Yeni Balakən qəzeti

0

Millət vəkili Nəsib Məhəməliyev seçiciləri ilə bayramı qeyd etdi

Balakən rayonunda bayram ab-havası seçicilərlə birgə yaşandı. Hörmətli millət vəkili Nəsib Məhəməliyev bu gün hər iki bayram münasibətilə balakənliləri səmimi şəkildə təbrik edərək, onların sevincini bölüşdü.

Şambul kəndində keçirilən görüşdə millət vəkili seçicilərlə bir araya gələrək onların gündəlik həyatla bağlı problemlərini dinlədi. Vətəndaşların qaldırdığı məsələlərdən dərhal həll olunması mümkün olanlar yerindəcə həll edildi. Zaman tələb edən və aidiyyatı qurumların müdaxiləsini tələb edən problemlərin isə mütləq şəkildə müvafiq instansiyalar qarşısında qaldırılacağına söz verdi.

Görüş zamanı sakinlər millət vəkilinin diqqət və qayğısını yüksək qiymətləndirərək, onların yanında olmasından məmnunluqlarını ifadə etdilər. Bayram günündə seçicilərlə birgə olmaq, onların sevincini paylaşmaq və eyni zamanda problemlərinə həll yolları tapmaq millət vəkili ilə xalq arasında səmimi ünsiyyətin bariz nümunəsi oldu.

                                                                                Yeni Balakən

0

Balakəndə Ramazan Bayramı: Birlik, sevinc və mənəvi ucalıq

Ramazan ayını geridə qoyan Balakən camaatı bu gün böyük coşqu ilə Ramazan bayramını qarşıladı. Səhərin erkən saatlarından etibarən məscidlərə üz tutan insanlar bayram namazını qılmaq üçün bir araya gəldilər. Məscidlərdəki mənzərə həm dini, həm də ictimai baxımdan dərin məna daşıyırdı: müxtəlif yaş qruplarından olan insanlar bir səfdə dayanaraq dua etdilər, bayramın mənəvi ucalığını birlikdə yaşadılar.

Namazdan sonra bayramlaşma mərasimi başladı. İnsanlar bir-birini təbrik edir, qucaqlaşır, sevincini bölüşürdü. Bu bayram sadəcə dini bir mərasim deyil, həm də sosial bir hadisədir: qohumlar, qonşular, dostlar bir araya gələrək həmrəyliyin, paylaşmanın və mərhəmətin təcəssümünü ortaya qoyurlar. Balakəndəki bayram ab-havası bir daha göstərdi ki, Ramazan ayı insanları birləşdirən, qəlbləri saflaşdıran və cəmiyyətə mənəvi güc verən bir məktəbdir.

Bayram günlərində həm də ehtiyacı olanlara yardım etmək, kasıbları sevindirmək, uşaqlara bayram hədiyyələri vermək ənənəsi yaşadılır. Bu, bayramın ruhunu daha da zənginləşdirir və onun sosial ədalət, paylaşma və mərhəmət prinsiplərini ön plana çıxarır.

Bayram təbriki

Ramazan bayramı münasibətilə bütün oxucularımızı ürəkdən təbrik edirik! Bu mübarək günlər hər bir evə bolluq, bərəkət, sevinc və sülh gətirsin. Qəlblərimizdə mərhəmət, dilimizdə dua, əllərimizdə paylaşma olsun. Bayramınız mübarək! 🌙

                                           Yeni Balakən

1

Baharın gəlişi böyük coşqu ilə qarşılandı

Əcdadlarımızdan bizə yadigar qalan, milli ruhumuzu, yaddaşımızı və qədim adət-ənənələrimizi özündə yaşadan Novruz bayramı Balakəndə böyük coşqu ilə qeyd olunub. Martın 19-da Heydər Əliyev adına mədəniyyət və istirahət parkında ümumrayon şənliyi keçirilib. Park səmənilər, gül-çiçəklər, al-əlvan xonçalar və xalq tətbiqi sənəti nümunələri ilə bayramsayağı bəzədilib.

