Category: Xəbərlər

1

13 may 2026-cı il tarixində Balakən rayon Nizami Gəncəvi adına 1 nömrəli tam orta ümumtəhsil məktəbində riyaziyyat-informatika aylığı çərçivəsində maraqlı və aktual mövzuda açıq dərs keçirildi. Rəqəmsal bacarıqlar fənni üzrə müəllim Sevinc Əlibəyova rus bölməsinin 9 B sinfində “Süni intellekt” mövzusunda dərs təşkil etdi.

Dərs zamanı sinif şagirdi Nurdin Abal süni intellektin səviyyələri, növləri və tətbiq sahələri barədə geniş məlumat verərək, bu texnologiyanın müasir həyatımızdakı roluna toxundu. Onun çıxışı həm sinif yoldaşları, həm də müəllimlər üçün maraqlı və düşündürücü oldu.

Açıq dərsin keçirilməsində əsas məqsəd şagirdlərdə süni intellekt haqqında ilkin biliklərin formalaşdırılması, rəqəmsal texnologiyalara marağın artırılması və müasir texnologiyaların gündəlik həyatda tətbiqi barədə məlumatlandırmanın təmin edilməsi idi.

Bu tədbir məktəbdə riyaziyyat-informatika aylığının əhəmiyyətli bir hissəsi kimi yadda qaldı. Şagirdlərin yeni texnologiyalara marağının artması, onların gələcəkdə bu sahədə daha geniş biliklər qazanmasına zəmin yaradacaq.

Yeni Balakən olaraq biz inanırıq ki, bu cür dərslər gənclərin dünyagörüşünü genişləndirir, onları müasir dövrün çağırışlarına hazırlayır və gələcəyin peşəkar mütəxəssislərinə çevrilməsinə töhfə verir.

                                           Yeni Balakən

2

İtaliya-Azərbaycan Universitetinin yeni istifadəyə verilmiş binasında keçirilən mükafatlandırma mərasimi həm müəllimlər, həm də şagirdlər üçün unudulmaz anlara çevrildi. ADA Universitetinin Kənd təsərrüfatı və qida elmləri fakültəsi (SAFS) tərəfindən təşkil olunan “Azerfoodathon 2026” layihəsi gənclərin kənd təsərrüfatı və qida elmlərinə marağını artırmaq məqsədi daşıyır. Bu il layihədə Balakən rayonunu təmsil edən 10 komanda iştirak edib, onlardan 4-ü qalib adını qazanıb.

🌱 Qazma məktəbinin uğuru

Qazma 1 saylı kənd tam orta məktəbinin komandaları xüsusi fərqlənib. Tamara Mirəliyevanın mentorluq etdiyi “Günəşin dadı” komandası yerli məhsulların sağlam qida kimi təqdim olunması ideyası ilə münsiflərin rəğbətini qazanıb. Şagirdlər öz layihələrində günəş altında yetişən meyvə və tərəvəzlərin dadını, təbiiliyi və sağlamlığa faydasını vurğulayıblar.

Lamiyyə Hacıyevanın rəhbərlik etdiyi “Terra Pulse” komandası isə torpaq enerjisini və ekoloji təmiz istehsalı simvolizə edən layihə ilə çıxış edib. Onların ideyası kənd təsərrüfatında yeni texnologiyaların tətbiqi, torpağın “nəbzini” hiss edərək məhsuldarlığı artırmaq üzərində qurulmuşdu.

 Şagirdlərin hissləri

Mükafatlandırma mərasimində şagirdlərin sevinc dolu baxışları diqqətdən yayınmırdı. “Günəşin dadı” komandasının üzvlərindən biri belə dedi: “Biz kəndimizin meyvələrini dünyaya tanıtmaq istədik. Bu uğur bizim üçün həm qürur, həm də məsuliyyətdir.”

“Terra Pulse” komandasının gənc iştirakçısı isə layihənin gələcəkdə kənd təsərrüfatına real töhfə verəcəyinə inandığını vurğuladı: “Biz torpağın gücünü hiss etdik və onu elm ilə birləşdirdik. Bu mükafat bizi daha da ruhlandırdı.”

