Category: Xəbərlər

0

“Konstitusiya  və  Suverenlik  İli” çərçivəsində keçirilən silsilə tədbirlərin növbətisi, 25 dekabr 2025-ci il tarixdə   Zaqatala rayon Heydər Əliyev Mərkəzində Balakən rayon Mədəniyyət Mərkəzinin təşkilatçılığı  və MİHİ Balakən  rayon Komitəsinin dəstəyi ilə  “Heydər Əliyev – Konstitusiyamızın və dövlət suverenliyimizin memarıdır!”-ədəbi-bədii kompozisiyası Zaqatalalı tamaşaçılara təqdim olunub.

Tədbir iştirakçıları əvvəlcə Heydər Əliyev Mərkəzinin qarşısında Ulu Öndər Heydər Əliyevin abidəsini ziyarət edərək abidə önünə gül dəstələri qoyublar.

Tədbir Azərbaycan Respublikasının Dövlət Himninin səsləndirilməsi,ulu öndər Heydər Əliyevin və vətən uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilməklə başladı.

Tədbirdə çıxış edən ŞZRMİ Balakən rayon üzrə  nümayəndəsi Şəfəq Hacıyeva ulu öndər Heydər Əliyevin müasir Azərbaycan dövlətçiliyinin formalaşmasında, Azərbaycan Respublikası Konstitusiyanın qəbulunda və dövlət suverenliyinin möhkəmləndirilməsində oynadığı əvəzsiz roldan bəhs edib.

Balakən rayon Mədəniyyət Mərkəzinin əməkdaşları və bədii qiraət dərnəyinin üzvlərinin iştirakı ilə xalq şairi Zəlimxan Yaqubun “Əbədiyyət dastanı” poeması əsasında hazırlanmış ədəbi-bədii kompozisiya nümayiş etdirilib. Kompozisiya Ulu Öndərin mənalı həyat yolunu, dövlətçilik tariximizdəki misilsiz xidmətlərini və xalq yaddaşında əbədi yaşayan zəngin irsini bədii formada təqdim edib. Ulu Öndərin keçdiyi şərəfli  həyat yolunu əks etdirən sənədli filmlərdən kadrlar nümayiş olunub.

Tədbir tamaşaçılar tərəfindən rəğbətlə qarşılanıb.

                                                                                    Yeni Balakən

• Facebook

Daha çox foto üçün üstdəki facebook nişanına tıkla

2

“Media ilə rəhbərlik arasında səmimi dialoq”

Balakən Rayon İcra Hakimiyyətində rayon rəhbəri Natiq Ağayevin bölgədə fəaliyyət göstərən media nümayəndələri ilə görüşü keçirildi. Görüşdə qəzet, televiziya, sayt və informasiya agentliklərinin əməkdaşları iştirak edərək, öz sahələrinə aid məsələləri, rastlaşdıqları problemləri və təkliflərini səsləndirdilər.

Uzun illər Balakəndə bir çox  media nümayəndələri tam və ətraflı fəaliyyət göstərə bilmirdi. Bunun səbəbi əvvəlki rəhbərliyin idarəetmədəki səriştəsizliyi və media nümayəndələrinə göstərdiyi münasibətlə bağlı idi. Yeni rəhbərlik isə ilk gündən mətbuatla səmimi münasibət quraraq, dördüncü hakimiyyətin dövlət və cəmiyyət həyatındakı roluna xüsusi diqqət yetirdi.

“Yeni Balakən” qəzeti olaraq biz də həmin tədbirdə iştirak etdik. Rəhbər bizə söz verdikdə, qəzetin redaksiya otağının olmaması və digər problemləri dilə gətirdik. Natiq müəllim məsələlərin müsbət yöndə həll olunacağını bildirdi, qəzetlə bağlı əhəmiyyətli tövsiyələr verdi. Media nümayəndələri də öz sahələrində informasiya təminatında rastlaşdıqları çətinlikləri, irad və təkliflərini səsləndirdilər.

Natiq Ağayev Balakən rayonunda indiyə qədər görülməyən, görülməkdə olan və görüləcək işlərdən danışaraq, bu proseslərin mediada düzgün təqdimatının gələcəkdə işlərin daha asan və keyfiyyətli olmasına, sakinlərin də məlumatlı olmasına xidmət edəcəyini vurğuladı.

Bu sadəcə bir toplantı deyildi, Balakən və bölgədə fəaliyyət göstərən media nümayəndələri üçün bu görüş yeni bir səhifə açdı. Açıq dialoq və rəhbərliyin diqqəti bizə göstərdi ki, bundan sonra bölgənin informasiya təminatı daha güclü və şəffaf olacaq. “Yeni Balakən” qəzeti olaraq biz də bu prosesin önündə dayanaraq, hər bir vətəndaşın səsini eşidilən bir mətbuat orqanı olmağa davam edəcəyik. Görüşün yaratdığı ümid və ruh yüksəkliyi isə bizə gələcəyə daha böyük inamla baxmağa imkan verir.

                                                         Yeni Balakən

• Facebook

0

Milli Mətbuatın 150 illiyi münasibətilə təltif

Azərbaycan milli mətbuatının 150 illiyi münasibətilə Azərbaycan Respublikası Media İnkişafı Agentliyi tərəfindən yubiley medalı ilə təltif olunmaq mənim üçün böyük bir şərəfdir. Bu medal təkcə şəxsi deyil, həm də “Yeni Balakən”–in, bütün yaradıcı dostlarımızın, yerli qəhrəmanlarımızın və Balakənin ruhunu yaşadan hər kəsin uğurudur.