Tədbirdə Balakən Rayon İcra Hakimiyyətinin başçısı Natiq Ağayev, rayon rəhbərləri, hüquq-mühafizə orqanlarının əməkdaşları, idarə və müəssisələrin kollektivləri, şəhid ailələri, qazilər və ictimaiyyətin nümayəndələri iştirak ediblər. Qonaqlar Bahar qız, kosa və keçəl, milli geyimli gənclərin təqdim etdiyi Novruz xonçaları və şərbətlə qarşılanıb. “Yallı” rəqsi bayramın ruhunu daha da canlandırıb. İcra başçısı Natiq Ağayev musiqi sədaları altında bayram tonqalını alovlandıraraq şənliyi rəsmi şəkildə açıq elan edib.

Sərgilər və bayram guşələri

Bayram çərçivəsində sahibkarların və məktəblilərin əl işlərindən ibarət satış sərgisi təşkil olunub. Tarix-diyarşünaslıq muzeyinin eksponatları, qədim məişət əşyaları, rəsm sərgiləri və milli mətbəximizin nümunələri qonaqların böyük marağına səbəb olub. İdmançılar öz məharətlərini nümayiş etdiriblər.

Təbriklər və mükafatlandırma

Rayon rəhbəri Natiq Ağayev Novruz bayramının dövlət səviyyəsində qeyd olunmasının ümummilli lider Heydər Əliyevin adı ilə bağlı olduğunu vurğulayıb. Şəhidlərin əziz xatirəsi bir dəqiqəlik sükutla yad edilib. O, həmçinin Balakən gimnaziyasının təmirinə dəstək verən iş adamı Qalib Əhmədovu təltif edib və region məktəblilərinin velosiped turnirində qalib gəlmiş idmançıları mükafatlandırıb.

Rəngarəng konsert və personajların çıxışı

Dədə Qorqud və Bahar qızı mərasim iştirakçılarını salamlayaraq xoş arzularını çatdırıblar. Mədəniyyət Mərkəzinin musiqi və rəqs kollektivləri bayram konserti ilə çıxış edib. Kosa və Keçəl məzəli zarafatları ilə tədbirə şənlik qatıb, iştirakçılarda unudulmaz təəssürat yaradıb.

Şənlik park ərazisində ağacəkmə aksiyası ilə başa çatıb. Bu addım Novruzun təbiətə sevgi və yenilənmə fəlsəfəsini bir daha təsdiqləyib.

                                                                                        Yeni Balakən

1

Torpaq Çərşənbəsi Balakəndə İncəsənət Bayramına Çevrildi

17 mart 2026-cı il tarixində Balakən Uşaq İncəsənət Məktəbi baharın gəlişini, torpağın oyandığı ilaxır – “Torpaq çərşənbəsi*ni xüsusi bir tədbirlə qeyd etdi. Bu məkanda keçirilən hər bir tədbir özəl və gözəl görünüm alır, ən kiçik məqam belə böyük təəssürat yaradır.

Tədbirdə rayon İcra Hakimiyyətinin başçısı cənab Natiq Ağayev, dövlət hüquq mühafizə orqanlarının rəhbərləri, şəhid anaları, mədəniyyət işçiləri, valideynlər və digər qonaqlar iştirak etdilər. Onların iştirakı tədbirə həm rəsmi, həm də mənəvi dəyər qatdı.

İncəsənətlə Qarşılama

Girişdə qonaqları məktəbin rəqs qrupunun şagirdləri milli “Yallı” rəqsi ilə qarşıladı. Bu qədim rəqs həm birlik, həm də milli ruhun təcəssümü kimi tədbirin başlanğıcına xüsusi rəng qatdı. Ardınca gənc rəssamların canlı yaradıcılıq prosesi və sərgilənən əsərləri təqdim olundu. Qonaqlar uşaqların fırçasından doğan bayram ovqatını, milli motivləri və yaradıcılıq həvəsini böyük maraqla izlədilər.