🌿 Layihənin əhəmiyyəti

“Azerfoodathon” artıq ənənəyə çevrilib. Hər il regionlardan yüzlərlə gənc bu layihədə iştirak edir, kənd təsərrüfatı və qida elmləri sahəsində yeni ideyalar ortaya qoyur. Bu, həm gənclərin biliklərini artırır, həm də kənd təsərrüfatının gələcək inkişafına stimul verir.

Balakən məktəblilərinin uğuru onu göstərdi ki, bölgənin gəncləri innovativ düşüncə və yaradıcılıqla ölkənin gələcəyinə töhfə verməyə hazırdırlar.

Ramazan Abal

1

Balakən rayonu Azərbaycanın Şimal-Qərbində, Böyük Qafqazın cənub yamaclarında, Alazan–Həftəran vadisində yerləşir. Bu ərazidən Mazım, Katex, Balakən və Alazan kimi iri çaylar keçir. Yazda qarın əriməsi, yay və payızda isə güclü yağışlar nəticəsində bu çaylar tez-tez daşaraq kəndlərə, evlərə, şəxsi təsərrüfatlara və kənd təsərrüfatına ciddi ziyan vurur.

Meliorasiya idarəsi məhdud büdcə və az sayda texnika ilə bu fəlakətlərin qarşısını almağa çalışsa da, mövcud üsullar yetərli olmur. Çay sahillərinin möhkəmləndirilməsi üçün ya armaturlu beton bəndlər tikilir, ya da müvəqqəti val vurulur. Beton bəndlər çox bahalı layihədir, üstəlik korrupsiya riskini artırır. Val isə ömrü qısa olan müvəqqəti həll yoludur.

Halbuki daha ucuz, daha möhkəm və uzunömürlü bir sistem – Qabion bəndlər – mövcuddur.

Qabion bəndlərin mahiyyəti

Qabion bəndlər metal torlardan (sinklənmiş və ya PVC örtüklü setka) hazırlanmış qutuların daşlarla doldurulması yolu ilə qurulur. Bu qurğular:

• Sel və daşqınla mübarizə üçün çay məcralarının tənzimlənməsində,
• İstinad divarları kimi torpaq sürüşmələrinin qarşısının alınmasında,
• Eroziyadan qorunma məqsədilə sahil xəttinin möhkəmləndirilməsində istifadə olunur.

Üstünlükləri

• Çeviklik: Torpağın oturmasına uyğunlaşır, beton bəndlər kimi çatlamır.
• Drenaj: Daşların arası açıq olduğundan suyun keçməsinə imkan verir, arxada təzyiq yaratmır.
• Möhkəmlik: Təbii materiallardan qurulduğu üçün ətraf mühitə uyğunlaşır və zamanla daha da möhkəmlənir.
• İqtisadi səmərəlilik: Beton bəndlərdən qat-qat ucuzdur, yerli imkanlarla həyata keçirilə bilər.

Balakən üçün çıxış yolu

Qabion bəndlərin qurulması Balakəndə yerli resurslarla mümkündür:

• Meliorasiyanın cüzi büdcəsi,
• Bələdiyyələrin kiçik vəsaiti,
• İş adamlarının dəstəyi və ianələr,
• İctimai iməciliklərdə kənd sakinlərinin iştirakı.

Düzgün təbliğat və güclü təşkilatçılıqla bu sistemin tətbiqi Balakənin illərlə davam edən sel və daşqın problemini öz gücümüzlə aradan qaldıra bilər.

P.S.

Mazım çayının Mazımqaray ərazisində hər il daşaraq Balakən torpaqlarını yuyub dağıtması acı mənzərədir. Gürcü tərəfi isə hiyləgər şəkildə Qabion bəndlərdən istifadə edir, çay yatağı bizə tərəf sürüşdükcə sistemi söküb bizim ərazidə yenidən qurur. Beləliklə, hər daşqında metrə-metrə torpağımızı itiririk. Bu, bir daha sübut edir ki, biz də ağıllı və davamlı həll yollarına – Qabion bəndlərə – keçməliyik.

