Balakən rayonunun zəngin təbii, kənd təsərrüfatı, tarixi və mədəni potensialından səmərəli istifadə edilməsi məqsədilə “Balakən Aqroturizm Mərkəzi” layihəsi hazırlanaraq təqdim olunur.
Balakən rayonunun zəngin təbiəti, kənd təsərrüfatı ənənələri və milli-mədəni dəyərləri yeni bir layihə ilə daha geniş auditoriyaya təqdim olunur. “Balakən Aqroturizm Mərkəzi” layihəsi bölgənin turizm imkanlarını inkişaf etdirmək, kənd təsərrüfatı məhsullarını və milli mətbəxi tanıtmaq, kənd yerlərində yeni gəlir və məşğulluq imkanları yaratmaq məqsədi daşıyır.
Rayon rəhbəri Natiq Ağayevin sahibkarlarla görüşləri, istehsal sahələrinə səfərləri və motivasiyaedici çıxışları bu təşəbbüsün reallığa çevrilməsinə güclü dəstək verir. Onun vizionu sahibkarların fəaliyyətinə yeni nəfəs gətirir, kənd təsərrüfatı ilə turizmin sintezini mümkün edir.
Layihənin ilk nümunələrindən biri Qullar kəndində iş adamı Məhəmməd Bazarovun idarəçiliyindəki intensiv bağçılıq təsərrüfatıdır. 7 hektarlıq ərazidə 10 mindən çox ağac, 36-dan çox sort meyvə yetişdirilir. Burada alma, armud, şaftalı, gilas, gavalı və ərik kimi məhsuldar sortlar həm yerli bazara, həm də ixrac üçün hazırlanır. Təsərrüfatın özəlliyi ondadır ki, qonaqlar bağa gələrək meyvəni ağacdan dərir, bazar qiymətindən daha münasib qiymətə əldə edir. Bu, həm kənd təsərrüfatı, həm də turizm üçün unikal modeldir – “həm ticarət, həm də ziyarət”.
“Balakən Aqroturizm Mərkəzi” çərçivəsində turist marşrutlarının hazırlanması, kənd təsərrüfatı təsərrüfatlarına səfərlər, milli mətbəxin təqdimatı, tarixi və mədəni abidələrin tanıdılması nəzərdə tutulur. Layihə həmçinin ekoturizm və kənd turizmi istiqamətində yeni marşrutların yaradılmasını, maarifləndirici tədbirlərin və təlimlərin keçirilməsini planlaşdırır. Bu təşəbbüs yerli sahibkarların, gənclərin və ictimaiyyətin əməkdaşlığını gücləndirəcək, Balakənin turizm xəritəsində yeni bir səhifə açacaq.
Balakən Aqroturizm Mərkəzi – təbiəti, kənd həyatını, milli mətbəxi və yerli dəyərləri bir araya gətirən yeni inkişaf təşəbbüsüdür. Bu layihə bölgənin turizm potensialını daha geniş tanıdacaq, kənd əhalisinə yeni iş və gəlir imkanları yaradacaq, Balakəni isə respublikada aqroturizmin mərkəzinə çevirəcək.
“Balakən Aqroturizm Mərkəzi” – təbiət, kənd həyatı, milli mətbəx və yerli dəyərləri bir turizm məkanında birləşdirən yeni inkişaf təşəbbüsüdür.
Ramazan Abal
“Yeni Balakən” qəzeti üçün
Leave a Reply