Yeni Balakən qəzeti

0

Bu gün böyük sevinc və qürur hissi yaşayırıq. Gəncimiz Cerçiyeva Səadət Rusiya Federasiyasının Adıgey Respublikasında keçirilən beynəlxalq “Adıgeyin Ulduzları” festival-müsabiqəsində Azərbaycanı layiqincə təmsil edərək I dərəcəli lauryatı adına layiq görülmüşdür.Bu qələbə təkcə Səadətin deyil, onun ailəsinin, müəllimlərinin, məktəbinin və bütövlükdə Azərbaycanımızın uğurudur. Səadət öz istedadı, zəhməti, əzmkarlığı və vətən sevgisi ilə göstərdi ki, Azərbaycan gəncləri dünyanın hər yerində uğur qazana və ölkəmizi layiqincə təmsil edə bilirlər.

 İki il əvvəl bu layihəyə qatılaraq “Şuşa, sən qayıtdın” şeiri ilə vətənpərvərliyini nümayiş etdirən və II yerə layiq görülən Səadət həmin gündən özünə bir məqsəd qoymuşdu: “Mən Azərbaycanıma birincilik gətirməliyəm!” Bu il o, daha böyük əzm və inamla yenidən müsabiqəyə qatıldı. “Qələbə dastanı” şeiri ilə çıxış edən Səadət I yerə layiq görülərək hamımızı sonsuz sevincə qərq etdi. Qələbə xəbərini alanda sevinc göz yaşları içində: “Mən birincilik gətirdim!” – dedi və əlavə etdi: “Söz verirəm ki, Vətənimi hər zaman, hər yerdə layiqincə təmsil edəcəyəm.”

Bu gənc qızın qəlbindəki Vətən sevgisi həqiqətən sonsuzdur. Onun bu sözləri və uğuru hər birimiz üçün böyük qürur mənbəyidir. Səadət uzaq Rusiyada Azərbaycan bayrağını yüksəklərdə dalğalandıraraq, “Biz qalib ölkəyik, qalib ölkənin qalib gəncləriyik!” sözlərini qürurla səsləndirdi və qazandığı qələbəni xalqımıza ərməğan etdi.

Əziz Səadət, sənin uğurun təkcə öz uğurun deyil, bütün Azərbaycan gənclərinin uğurudur. Yolun daim açıq, zirvələrin daha uca olsun! Vətəninə olan sevgin və əzmin səni daha böyük qələbələrə aparsın!

                                       Yeni Balakən

0

İyunun 12-də Balakən rayon Mədəniyyət Mərkəzində musiqi və rəqs bayramı yaşandı. Fikrət Əmirov adına Əməkdar kollektiv Azərbaycan Dövlət Mahnı və Rəqs Ansamblı regionlarda mədəniyyətin əlçatanlığının artırılması proqramı çərçivəsində möhtəşəm qastrol konserti ilə çıxış etdi.

Azərbaycan Respublikasının Mədəniyyət Nazirliyinin təşəbbüsü və təşkilatçılığı ilə həyata keçirilən bu layihə “Azərbaycan Mədəniyyəti – 2040” Konsepsiyasının prioritet istiqamətlərinə uyğun olaraq, ölkə üzrə vahid mədəni ekosistemin formalaşdırılması və regionlarda mədəni həyatın zənginləşdirilməsini hədəfləyir.

Konsertdə Balakən Rayon İcra Hakimiyyətinin nümayəndələri, müxtəlif idarə və müəssisələrin əməkdaşları, şəhid ailələrinin üzvləri və ictimaiyyət iştirak edirdi. Ansamblın ifasında səslənən milli musiqi inciləri, xalq mahnıları və rəqslər tamaşaçılara unudulmaz anlar yaşatdı, zalda alqışlar uzun sürə davam etdi.

Bu qastrol konserti bir daha sübut etdi ki, Azərbaycan mədəniyyəti yalnız paytaxtda deyil, regionlarda da yüksək səviyyədə təqdim olunur. Balakənlilər üçün bu musiqi axşamı həm milli irsin təntənəsi, həm də mədəniyyətin birləşdirici gücünün parlaq nümunəsi oldu.