Ramazan Abal

0

Balakən rayonunda Ümummilli Lider Heydər Əliyevin anadan olmasının 103-cü ildönümü münasibətilə keçirilən silsilə tədbirlərdən biri də mayın 10-da Heydər Əliyev adına Mədəniyyət və İstirahət parkında təşkil olunan “Qəlblərdə yaşayan dahi” adlı konsert proqramı oldu. Rayon İcra Hakimiyyəti və Mədəniyyət Mərkəzinin birgə təşkilatçılığı ilə baş tutan tədbir həm mənəvi, həm də mədəni baxımdan yaddaqalan anlarla zəngin idi.

İlk olaraq rayon ictimaiyyəti,rəhbərlik tərəfindən Ulu Öndərin abidəsi ziyarət edildi, önünə gül dəstələri düzüldü. Heydər Əliyevin və şəhidlərimizin əziz xatirəsi bir dəqiqəlik sükutla yad olundu,Azərbaycan Respublikasının Dövlət Himni səsləndirilid. Bu anlar tədbir iştirakçılarına dərin duyğular yaşatdı, xalqın yaddaşında əbədi iz qoymuş dahi liderin xatirəsinə ehtiramın təcəssümü oldu.

Daha sonra Milli Məclisin deputatı Nəsib Məhəməliyev və Rayon Ağsaqqallar Şurasının üzvü Mədət Bağırov çıxış edərək Heydər Əliyevin Azərbaycan dövlətçiliyinin möhkəmləndirilməsi, xalqın rifahı və ölkənin inkişafı naminə gördüyü misilsiz xidmətlərdən danışdılar. Onların sözlərində Ulu Öndərin xalqın qəlbində yaşayan dahi şəxsiyyət olduğu bir daha vurğulandı.

Konsert proqramı isə Balakənin zəngin mədəniyyətini, folklorunu və musiqi irsini bir səhnədə birləşdirdi. Uşaq İncəsənət Məktəbinin Xalq çalğı alətləri orkestri və xor kollektivi, Mədəniyyət Mərkəzinin “Nur” instrumental ansamblı, “Nənələr” ingiloy folklor kollektivi, “Cahan” avar xalq kollektivi, “Qönçə” rəqs qrupu, istedadlı mədəniyyət işçiləri və rayonun tanınmış müğənniləri bir-birindən rəngarəng musiqi nömrələri ilə çıxış edərək tamaşaçılara unudulmaz anlar yaşatdılar.

Balakəndə keçirilən bu konsert bir daha sübut etdi ki, Heydər Əliyev yalnız siyasi lider deyil, həm də milli-mənəvi dəyərlərin qoruyucusu, xalqın qəlbində əbədi yaşayan dahi şəxsiyyətdir. “Qəlblərdə yaşayan dahi” proqramı həm musiqi, həm də ruhani bir bayram kimi yaddaşlarda qalaraq Ulu Öndərə olan sevgi və ehtiramın parlaq nümunəsinə çevrildi.

  Yeni Balakən

0

Balakən rayonunda Ümummilli Lider Heydər Əliyevin anadan olmasının 103-cü ildönümü münasibətilə keçirilən silsilə tədbirlər yaddaşlarda dərin iz buraxır. Bu tədbirlərin ən təsirli məqamlarından biri isə  rayon Mədəniyyət Mərkəzində nümayiş olunan “Qarabağnamə” tamaşası oldu.

İlyas Əfəndiyevin “Hökmdar və qızı” əsasında hazırlanan tamaşa Mədəniyyət Mərkəzinin bədii rəhbəri Zöhrə Bakeyeva tərəfindən səhnələşdirildi. Tamaşadan əvvəl foyedə Heydər Əliyevin həyat və fəaliyyətinə həsr olunmuş kitab sərgisi ziyarət olundu, bu isə tədbirə xüsusi mənəvi rəng qatdı.

