Yeni Şərif kənd Sənətkarlıq evində tanınmış şair, Azərbaycan Yazıçılar Birliyinin üzvü, AYB-nin fəxri diplomçusu, “Qızıl Qələm” mükafatı laureatı Xutra Ramazanın ad günü münasibətilə “Qızıl Qələm işığında bir şair ömrü” adlı ədəbi-bədii gecə keçirildi.
Tədbirdə Rayon İcra Hakimiyyətinin, Rayon Mədəniyyət Mərkəzinin əməkdaşları, rayon ziyalıları,xaricdə yaşayan iş və sənət adamları, mədəniyyət və incəsənət kollektivləri, geniş əhali kütləsi və qonaqlar iştirak etdilər.
Görüşdə Sənətkarlıq Evinin direktoru Cəmilə Çaxiyeva və bədii rəhbəri Mehriban Rəhmanova şairin həyatı və yaradıcılığı haqqında geniş məruzə etdilər. Qeyd olundu ki, o bir çox mükafatlara, o cümlədən Azərbaycan Xalq Cümhuriyyətinin yubiley medalı və Ulu Öndər Heydər Əliyevin yubiley medallarına, eləcə də Mahmud Kaşqari adına Beynəlxalq Fondun mükafatına layiq görülmüşdür.
Görkəmli söz ustası Ramazan Xutra azərbaycan və mənsub olduğu avar dillərində yazıb-yaradan şair olaraq bu iki xalqın ədəbiyyatının və mədəniyyətinin inkişafı sahəsində mühüm rol oynayır. Şair azərbaycan dilində səkkiz kitab, 20-dən çox poema, uşaq ədəbiyyatı nümunələrinin müəllifidir. Onun Vətən Müharibəsində canlarını fəda etmiş şəhidlərimiz, döyüş meydanlarında hünər göstərmiş qazilərimiz və öz dəstəsi ilə Şuşa qalasına birinci girmiş Vətən Müharibəsi Qəhrəmanı Ramazan Hudulova həsr olunmuş “Qartallar Şuşaya uçur” kitabı böyük rəğbət görmüşdür.
Yeni Şərif kənd tam orta məktəbin şagirdləri Osbanova Əsiyyətin, Mağliyeva Albinanın poemadan söylədikləri parçalar maraqla qarşıladı.
Tədbir iştirakçıları Ramazan Xutranın həyat və yaradıcılığına həsr olunmuş videoçarxa da baxdılar.
Şairin kitabları və aldığı mükafatlarından ibarət sərgi təşkil olunmuşdu.
Tədbirdə Balakən Rayon İcra Hakimiyyətinin nümayəndəsi Fariz Nəcəfov, Qabaqçöl Polis Şöbəsinin Rəisi Vilayət Allahverdiyev,veteran müəllim-Meysarat Qaysayeva, Bakıda Avar Milli Mədəniyyət Mərkəzinin rəhbəri Mamed Nooyev, Yunan – Roma güləşi üzrə Aərbaycanın Əməkdar Məşqçisi İsmayıl Copsiyev, Rayon Mərkəzi Xəstəxanasının şöbə müdiri Rəisət Tınayeva, kimyaçı-alim Abdulla Musayev, Yeni Şərif tam orta məktəbin müəllimi Həvva Anqbazova, Şərif 1 saylı tam orta məktəbin müəllimi Adilə Hacıyeva, ziyalılar: Fatma Xutrayeva, Musa Dibirov, Musa Behalov, Hacı Osbanov, Maqsud Bazarov və başqaları çıxış edərək şairlə olan xatirələrini,əsərləri barədə fikirlərini,onunla bağlı səmimi duyğularını iştirakçılarla bölüşdülər .
Çıxış edənlər şair Xutra Ramazanı ad günü münasibətilə təbrik edərək ona yaradıcılıq uğurları arzuladı, onun çoxşaxəli yaradıcılığı yolundan söz açdılar. Qeyd olundu ki, sənətkarın yaradıcılığı vətən sevgisindən, doğma yurduna bağlılığından, təbiətin gözəlliyindən, bu gözəlliyi özündə yaşayan insanların həyat tərzindən qaynaqlanır. Şairin alovlu vətənpərvər və əsl beynəlmiləlçi olduğu da vurğulandı.
Gecədə qiraətçilər və məktəb şagirdləri şairin şeirlərini səsləndirdilər. Tələbə qız Ayişə Xanayevanın, məktəbli Xacay Əhmədiyevanın ifasında şairin avarca yazdığı şeirləri böyük maraqla qarşılandı.
İncəsənət kollektivlərinin çıxışları, Qabaqçöl qəsəbə Folklor klubunun “Cahan” avar rəqs qrupunun rəqsləri, eləcə də Zaqataladan gəlmiş rəqqasə Zöhrənin çıxışı alqışlarla səbəb oldu.
Tamburçu Şamil Terçiyevin şairin sözlərinə yazılmış mahnıları, Səməd Qoqayevin ifa etdiyi musiqilər gecəyə gözəllik qatdı.
Sonda istedadlı şair Xutra Ramazan tamaşaçılara və Sənətkarlıq Evinin kollektivinə minnətdarlığını bildirdi.
Redaksiyadan: “Yeni Balakən” qəzeti rayon mədəniyyət müəssisələrinin fəaliyyətini həmişə diqqətlə izləyir.Qeyd edək ki, bu sahədə məqsədyönlü işlər görülür. Yeni Şərif kənd Sənətkarlıq evinin kollektivinin fəaliyyəti bu baxımdan fərəh doğurur. Sənətkarlıq Evinin direktoru Cəmilə Çaxiyeva, bədii rəhbəri Mehriban Rəhmanova , Mesed Papaxova işinə yaradıcı yanaşaraq rəngarəng və maraqlı tədbirlər həyata keçirir. Bu işgüzar kollektivə uğurlar diləyirik.
Yeni Balakən
Leave a Reply