Xatırladaq ki, Balakən Uşaq İncəsənət Məktəbi 2020-ci ildə cənab Prezidentin iştirakı ilə açılmış, respublikada nadir layihələrdən biridir. Məktəbin özünə məxsus səs yazma studiyası, məşhur tar ustası Aydın Tağıyevin emalatxanası və zəngin yaradıcılıq mühiti tədbir iştirakçıları üçün xüsusi maraq doğurdu. Bu imkanlar Balakən gənclərinin incəsənətə olan marağını daha da artırır.

Tədbirin əsas hissəsi böyük zalda baş tutdu. Azərbaycan Respublikasının Dövlət Himni səsləndi, şəhidlərimizin ruhu ehtiramla yad edildi. Ardınca uşaq xor kollektivinin, xalq çalğı alətləri ansamblının və müəllimlərin ifasında milli musiqi nümunələri səsləndi. Rəqs kollektivlərinin çıxışları isə zalda bayram ovqatını daha da gücləndirdi. Hər ifa, hər rəqs tamaşaçılar tərəfindən alqışlarla qarşılandı.

Bayramın Son Nəğməsi

Tədbirin sonunda rayon İcra Hakimiyyətinin başçısı Natiq Ağayev tədbir iştirakçılarını bayram münasibətilə təbrik edərək belə gözəl tədbirlərin davamını tövsiyyə etdi. O, məktəb kollektivi ilə birgə xatirə şəkli çəkdirərək bu günün yaddaşlarda qalacaq bir bayram səhifəsinə çevrilməsinə töhfə verdi.

                                                                                                                 Ramazan Abal

1

Beynəlxalq münasibətlər sisteminin sürətlə dəyişdiyi, yeni siyasi və iqtisadi çağırışların meydana çıxdığı bir dövrdə qlobal miqyasda dialoq və əməkdaşlıq, ölkələrarası münasibətlərdə qarşılıqlı anlaşma prinsipi, bütün bunların bəşəriyyətə faydalılığı xüsusi əhəmiyyət daşıyır. Son on ildən artıq zaman kəsimində bütün sadaladığımız istiqamətlərdə Azərbaycanın təşəbbüskarlığı və onun beynəlxalq səviyyədə dəstək görməsi tendensiyası müşahidə edilməkdədir. Qlobal Bakı Forumuna olan beynəlxalq maraq fonunda bunu aydın görmək mümkündür.

2013-cü ildən etibarən Bakıda keçirilən Qlobal Bakı Forumu dünyanın müxtəlif ölkələrindən siyasi liderləri, sabiq prezident və baş nazirləri, beynəlxalq təşkilatların nümayəndələrini və ekspertləri bir araya gətirən mühüm beynəlxalq tədbirdir. Forum Nizami Gəncəvi Beynəlxalq Mərkəzi tərəfindən təşkil olunur və qlobal problemlərin müzakirəsi üçün geniş imkanlar yaradır. Hər il olduğu kimi, martın 12-də baş tutan XIII Qlobal Bakı Forumu da bu gün dünyamızı narahat edən məsələlərin müzakirəsi ilə yadda qaldı.

Ənənəvi olaraq Forumun açılış mərasiminə İlham Əliyev də qatılaraq, çıxışında sıra mühüm məsələlərə toxundu. Dövlət başçısı hazırda dünyada baş verən geosiyasi dəyişikliklər, beynəlxalq münasibətlərdə mövcud problemlər, enerji təhlükəsizliyi və regional əməkdaşlıq kimi mövzulara xüsusi diqqət yetirdi ki, hər bir mövzu və həmin istiqamətdə mövcud olan problemlərin aradan qaldırılması, lazımi addımların atılması öz-özlüyündə bu gün region və dünya üçün olduqca vacibdir.

Prezident İlham Əliyev müasir dünyada baş verən geosiyasi dəyişikliklərə diqqət çəkərək bildirdi ki, dünyada hazırda baş verənlər – yeni gərginlik nöqtələrinin yaranması və uzunmüddətli mövcud münaqişələr beynəlxalq davranış strukturuna təhdid təşkil edir. Dövlət başçısının təbirincə desək, bu, həmçinin beynəlxalq hüquqa təhdiddir. Beynəlxalq hüquqa və normalara hörmət edilməyəndə və beynəlxalq təşkilatların qətnamələri nəzərə alınmayanda ölkələrin ərazi bütövlüyü pozulur.