Şəki–Zaqatala Regional Mədəniyyət İdarəsinin Balakən üzrə nümayəndəsi Şəfəq Hacıyeva çıxışında Ulu Öndərin Azərbaycan mədəniyyətinə göstərdiyi qayğıdan danışaraq vurğuladı ki, “Qarabağnamə” tamaşasının məhz bu günə həsr olunması təsadüfi deyil, milli-mənəvi dəyərlərimizin yaşadılmasına bir töhfədir.

Səhnədə Arzu Ocaxverdiyev, Qürbət Muradov, Nərgiz Hacıyeva, Nazim Manafov və dram dərnəyinin üzvləri – Kəmalə Qurbanova, Vüqar Mikayılov, Rasim Sərkərov, Rəfail Nəbiyev, Namiq Novruzov, Ramazan Mollaçıyev, Ramazan Abalov, Zamin Yüzbaşiyev, Nani Cavadova və Səadət Cerçiyeva obrazları böyük ustalıqla canlandırdılar. Tamaşaçılar onların ifasını alqışlarla qarşıladı, səhnədəki hər bir söz, hər bir duyğu salonda dərin rəğbət doğurdu.

Tamaşanın sonunda Heydər Əliyevin “Qarabağnamə” haqqında fikirlərinin yer aldığı videoçarx nümayiş olundu. Bu məqam tamaşanın emosional təsirini daha da gücləndirdi, izləyicilərə həm tarixi, həm də mənəvi bir mesaj verdi.

Balakən Rayon İcra Hakimiyyətinin başçısı Natiq Ağayev tədbir iştirakçıları ilə görüşərək onlara fəaliyyətlərində uğurlar arzuladı. Sonda yaradıcı heyətlə xatirə şəkli çəkildi.

              Yeni Balakən

0

Respublika Ağsaqqallar Şurasının IX Qurultayından qayıdan Balakən rayon Ağsaqqallar Şurasının sədri Xəlifə Mirəliyev bir neçə gün əvvəl şəhərdəki qərargahda idarə heyəti ilə iclas keçirərək qurultayın tövsiyələrini bölüşmüş, qarşıda duran vəzifələri müzakirə etmişdi. Bu gün isə iş planına uyğun olaraq nəzərdə tutulan görüşlərdən biri Qaysa kəndində baş tutdu.

Rayon Ağsaqqallar Şurasının sədri Xəlifə Mirəliyev, idarə heyətinin üzvləri Maqsud müəllim, Rəşid müəllim və Meysarat xanım uzun illər təhsil sahəsində xidmət göstərmiş, 42 il Qaysa kənd tam orta məktəbində Azərbaycan dili və ədəbiyyat müəllimi işləmiş, böyük şair Səməd Vurğunun əmizadəsi olan 1936-cı il təvəllüdlü Vəkilova Fəridə Cəlal qızını evində ziyarət etdilər.

90 yaşlı ağbirçək Fəridə müəllimə bu diqqətdən məmnunluğunu bildirərək, şanlı nəslinin sürgünlərə və güllələnmələrə məruz qalan nümayəndələrindən, öz həyat yolunun acı və şirin xatirələrindən səlis və dəqiq danışaraq dinləyənləri sanki tarixi ekskursiyaya apardı. Sözünün sonunda isə gənclərə çox önəmli bir tövsiyə verdi: ailə bağlarını qorumaq, ailə dəyərlərinə sahib çıxmaq. Onun fikrincə, insanın ən əziz sərvəti ailədir və bu kiçik dövləti qorumaq hər kəsin borcudur.

Xəlifə Mirəliyev görüşdə çıxış edərək cənab Prezidentin hər bir Azərbaycan vətəndaşına göstərdiyi diqqət və qayğıdan danışdı. O, dövlət başçısının Qurultaya ünvanladığı təbrik məktubunda ağsaqqallara və ağbirçəklərə verdiyi dəyəri, xoş sözləri görüş iştirakçılarının diqqətinə çatdırdı.