Yeni Balakən

0

Balakən rayonunda barama istehsalı sahəsində qarşıya qoyulmuş vəzifələrin yerinə yetirilməsi məqsədilə Balakən Dövlət Aqrar İnkişaf Mərkəzi tərəfindən 600 qutu ipəkqurdu 97 kümçüyə paylanılmış, həmçinin kümçülərin “Azərİpək” MMC ilə müqavilə bağlanılması təmin olunmuşdur. Azərbaycanda yaş barama istehsalı dövlət tərəfindən subsidiyalaşdırılır. Kümçülər yaş baramanı kiloqramı 5 manatdan “Azərİpək” MMC-yə təhvil verirlər. Dövlət isə əlavə olaraq hər kiloqram yaş barama istehsalına görə fermerlərə 6 manat subsidiya ödəyir. Nəticədə fermer təhvil verdiyi hər kiloqram yaş baramaya görə ümumilikdə 11 manat gəlir əldə edir.
Azərbaycanda, o cümlədən Balakən rayonunda yaş barama tədarükünə start verilmişdir. Rayon rəhbəri Natiq Ağayev bu gün tədarük məntəqəsində gələrək kümçülərlə görüşmüş,gətirdikləri baramaya baxıb məhsulla tanış olub.Kümçüləri dinləyərək problemləri ilə maraqlandı.Onları təbrik edərək,zəhmətlərinin bəhrəsinin bərəkətli olmasını,gələn il daha yüksək nəticə göstərərək bundan da artıq bol qazanc götürmələrini arzuladı.Təhvil prosesini yerində izləyərək,tapşırıq və tövsiyyələrini verdi.Kümçülər tərəfindən 12.06.2026-cı il tarixədək tədarük məntəqəsinə 1799,3 ton yaş barama təhvil verilmişdir. Cari ildə Balakən rayonunda 24,0 ton barama istehsalı nəzərdə tutulur.
  Elvin Səmədov                   
Balakən Dövlət Aqrar İnkişaf Mərkəzi

0

“Qurtuluşdan Zəfərə” – Balakəndə Milli Qurtuluş Gününə həsr olunmuş konfrans

Balakən rayonunda 15 İyun – Milli Qurtuluş Gününə həsr olunmuş silsilə tədbirlər davam edir. Dünən Balakən Uşaq İncəsənət Məktəbində keçirilən tədbirin ardınca bu gün Yeni Azərbaycan Partiyası (YAP) Balakən rayon təşkilatının inzibati binasında “Qurtuluşdan Zəfərə” adlı konfrans təşkil olunub. Tədbir YAP Balakən rayon təşkilatı, İncəsənət məktəbi və Balakən Rayon İcra Hakimiyyətinin birgə təşəbbüsü ilə baş tutub.

Konfransda Balakən Rayon İcra Hakimiyyətinin başçısı Natiq Ağayev, YAP rayon təşkilatının sədri Azad Balayev, idarə və müəssisələrin əməkdaşları, şəhid ailələrinin üzvləri, qazilər, partiya fəalları və ictimaiyyət nümayəndələri iştirak ediblər. Əvvəlcə Ulu Öndər Heydər Əliyevin və Vətən uğrunda canından keçmiş şəhidlərin əziz xatirəsi bir dəqiqəlik sükutla yad olunub, Azərbaycan Respublikasının Dövlət Himni səsləndirilib.