Prezident İlham Əliyevin sözlərinə görə, hazırda beynəlxalq sistem yeni mərhələyə daxil olur və bir sıra qlobal problemlər dünya dövlətlərinin qarşısında ciddi çağırışlar yaradır. Bu səbəbdən dövlətlər arasında əməkdaşlığın və dialoqun gücləndirilməsi daha da vacibdir.

Dövlət başçısının çıxışında diqqət çəkən digər mühüm məqam sülh mesajı idi. Daha doğrusu, Prezident İlham Əliyev Azərbaycanın sülhə sadiqliyini bir daha dünyaya bəyan edərək, tezliklə Ermənistanla sülh müqaviləsinin imzalanacağına əminliyini ifadə etdi. Azərbaycan Lideri eyni zamanda bu müsbət tendensiyanın beynəlxalq aləmlə paylaşıla biləcək nadir təcrübə olduğunu vurğuladı:

“İşğala, etnik təmizləməyə və soyqırımına məruz qalmış, suverenliyini, ərazi bütövlüyünü və ləyaqətini güc tətbiqi ilə bərpa etmiş, daha sonra isə o zaman məğlub olmuş düşmənə sülh təklif etmiş ölkə olmağımız – hesab edirəm ki, bu, beynəlxalq ictimaiyyətlə paylaşa biləcəyimiz nadir bir təcrübədir. Mən dəfələrlə demişəm ki, biz Ermənistanla sülhü yalnız kağız üzərində əldə etməmişik, sülh sazişi yeddi ay əvvəl paraflandı və birgə bəyanat qəbul olundu. Lakin biz artıq real həyatda sülhü təmin etmişik. Sərhədimizdə sakit vəziyyət hökm sürür, atəş açılmır, artıq heç bir qurban və itki yoxdur”.

Nəhayət, Forumda diqqət çəkən mühüm məqamlardan biri də enerji təhlükəsizliyi ilə bağlı idi. Ona görə də prezident çıxışında enerji təhlükəsizliyi məsələsinə geniş yer ayıraraq, Azərbaycanın hazırda bir çox ölkələrin enerji təhlükəsizliyinin təmin edilməsində mühüm rol oynadığını vurğuladı. Bu, danılmaz faktdır ki, Azərbaycanın həyata keçirdiyi enerji layihələri region və Avropa üçün böyük əhəmiyyət daşıyır. Bu layihələr vasitəsilə Azərbaycan təbii qaz və enerji resurslarını müxtəlif ölkələrə ixrac edir və beynəlxalq enerji bazarında etibarlı tərəfdaş kimi tanınır.

Bir sözlə, əvvəlki illərdə olduğu kimi, bu dəfə keçirilən Qlobal Bakı Forumu da qlobal əhəmiyyətli məsələlərin müzakirəsi ilə yadda qaldı. Forum bir daha mühüm beynəlxalq platforma rolunu oynadığını təsdiqləmiş oldu.

Nəsib Məhəməliyev,
Milli Məclisin deputatı

1

Balakən rayonunda iftar mərasimi təşkil olunub

Müqəddəs Ramazan ayı münasibətilə mart ayının 11-də Balakən Rayon İcra Hakimiyyətinin təşkilatçılığı ilə iftar mərasimi təşkil olunub. Mərasimdə rayon icra hakimiyyətinin başçısı Natiq Ağayev, hüquq-mühafizə orqanlarının rəhbərləri, şəhid ailələri, qazilər, din xadimləri, ağsaqqallar və rayon ictimaiyyətinin nümayəndələri iştirak edib.

Mərasimin əvvəlində xalqımızın Ümummilli Lideri Heydər Əliyevin və Azərbaycanın ərazi bütövlüyü uğrunda canlarını fəda etmiş qəhrəman şəhidlərimizin əziz xatirəsi bir dəqiqəlik sükutla yad edilib. Müqəddəs “Qurani-Kərim”dən ayələr oxunub və xalqımızın, dövlətimizin firavanlığı, əmin-amanlığı üçün dualar olunub.

