəsilə müxtəlif ölkələrin parlamentlərində və beynəlxalq təşkilatlarda bu mövzunun gündəmə gətirilməsi İlham Əliyevin xarici siyasət kursunun tərkib hissəsidir.

Nəsib Məhəməliyev

Milli Məclisin deputatı

0

Azərbaycan Respublikasının Prezidenti İlham Əliyevin həftə ərzində əməkhaqqı sisteminin təkmilləşdirilməsi haqqında imzalamış olduğu müvafiq fərman və sərəncamlara yanaşmalar, bu mühüm sənədlərin qiymətləndirilməsi və onların analizi müxtəlif olsa da, dəyişməyən bir reallıq ondan ibarətdir ki, atılan addımlar və qəbul edilən qərarlar ilk növbədə şəffaflığa, dövlət vəsaitlərinin düzgün istiqamətə sərf edilməsinə xidmət edir.

Təsadüfi deyil ki, əksəriyyətin mövqeyi də ondan ibarətdir ki, əməkhaqqı sistemində edilən dəyişikliklər şəffaflığın gücləndirilməsi baxımından xüsusi əhəmiyyətlidir. Heç kimə sirr deyil ki, bəzi hallarda dövlət qulluqçularının maddi təminatının, əməkhaqqının az olması istər-istəməz onlarda qeyri-rəsmi yollarla gəlir əldə etməyə maraq formalaşdırırdı. Bu da öz növbəsində ölkədə korrupsiya və rüşvətxorluq hallarına imkan yaradırdı. Eyni zamanda, dövlət qulluğunda çalışanların hansı formada gəlir əldə etdikləri barədə cəmiyyətdə şəffaf bilgi yox idi. Yeni tətbiq edilən qaydalar və yanaşmalar əsasında artıq bu məlumatsızlıq aradan qalxacaq, şəffaflıq təmin olunacaq.

Ən əsası, yüksək səviyyədə maddi təminatla əhatə olunan dövlət qulluqçusu qeyri-rəsmi gəlir mənbələrinin axtarışına maraq göstərməyəcək ki, bu da nəticə etibarilə korrupsiya və rüşvətxorluq risklərinin minimuma enməsinə gətirib çıxaracaq. Digər tərəfdən, bu həm də dövlət strukturlarında dürüstlük mühitinin formalaşmasına şərait yaradacaq. Məhz bu amil də öz növbəsində vətəndaşların dövlətə olan etimadının artırılması və ictimai münasibətlərdə sağlam mühitin formalaşmasını şərtləndirən başlıca amillərdəndir.

İkinci mühüm məqam ondan ibarətdir ki, əməkhaqqı sisteminin təkmilləşdirilməsi ölkədə kadr bazasının formalaşdırılması və onların ölkədən axınının qarşısının alınmasına xidmət edəcək. Heç kimə sirr deyil ki, yeni tətbiq edilən qaydalar peşəkar kadrların dövlət qulluğuna cəlb olunmasına imkan yaradacaq. Artıq bilikli və bacarıqlı kadrlar maddi təminat üçün özəl sektor deyil, dövlət orqanlarında çalışmağa üstünlük verəcəklər. Çünki əməkhaqqı sistemində tətbiq edilən yeni qaydalar dövlət sektorunu özəl sektorla müqayisədə daha cəlbedici edəcək. Nəticədə, yüksək ixtisaslı mütəxəssislər dövlət qulluğuna maraq göstərəcək ki, bu da daha savadlı kadrlar arasında sağlam rəqabətin yaranmasına yol açacaq. Eyni zamanda, qeyd etdiyimiz kimi, bu, ölkədən kadr axınının qarşısını alacaq. Artıq bacarıqlı və savadlı kadrlar yüksək əməkhaqqı və xoş gələcək üçün Avropaya üz tutmayacaq. Həmin yüksək maddi təminatı dövlət qurumunda çalışmaqla da əldə edə biləcəklər.

Nəhayət, yeni qaydalar həm də dövlət qurumlarında optimallaşma prosesləri ilə sıx bağlıdır. Bir-birini təkrarlayan vəzifələrin ixtisarı dövlət aparatının yükünü azaldacaq. Beləliklə, daha az sayda, lakin daha peşəkar və maddi cəhətdən yaxşı təmin olunmuş kadrlarla daha yüksək nəticələr əldə etmək mümkün olacaq.

Nəsib Məhəməliyev,

Milli Məclisin deputatı

0

Millət vəkili Nəsib Məhəməliyev seçiciləri ilə bayramı qeyd etdi

Balakən rayonunda bayram ab-havası seçicilərlə birgə yaşandı. Hörmətli millət vəkili Nəsib Məhəməliyev bu gün hər iki bayram münasibətilə balakənliləri səmimi şəkildə təbrik edərək, onların sevincini bölüşdü.

Şambul kəndində keçirilən görüşdə millət vəkili seçicilərlə bir araya gələrək onların gündəlik həyatla bağlı problemlərini dinlədi. Vətəndaşların qaldırdığı məsələlərdən dərhal həll olunması mümkün olanlar yerindəcə həll edildi. Zaman tələb edən və aidiyyatı qurumların müdaxiləsini tələb edən problemlərin isə mütləq şəkildə müvafiq instansiyalar qarşısında qaldırılacağına söz verdi.

Görüş zamanı sakinlər millət vəkilinin diqqət və qayğısını yüksək qiymətləndirərək, onların yanında olmasından məmnunluqlarını ifadə etdilər. Bayram günündə seçicilərlə birgə olmaq, onların sevincini paylaşmaq və eyni zamanda problemlərinə həll yolları tapmaq millət vəkili ilə xalq arasında səmimi ünsiyyətin bariz nümunəsi oldu.

                                                                                Yeni Balakən