Konfransda çıxış edən YAP Balakən rayon təşkilatının sədri Azad Balayev Milli Qurtuluş Gününün tarixi əhəmiyyətindən bəhs edərək bildirib ki, bu gün Azərbaycan xalqının yaddaşına dövlətçiliyin qorunması, sabitliyin bərpası və inkişafın başlanğıcı kimi əbədi həkk olunub. O vurğulayıb ki, Ulu Öndər Heydər Əliyevin müdrik siyasəti nəticəsində ölkəmiz müstəqilliyini qoruyaraq güclü dövlətə çevrilib, Prezident İlham Əliyevin rəhbərliyi ilə isə bu siyasət müasir çağırışlara uyğun şəkildə davam etdirilərək Azərbaycanı zəfərə aparıb. “Qurtuluş missiyası ilə xalqımızı məhv olmaq təhlükəsindən xilas edən Heydər Əliyevin yolunu Müzəffər Ali Baş Komandan İlham Əliyev 44 günlük Vətən müharibəsində torpaqlarımızı işğaldan azad etməklə zəfərlə tamamladı,” – deyə Azad Balayev qeyd edib.

Tədbirdə çıxış edən rayon Ağsaqqallar Şurasının üzvü Meysarat Qaysayeva, Hənifə kənd tam orta məktəbinin direktoru Cavanşir Alqayev, Qarabağ Müharibəsi Əlilləri, Veteranları və Şəhid Ailələri İctimai Birliyi rayon şöbəsinin sədri Cavanşir İsmayılov, hərbi jurnalist Şaban Daşdəmirov və Gənclər Evi Sosial Xidmət Müəssisəsinin əməkdaşı Fuad Mikayılov Milli Qurtuluş Gününün xalqımızın taleyində oynadığı mühüm rolu, Ulu Öndərin dövlətçiliyin möhkəmlənməsindəki xidmətlərini xüsusi vurğulayıblar.

Konfrans çərçivəsində rayonun ictimai-siyasi həyatında fəallığı ilə seçilən partiya veteranlarına hədiyyələr təqdim olunub, yeni qəbul olunmuş üzvlərə isə partiya vəsiqələri verilib. Sonda Yeni Azərbaycan Partiyasının himni səsləndirilib.

Yeni Balakən

0

Bir qəza baş vermədən öncə

Balakən şəhəri, akademik Həsən Əliyev küçəsindəki bu işıq dirəyi vidalaşmaq istəyir elektrik şəbəkəsi ilə.Sabah bəlkə ona bir “vida” mərasimi keçirəsiniz..Nə qədər ki, o dirək kiminsə başına,evinin üstünə düşməyib,kimisə bu həyatla vidalaşdırmayıb.Dirək can üstədir,yıxılmaq istəyir sadəcə bağlandığı naqillərin hesabına ayaqda dururmuş kimi görünür.Nə qədər ki,bir hadisə baş verməyib,buna cavabdehlər Allah eləməmiş bir bədbəxt hadisənin idari məsuliyyətiylə mühakimə olunmayıblar…

                                                            Yeni Balakən

0

Ölkə rəhbəri İlham Əliyevin həyata keçirdiyi sosial siyasət nəticəsində müharibə veteranlarının, əlillərin və şəhid ailələrinin sosial müdafiəsi daim gücləndirilir. Prezidentin imzaladığı fərman və sərəncamlar bu kateqoriyadan olan insanların həyat şəraitinin yaxşılaşdırılmasına xidmət edir…

Şəhidlərin xatirəsinin əbədiləşdirilməsi və ailələrinin hörmətlə yad edilməsi məqsədilə birinci Qarabağ müharibəsində şəhid olmuş Qərbi Azərbaycan kökənli Pənahov Pənah Məhəmməd oğlunun ailəsi ziyarət edilib.

Ziyarətdə Qərbi Azərbaycan İcmasının Balakən rayon nümayəndəsi Yaşar Məmmədov, Balakən şəhər nümayəndəsi, İncəsənət məktəbinin direktoru Arifə Tağıyeva, Gərəkli kənd Bələdiyyəsinin sədri Ceyran Tağıyeva və “Yeni Balakən” qəzetinin redaktoru Ramazan Abalov iştirak ediblər.

Görüş zamanı şəhidin anası Nəcibə Pənahova oğlu haqqında xatirələrini bölüşərək, onun 1993-cü ildə hərbi xidmətə çağırıldığını, xidmət dövründə göstərdiyi igidlik və qəhrəmanlıqları, 1994-cü ilin fevral ayında Cəbrayıl rayonunun Cocuq Mərcanlı kəndində döyüş zamanı düşmən tərəfindən vurularaq şəhid olduğunu qeyd edib.