Çıxış edənlər Ramazan ayının fəzilətlərindən danışaraq, bu ayın insanları gözəl niyyətlər və xeyirxah əməllər naminə birliyə çağırdığını vurğulayıblar. Eyni zamanda çıxışlarda ölkəmizdə dövlət-din siyasətinin ulu öndər Heydər Əliyev tərəfindən təməlinin qoyulduğu, bu siyasətin Azərbaycan Respublikasının Prezidenti İlham Əliyev tərəfindən  uğurla davam etdirildiyi bildirilib.

Daha sonra mərasim iştirakçılar birlikdə oruclarını açaraq Ramazan ayının mənəvi ab-havasını bölüşüblər.

                                                                            Yeni Balakən

2

AVROPANIN RƏHBƏRİ BAKIDAN NƏ İSTƏYİR

KOŞTANIN SƏFƏRİNİN ŞİFRƏLƏRİ
Azərbaycan Prezidenti İlham Əliyevin Avropa İttifaqı Şurasının Prezidenti Antonio Koşta ilə təkbətək görüşü keçirilib. Dövlət başçısı görüş zamanı iqtisadi əlaqələrin yüksək səviyyədə olduğunu vurğulayaraq bildirib: “Keçən il bir neçə dəfə iqtisadi göstəricilərə baxdım və bu ilin yanvarında ticarətimizin 50 faizi Avropa İttifaqı ilə həyata keçirilib. Bu isə göstərir ki, bizim üçün Avropa İttifaqı bir nömrəli ticarət tərəfdaşıdır. Əminəm ki, yeni layihələr, investisiya imkanları və hər iki istiqamətdə investisiyaların artması ilə biz bu sahədə daha aktiv fəaliyyət göstərəcəyik”.
Antonio Koştanın Bakıya gəlişi sadəcə protokol xarakterli deyil. Bu səfər Avropanın enerji təhlükəsizliyi və regional sabitlik məsələlərində Azərbaycanı vazkeçilməz tərəfdaş kimi gördüyünün növbəti təsdiqidir. Son zamanlar regionda yaşanan gərginlik Avropada enerji təhlükəsizliyi ilə bağlı ciddi problemləri meydana çıxarır ki, bu da Azərbaycanın strateji önəmini daha da artırır. Eyni zamanda, Ukraynada davam edən müharibə Avropanı Rusiya qazından asılılığı minimuma endirməyə vadar edir. Belə bir şəraitdə Azərbaycanın “Cənub Qaz Dəhlizi” vasitəsilə tədarük etdiyi mavi yanacaq Avropa üçün həyati əhəmiyyət kəsb edir.
Dövlət başçısının qeyd etdiyi ticarət rəqəmləri Azərbaycanın ən əsas iqtisadi tərəfdaşının Aİ olduğunu bir daha sübut edir. Bundan savayı, İttifaq Cənubi Qafqazda yaranan yeni geosiyasi reallıqları nəzərə almaya bilməz. Ehtimal olunur ki, Aİ Azərbaycan və Ermənistan arasında davamlı sülhün əldə olunması prosesinə öz töhfəsini verməyə çalışacaq. Brüssel bölgənin artan iqtisadi və siyasi rolunun fərqindədir və bu proseslərdən kənarda qalmaq istəmir. Xüsusilə, Zəngəzur dəhlizinin “Şərq-Qərb” ticarət yolunda əsas həlqəyə çevriləcək olması Cənubi Qafqazın əhəmiyyətini qlobal miqyasda artırır.
Bundan başqa, Azərbaycan artıq təkcə ənənəvi qaz ixracatçısı deyil, həm də mühüm yaşıl enerji mərkəzinə çevrilmək niyyətindədir. Qara dənizin dibi ilə çəkiləcək elektrik kabeli vasitəsilə bərpa olunan enerjinin Avropaya nəqli hazırda gündəmin əsas mövzularından biridir.
Rusiya ilə artan gərginlik fonunda Avropa İttifaqının Rusiyadan yan keçməklə Çindən Avropaya yük daşımaları üçün etibarlı tranzit yollarına ehtiyacı var. Orta Dəhliz layihəsi hazırda bu məsələdə əvəzedilməz rola malikdir və Azərbaycan bu dəhlizin əsas halqasıdır. Gələcəkdə bu sahəyə, eləcə də kənd təsərrüfatı, texnologiya və rəqəmsallaşma sektorlarına Avropadan böyük həcmdə investisiyaların yatırılması gözlənilir.
İttifaq rəhbərinin ölkəmizə səfəri bir daha təsdiqləyir ki, Azərbaycan Avropa üçün regionda etibarlı və əvəzolunmaz strateji müttəfiqdir.
Müəllif: Zeynal Əmrəliyev