Fəridə xanımın maraqlı həyat yolu və zəngin xatirələri gələcəkdə onun şagirdlərinin qələmindən daha geniş təqdim olunacaq. Rayon Ağsaqqallar Şurasının bu görüşü önəmli bir dəyərə vurğudur ki, ağsaqqallar və ağbirçəklər cəmiyyətin mənəvi dayağı, gənclərin isə ən böyük örnəyidir.

                                                                                                                           Ramazan Abal

0

Balakənli müəllim Günay Sofiyevanın uğurları

Balakən rayonunun Püştətala kəndində anadan olan, uzun illərdir təhsil sahəsində çalışan Sofiyeva Günay Hacısüleyman qızı kimya-biologiya müəllimi kimi həm rayon, həm də respublika miqyasında böyük nailiyyətlər qazanıb.

2001-ci ildən Əli Şirinov adına Qaravəli kənd tam orta məktəbində pedaqoji fəaliyyətə başlayan Günay müəllim şagirdlərinə kimya fənnini sevdirərək onların ali məktəblərə yüksək ballarla qəbul olunmasına, olimpiadalarda və bilik yarışlarında uğurla iştirak etməsinə nail olub.

Onun fəaliyyəti təkcə məktəb daxilində deyil, həm də ölkə miqyasında dəyərləndirilib. Müəllim “Qabaqcıl təhsil işçisi” döş nişanı, Təhsil Nazirliyinin fəxri fərmanları, həmçinin Prezident İlham Əliyevin sərəncamı ilə “Tərəqqi” medalı ilə təltif olunub.

Günay Sofiyeva bir sıra yerli və beynəlxalq layihələrin müəllifi və koordinatoru kimi də tanınır. “İpək ilahəsi”, “Hackathon”, “Balakənli mühəndislər” və “Virtual kimya” layihələri onun təşəbbüskarlığının bariz nümunəsidir. Bu layihələr vasitəsilə şagirdlər virtual laboratoriyalarda təcrübələr apararaq fənni daha dərindən öyrənmək imkanı qazanıblar.

Elm və təhsilə bağlılığı, gənc nəslin inkişafına verdiyi töhfələr Günay müəllimi həm şagirdlərinin, həm də təhsil ictimaiyyətinin sevimlisinə çevirib. Onun fəaliyyəti Balakən rayonunun təhsil tarixində xüsusi iz qoyur.

                                                      Yeni Balakən

0

28 aprel 2026-cı il tarixində Balakən Mərkəzi Kitabxanasında Mədəniyyət Mərkəzinin birgə təşkilatçılığı ilə Azərbaycan Yazıçılar Birliyinin üzvü, “Qızıl qələm” mükafatı laureatı, tanınmış şair Ramazan Xutra ilə görüş keçirildi.

Tədbirdə Rayon İcra Hakimiyyətinin, Mədəniyyət Mərkəzinin nümayəndələri, Balakən yazarları, Zaqataladan şairin sənət dostları, rayon ziyalıları, şəhid anaları, mədəniyyət işçiləri, kitabxana əməkdaşları, qiraət ustaları və gənclər iştirak etdilər.

Görüşdə şairin həyat və yaradıcılığı haqqında ətraflı məlumat verildi, onun şeirləri və hekayələri səsləndirildi. İştirakçılar Ramazan Xutranın sənət yolunu əks etdirən videoçarxa da baxdılar. Tədbirin ən yaddaqalan məqamlarından biri isə şairin yeni çapdan çıxmış kitabının ilk dəfə oxuculara təqdim olunması oldu.

Bu görüş Balakənin ədəbi-mədəni həyatında əlamətdar hadisəyə çevrildi. Şairin yaradıcılığına göstərilən maraq, onun söz dünyasının gənclərə və oxuculara çatdırılması, həmçinin şəhid analarının və ziyalıların iştirakı tədbirə xüsusi mənəvi dəyər qatdı.