Şəhid Pənahov Pənah hörmət və ehtiramla yad olunub. Ailə üzvləri göstərilən yüksək diqqət və qayğıya görə Prezident, Müzəffər Ali Baş Komandan İlham Əliyevə və Birinci vitse-prezident Mehriban Əliyevaya minnətdarlıqlarını ifadə ediblər.

                                Yeni Balakən

0

Su təsərrüfatı və meliorasiya işçilərinin peşə bayramı münasibətilə

5 iyun Azərbaycanda su təsərrüfatı və meliorasiya işçilərinin peşə bayramı günü kimi qeyd olunur. Bu gün ölkənin su ehtiyatlarının səmərəli idarə olunması, meliorasiya və irriqasiya sistemlərinin inkişafı, içməli su təminatı və ekoloji tarazlığın qorunması istiqamətində çalışan mütəxəssislərin zəhmətinə verilən dəyərin bariz nümunəsidir. Onların fədakar fəaliyyəti kənd təsərrüfatının inkişafında, əhalinin dayanıqlı su ilə təmin olunmasında və təbiətin mühafizəsində mühüm rol oynayır.

Bu əlamətdar gün münasibətilə Su Ehtiyatları Agentliyi İşçilərinin Birləşmiş Həmkarlar İttifaqı Komitəsi və Balakən Suvarma Sistemləri İstismar İdarəsi tərəfindən idarədə çalışan bir qrup əməkdaş Təşəkkürnamə və Fəxri Fərmanlarla təltif olunmuşdur. Bu addım həm onların peşəkar fəaliyyətinə verilən yüksək qiymətin göstəricisi, həm də gənc mütəxəssislərə stimul verən nümunədir.

Tədbir çərçivəsində kollektiv şəkildə Ulu Öndər Heydər Əliyevin abidəsi önünə gül dəstələri qoyulmuş, daha sonra Şəhidlər Xiyabanı ziyarət edilmişdir. Bu mərasim həm milli yaddaşın qorunmasına, həm də gənc nəsildə vətənpərvərlik ruhunun güclənməsinə xidmət edir. Ulu Öndərin su təsərrüfatı sahəsinə verdiyi önəm və bu istiqamətdə həyata keçirilən genişmiqyaslı layihələr bu gün də öz bəhrəsini verməkdədir.

Su təsərrüfatı və meliorasiya işçilərinin peşə bayramı yalnız bir peşə sahəsinin qeyd günü deyil, həm də ölkənin sosial-iqtisadi inkişafında mühüm rol oynayan insanların əməyinə hörmətin təcəssümüdür. Onların zəhməti sayəsində kənd təsərrüfatı məhsuldarlığı artır, içməli su təminatı yaxşılaşır, ekoloji tarazlıq qorunur. Bu səbəbdən də hər bir əməkdaşın fədakarlığı cəmiyyət tərəfindən yüksək qiymətləndirilməlidir.

Sonda bütün su təsərrüfatı və meliorasiya işçilərini peşə bayramı münasibətilə təbrik edir, onlara sağlamlıq, uğurlar və yeni nailiyyətlər arzulayırıq.

                                                                                               Yeni Balakən

0

Balakən rayonunun Roçəhməd kəndində keçirilən səyyar qəbul sadəcə bir görüş deyildi — bu, rəhbərlə xalq arasında səmimi ünsiyyətin, qarşılıqlı hörmətin və etimadın bariz nümunəsinə çevrildi. Rayon rəhbəri Natiq Ağayev kənd sakinlərini dinləyərək onların gündəlik həyatına dair səsləndirdikləri məsələlərə diqqətlə yanaşdı, bir çox problemlərin həllinə dərhal köklü çözüm gətirdi.