1

Balakənin Füzuli küçəsi: qazıntı var, asfalt yoxdur
Balakən şəhərinin mərkəzində yerləşən Füzuli küçəsi illərdir sakinlərin gündəlik narazılığına səbəb olur. Küçədə aparılan kommunal işlər nəticəsində yolun səthində qazıntılar aparılıb, boru xətləri çəkilib, təmir işləri görülüb. Lakin bütün bu işlərin sonunda asfalt örtüyünün bərpası unudulub.
Yarımçıq işlər, yarımçıq məsuliyyət
Bir müddət əvvəl küçə sakini yeni inşa etdiyi mənzilinə su çəkdirmək üçün Asan Xidmət vasitəsilə Meliorasiya və Su Təsərrüfatı xidmətinə müraciət edib. Su çəkilib, işlər tamamlanıb, quyunun üstü qumla örtülüb… və məsələ bununla bitib. Asfalt isə bərpa olunmayıb.
Eyni vəziyyət bir qədər aşağıda da yaşanıb. Yolun altından keçən boru xəttində sızma baş verib, su səthə qalxaraq asfaltı korlayıb, sürətlə hərəkət edən maşınların təkərlərindən sıçrayaraq səkidən keçən insanların üzərinə tökülüb. Xətt təmir olunub, üstü yenə qumla örtülüb, amma asfalt yenidən çəkilməyib.
Nəticədə hər iki qazıntıya tökülən qum yağışlı havada palçığa, quru havada isə toza çevrilərək həm sakinlərə diskomfort yaradır, həm də küçənin görkəmini eybəcər hala salır. Bu, sadəcə estetik problem deyil, həm də sağlamlıq və təhlükəsizlik məsələsidir.
Yağış boruları küçəni batırır
Küçənin daha bir problemi isə Füzuli küçəsi ilə C. Məmmədquluzadə küçəsinin kəsişməsindədir. Burada yeni məskunlaşmış bir sakinin həyətindəki yardımçı tikilinin damından yağış suları birbaşa küçəyə axıdılır. Hər yağış yağanda küçədən keçən insanlar ikiqat əziyyət çəkir: həm yağışın islatması, həm də borudan tökülən suyun batırması.
Bu, sadəcə narahatlıq deyil, həm də insanlara qarşı hörmətsizlikdir. Belə hallarda su ötürücü arx və ya kanalizasiya xəttinə yönləndirmə aparılmalıdır. Əks halda, bu davranış həm qonşulara zülm, həm də şəhərin ümumi görünüşünə zərbədir.
Sakinlərin haqlı sualı
Balakənlilər haqlı olaraq soruşur: niyə qazılan yerlər qumla örtülüb, asfalt isə unudulur? Niyə işlər yarımçıq saxlanılır? Küçənin bərpası, asfalt örtüyünün yenilənməsi və yağış sularının düzgün istiqamətləndirilməsi həm sakinlərin rahatlığı, həm də şəhərin ümumi görünüşü üçün vacibdir.

Yeni Balakən

0

Balakəndə velosiped idman növü üzrə turnir keçirilib

 Azərbaycan Respublikası Gənclər və İdman Nazirliyi, Azərbaycan Velosiped İdmanı Federasiyası, AHİİTA, Balakən Rayon İcra Hakimiyyəti və Şəki-Zaqatala Regional Təhsil İdarəsinin dəstəyi ilə təşkil olunan turnirdə Balakən, Zaqatala və Qax rayonlarından olan məktəblilər iştirak ediblər.