                                                                       Yeni Balakən

0

Balakən rayon Polis Şöbəsinin əməkdaşları tərəfindən keçirilən profilaktiki nəzarət tədbirləri zamanı yerin təkindən istifadə qaydalarının pozulması hallarının qarşısının alınması məqsədi ilə reydlər keçirilmiş, aparılmış yoxlamalar zamanı 29.04.2026-cı il tarixdə gecə saat 01 radələrində, “Balakən çayı”nın rayonun Hənifə kəndi ərazisindən keçən hissəsindən çay qumunu daşıyaraq inzibati xəta törətmiş aşağıda adları qeyd olunan:

1. 22.03.1981-ci il təvəllüdlü Balakən rayonu Qullar kənd sakini Saramanov Aydın Nasrullah oğlu,

2. 04.01.1974-cü il təvəllüdlü Balakən rayonu Hənifə kənd sakini Babayev İlham İsrafil oğlu aşkar olunmuşdur.

Onların hər birinin barələrində Azərbaycan Respublikası İnzibati Xətalar Məcəlləsinin 243.0.1-ci (yerin təkindən istifadə qaydalarının pozulması) maddəsi ilə inzibati xəta haqqında protokollar tərtib olunaraq baxılması üçün aidiyyəti üzrə 7 saylı Regional Ekologiya və Təbii Sərvətlər İdarəsinə göndərilmişdir.

Yeni Balakən

0

25 aprel 2026-cı il tarixində Balakən rayonunun Hənifə kənd bələdiyyəsində Ümummilli lider Heydər Əliyevin anadan olmasının 103-cü ildönümünə həsr olunmuş şahmat üzrə həvəskarlar arasında rayon turniri baş tutdu.

Turnir Balakən Rayon İcra Hakimiyyəti, Şəki-Zaqatala Regional Gənclər və İdman İdarəsinin Balakən sektoru, Şəki-Zaqatala Regional Təhsil İdarəsinin Balakən sektoru, Balakən rayon Uşaq-Gənclər İdman Şahmat Məktəbi və Hənifə kənd bələdiyyəsinin birgə təşkilatçılığı ilə keçirildi.

Açılış mərasimində Balakən Rayon İcra Hakimiyyətinin Başçısı cənab Natiq Ağayev çıxış edərək Heydər Əliyevin Azərbaycan xalqının tarixində silinməz iz qoymuş böyük şəxsiyyət olduğunu vurğuladı. O, gənclərin intellektual inkişafına, sağlam rəqabətə və dostluq münasibətlərinə töhfə verən bu kimi yarışların əhəmiyyətini qeyd edərək iştirakçılara uğurlar arzuladı.

Turnirdə müxtəlif yaş qruplarından onlarla şahmatçı iştirak etdi və 4 nominasiya üzrə qaliblər müəyyənləşdi:

• Balacalar arasında
  🥇 Dibirov Elturan
  🥈 Dibirov Canpolad
  🥉 Əlibəşiyeva Aynur
• Gənclər arasında
  🥇 Mehdiyev Şəmsəddin
  🥈 Dibirov Şamil
  🥉 Qaysayev Rəşad
• Böyüklər arasında
  🥇 Alqayev Rəhman
  🥈 Musalimov Telman
  🥉 Musazadə Təbriz
• Gənc qızlar arasında
  🥇 Mehdiyeva Fidan
  🥈 Qunduzova Səma
  🥉 Alqayeva Səbinə

Qaliblər Şəki-Zaqatala Regional Gənclər və İdman İdarəsinin Balakən sektoru tərəfindən diplomlarla, Hənifə kənd bələdiyyəsi tərəfindən isə mükafatlarla təltif olundular.

Bu turniri Balakəndə şahmatın inkişafına, gənclərin intellektual bacarıqlarının artırılmasına və milli-mənəvi dəyərlərin təbliğinə mühüm töhfə kimi dəyərləndirmək olar.

Şahmat fiqurları taxtadan yığışdırılsa da, bu günün xatirəsi yaddaşlardan silinməyəcək. Çünki Balakən gəncləri onu da göstərdilər ki, zəka ilə qurulan hər bir gediş yalnız oyunda deyil, həyatda da qalibiyyət gətirir. Və bəlkə də bu turnirin ən böyük qələbəsi taxtada deyil, gənclərin ürəyində doğulan yeni ümidlərdə idi.

                                                                Yeni Balakən