Roçəhməd kənd sakinlərinin fəallığı, açıq sözlülüyü və rayon rəhbərinə olan inamı tədbirin ruhunu daha da gücləndirdi. Onların fikirlərində bir məqam aydın görünürdü: rəhbərin fəaliyyəti sadəcə idarəçilik deyil, həm də insanlıq, dövlət adamlığı və vətəndaşa qayğı üzərində qurulub.

Bu təəssüratın ən poetik ifadəsini isə kəndin tanınmış pedaqoqu, məktəb direktoru Gülbiçə Hüseynova səsləndirdi. O, tədbirin sonunda söz alaraq rəhbərə həsr etdiyi şeiri oxudu. Hüseynovanın misralarında Natiq Ağayevin obrazı “işıq adam”, “mayak adam”, “dayaq adam” kimi təqdim olunurdu. Bu poetik kəlamlar sadəcə bir müəllimin duyğuları deyildi — kəndin, xalqın rəhbərə olan sevgisinin səmimi ifadəsi idi.

Şeirində “Vətənə xidmətdən heç yorulmayın” deyən müəllim, əslində bütün Roçəhməd kəndinin dilini ifadə edirdi. Çünki xalqın sevgisini qazanmaq hər rəhbərin bacardığı iş deyil. Bu sevgi yalnız səmimiyyət, dürüstlük və xalqa bağlılıqla mümkündür.

Tədbir bir daha göstərdi ki, Balakən rayonunda rəhbərlə xalq arasında etimad körpüsü möhkəmlənir. İnsanların dilindən səslənən minnətdarlıq, şeirə çevrilən duyğular isə bu körpünün ən gözəl bəzəyidir.

       ADAM

Vətənə xidmətdən heç yorulmayın,

Əqidəsi parlaq nur,işıq adam.

Qayğı da,inam da güvəndən gəlir,

Xalqına,elinə  ay aşıq Adam.

Zirvələrə yollar dağlardan keçir,

Həqiqət donunu haqq özü biçir.

Doğrunu,düzlüyü əyridən seçir

Ümmanda görünən ey mayak Adam.

Yaxşı əməlinlə bir iz qoyaraq,

Gəlsin ünvanına xoş söz,xoş soraq.

Adına and içsin bu yurd,bu  torpaq,

Hər oğul qızına ey dayaq Adam.

Bu çətin  işində durub şərəflə,

Hər  günün,hər anın keçsin zəfərlə.

Anam təki  doğma Balakənimlə,

Fəxr edək bir büsat yarat ey  Adam.

                                  Gülbiçə Hüseynova                                                       

Yeni Balakən

0

İyunun 4-də Balakən şəhər Mədəniyyət Mərkəzində uşaqların sevinci, musiqi və rəqs ahəngi ilə birləşən bayram tədbiri keçirildi. “Dünyanın hər yerində xoşbəxt olsun uşaqlar” adlı tədbir Balakən Rayon Mədəniyyət Mərkəzi və Şəki-Zaqatala Regional Təhsil İdarəsinin birgə təşkilatçılığı ilə baş tutdu. Tədbirdə rayonun məktəbəqədər təhsil müəssisələrinin balaca fidanları, valideynlər, müəllimlər və ictimaiyyət nümayəndələri iştirak etdilər.

Səhnə və zal şarlarla, güllərlə bəzədilmişdi, uşaqların bayram ovqatını daha da artıran ab-hava yaradılmışdı. Azərbaycan Respublikasının Dövlət Himninin səsləndirilməsi və vətən uğrunda canlarından keçmiş şəhidlərimizin xatirəsi bir dəqiqəlik sükutla anılaraq başlayan tədbirdə  “Pöhrə” Təlim və İnkişaf Mərkəzinin təsisçisi  Züleyxa Dibirova qonaqları salamlayaraq çıxışa başladı.Züleyxa xanım  1 İyun – Uşaqların Beynəlxalq Müdafiəsi Günü və 15 İyun – Milli Qurtuluş Gününün əhəmiyyəti barədə danışdı, Ulu Öndər Heydər Əliyevin uşaqlara göstərdiyi qayğı və sevgidən söz açdı..