Tədbirin açılış mərasimində Balakən Rayon İcra Hakimiyyətinin başçısı Natiq Ağayev qonaqları və idmançıları salamlayaraq gənclər arasında sağlam həyat tərzinin təbliği məqsədilə velosiped idman növünün əhəmiyyətini qeyd edib, idmançılara uğurlar arzulayıb.

Digər çıxış edənlər Şəki-Zaqatala Regional Gənclər və İdman İdarəsinin rəisi Ramiz Mahmudov,  AHİİTA-nın direktor müavini Fikrət Hacıyev, Toba şirkətinin əməkdaşı Həsən Seyfullayev  iştirakçılara uğurlar arzulayıb, bu cür  yarışların idmana marağın artırılmasında mühüm rol oynadığını qeyd ediblər.

Gərgin və maraqlı mübarizə şəraitində keçən yarışda 3.5 km-lik məsafədə idmançılar müxtəlif yaş kateqoriyaları üzrə qalib olmaq uğrunda mübarizə aparıblar.

Yarışın yekununda qalib və mükafatçılar diplom və medallarla təltif olunublar. Eyni zamanda hər kateqoriya üzrə birinci yeri tutan idmançılara qiymətli hədiyyə – velosiped təqdim edilib.

Qeyd edək ki, bu cür idman tədbirlərinin keçirilməsi region gəncləri arasında sağlam həyat tərzinin təşviqinə, velosiped idman növünün inkişafına və gənclərin idmana marağının artırılmasına mühüm töhfə verir.

                                                             Yeni Balakən

1

Şəhid Valideynlərinin Görüşü: Birliyin və Zəfərin Ən Müqəddəs Səhifəsi

Müharibələr acı, kədər və itki deməkdir. Bu acılara dözmək üçün gərək zəfər qazanılsın, qələbə çalınsın. II Qarabağ Müharibəsi Azərbaycan tarixində məhz belə bir dönüş nöqtəsi oldu. Şəhidlərimizin, qazilərimizin, igid döyüşçülərimizin qızıl qanı və şirin canı ilə yazılan bu səhifə xalqımıza torpaqlarını, kimliyini, dəyərlərini və birliyini qaytardı. Amma bu zəfəri bizə bəxş edən oğullar geri dönmədilər. Onları unudulmaz edən isə əbədi olaraq bizə qaytardıqları milli birliyimizdir.

Bu birliyi bu gün ən yüksək səviyyədə yaşadanlar şəhid valideynləridir. Onların səbir və fədakarlığı, övladlarının yolunu gözləyən gözləri, ürəklərində daşıdıqları dərd, xalqımızın gücünü və birliyini daha da möhkəmləndirir.

Naxçıvandan olan şəhid atası Səməd Vəliyev – hansı ki, hələ də oğlunun yolunu gözləyir, məzarı belə yoxdur – Bakılı şəhid atası Bəylər Əkbərov və Zaqataladan şəhid anaları Balakənə gələrək şəhid valideynləri ilə görüşdülər. Onlar öncə Şəhidlər Xiyabanını ziyarət edərək ruhlara fatihə bağışladılar, məzarlar başında dərdlərini bölüşdülər. Ardınca Hənifə kəndində şəhidimiz Cavid Yüzbaşıyevin, Qazma kəndində isə I Qarabağ müharibəsi şəhidi Arzu Süleymanovun məzarlarını ziyarət etdilər, valideynləri və yaxınları ilə görüşdülər.

Bu görüş bir daha göstərdi ki, şəhidlərimizin ruhu bizi birləşdirir, onların valideynləri isə bu birliyin canlı simvoludur. Onların hər addımı, hər sözü, hər göz yaşı xalqımızın yaddaşında müqəddəs bir iz qoyur. Bu izlər gələcək nəsillərə vətən sevgisini, milli birliyi və şəhidlərə ehtiramı ötürəcək.

                                                                  Yeni Balakən