Balakən rayon təhsil sektorunun müdiri Mehparə Mirzəyeva çıxışında uşaqların sağlam böyüməsi, keyfiyyətli təhsil alması və xoşbəxt gələcəyi naminə görülən işləri vurğuladı.

Daha sonra musiqili-əyləncəli proqram təqdim olundu. Balakən şəhər 1, 2, 3 və 4 nömrəli körpələr evi-uşaq bağçaları, “Pöhrə” Təlim və İnkişaf Mərkəzi, kənd bağçaları və Mədəniyyət Mərkəzinin rəqs dərnəyi bir-birindən maraqlı səhnəciklər, mahnılar və rəqslərlə çıxış etdilər. “Bizim şəhərimiz bizim gələcəyimizdir!”, “Biz ki varıq, Azərbaycanlıyıq”, “Sülh” kompozisiyası, “Pərilər ölkəsi”, “Birlik”, “Bakı, sabahın xeyir” kimi səhnələr uşaqların arzularını, vətən sevgisini və sülh istəklərini ifadə etdi.

Tədbir boyu “Qıtqılıda”, “Papatya”, “Bonbon” kimi rəqslər, moda nümayişi, flaşmoblar və mahnılar tamaşaçılara bayram ovqatı bəxş etdi. Palyaço və qurbağa kimi personajların çıxışları isə uşaqların sevincini daha da artırdı.

Sonda tədbir “Dünyanın hər yerində xoşbəxt olsun uşaqlar” arzusu ilə yekunlaşdı. Balakəndə keçirilən bu bayram uşaqların istedadını, yaradıcılığını və xoşbəxt gələcəyə olan ümidlərini bir daha nümayiş etdirdi.

P.S. “Pöhrə” Təlim və İnkişaf Mərkəzi yaşca və tutumca digər iştirakçıların ən kiçiyi olsa da,seçdiyi mövzu,bu mövzudakı səhnə çıxışı,tamaşası,performansı digərlərindən seçilirdi.

                                                                                                                Yeni Balakən

0

Hörmətli Namiq müəllim,

Bu gün sizin üçün xüsusi gündür – həyatınıza yeni bir yaş, yeni bir mərhələ yazılır. Siz Balakənin mədəniyyət həyatında yalnız bir musiqiçi və ansambl rəhbəri deyilsiniz, həm də hər tədbirin səsini, ruhunu kütləyə çatdıran, görünməyən qəhrəman kimi yaddaşlarda qalırsınız. “NUR” instrumental ansamblının rəhbəri olaraq musiqiyə verdiyiniz dəyər, Balakən Mədəniyyət Mərkəzində akustika və səs rejissoru kimi gördüyünüz işlər, hər bir iclasda, mərasimdə pultun arxasında səsi incəliklə idarə etməyiniz – bunlar hamısı sizin peşəkarlığınızın və fədakarlığınızın göstəricisidir.

Sizin barmaq işarənizlə yüksələn səs, insanların qəlbinə yol tapır. Şəkillərinizdəki gülərüz, dostluq dolu baxışlar bir daha sübut edir ki, siz yalnız musiqinin deyil, həm də dostluğun, mərdliyin, sevginin insanısınız. Balakənin xeyrinə-şərinə yarayan, hər kəsin yanında olan bir yoldaş kimi dəyəriniz ölçülməzdir.

Bu yeni yaşınız sizə sağlamlıq, ailə xoşbəxtliyi, musiqidə yeni uğurlar və daha çox sevgi gətirsin. Sizin ürəyinizdəki o sevgi dolu işıq daim parlasın, səsiniz və musiqiniz Balakənin hər guşəsinə ümid və ruh versin.

Ad gününüz mübarək, Namiq müəllim! 🌟 Səsiniz daim ucalardan gəlsin, ürəyiniz daim sevgi ilə dolsun.

Sənətkara,işinin peşakarına “Yeni Balakən”-dən hörmətlərlə..