Bu təltif, mətbuatın gücünə, yerli hekayələrin dəyərinə və ictimai yaddaşın qorunmasına olan inamımızın rəsmi təsdiqidir. Bu yolda bizimlə olan hər kəsə təşəkkür edirəm.

                                                                                             Ramazan Abalov

0

Balakən rayonunda “Heydər Əliyev – Konstitusiyamızın və Dövlət Suverenliyimizin Memarıdır!” adlı tədbir keçirilib.

Balakən rayon Mədəniyyət Mərkəzində “Konstitusiya və Suverenlik ili” çərçivəsində ədəbi-bədii kompozisiya təqdim olunub.

19 dekabr 2025-ci il tarixində Balakən rayon Mədəniyyət Mərkəzində “Heydər Əliyev – Konstitusiyamızın və Dövlət Suverenliyimizin Memarıdır!” adlı ədəbi-bədii kompozisiya nümayiş etdirilib. Tədbir Azərbaycan Respublikasının Dövlət Himninin səsləndirilməsi ilə başlanıb, ardınca Ulu öndər Heydər Əliyevin və Vətən uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilib.

Mərasimdə Balakən Rayon İcra Hakimiyyətinin başçısı Natiq Ağayev, RİH aparatının kollektivi, idarə və müəssisə rəhbərləri, əməkdaşlar iştirak ediblər. Şəki–Zaqatala Regional Mədəniyyət İdarəsinin Balakən rayonu üzrə baş məsləhətçisi Şəfəq Hacıyeva çıxışında Ulu öndər Heydər Əliyevin müasir Azərbaycan dövlətçiliyinin formalaşmasında, Konstitusiyanın qəbulunda və dövlət suverenliyinin möhkəmləndirilməsində oynadığı əvəzsiz rolu vurğulayıb.

Daha sonra Mədəniyyət Mərkəzinin əməkdaşları və bədii qiraət dərnəyinin üzvləri xalq şairi Zəlimxan Yaqubun “Əbədiyyət dastanı” əsasında hazırlanmış kompozisiyanı təqdim ediblər. Səhnə əsəri Ulu öndərin mənalı həyat yolunu, dövlətçilik tariximizdəki misilsiz xidmətlərini və xalq yaddaşında əbədi yaşayan zəngin irsini bədii formada əks etdirib.

Tədbir çərçivəsində Şəfəq Hacıyevanın fortepiano müşayiəti ilə gənc vokalist Vasif Qasımov Sevil Əliyevanın “Əziz anam” mahnısını ifa edib. Musiqi nömrəsi dinləyicilər tərəfindən böyük maraqla qarşılanıb.

Sonda iştirakçılar Ulu öndər Heydər Əliyevin həyat və fəaliyyətinə həsr olunmuş kitab sərgisi ilə tanış olublar.

                                                                    Yeni Balakən

• Facebook

Daha çox foto üçün üstdəki facebook ikonuna tıkla

1

Balakəndə Ümummilli Lider Heydər Əliyevin xatirəsi ehtiramla anılıb

Bu gün ölkəmizin inkişaf yoluna, dövlətçilik təməllərinə, müstəqilliyimizin möhkəmlənməsinə ömrünü həsr etmiş böyük şəxsiyyət Ulu Öndər Heydər Əliyevin xatirəsi Balakənda böyük ehtiram və minnətdarlıq hissi ilə yad edilib. Azərbaycan xalqının Ümummilli Lideri Heydər Əliyevin anım günü münasibətilə Balakən Rayon İcra Hakimiyyətinin başçısı Natiq Ağayev, RİHB aparatının kollektivi, rayon hüquq-mühafizə orqanlarının və idarə, müəssisələrin rəhbərləri, əməkdaşları, şəhid ailələrinin üzvləri, qazilər və müharibə veteranları Ulu Öndərin abidəsini ziyarət ediblər. Ulu Öndərin abidəsi önünə tər çiçəklər düzülüb, onun əziz və unudulmaz xatirəsinə ehtiram ifadə olunub.

Ölkəmizin ərazi bütövlüyü uğrunda canlarından keçmiş şəhidlərimizə dərin hörmət əlaməti olaraq Şəhidlər Xiyabanı ziyarət edilib.

Daha sonra “Qubek” otelində Ümummilli Lider Heydər Əliyevin vəfatının 22-ci ildönümü münasibətilə “Dövlət və xalq üçün yaşanan ömür” mövzusunda konfrans keçirilib. Əvvəlcə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Balakən Rayon İcra Hakimiyyəti başçısı Natiq Ağayev çıxışında Ulu Öndər Heydər Əliyevin tarixi xidmətlərindən bəhs edib. Ömrünü öz xalqına həsr edən Ümummilli Lider Heydər Əliyevin respublikamıza rəhbərliyinin bütün dövrlərində Vətən və xalq qarşısında misilsiz xidmətlərindən danışıb.

Digər çıxış edənlər bildiriblər ki, Ulu Öndərin xatirəsi hər bir azərbaycanlı üçün əziz və müqəddəsdir. Azərbaycanın müasir tarixi, milli dövlətçiliyimiz bu dahi şəxsiyyətin adı ilə sıx bağlıdır. Müasir Azərbaycan tarixinin yaradıcısı olan Heydər Əliyev xalqımızın qürur mənbəyi, tarixi bir şəxsiyyət kimi yaddaşlara əbədi həkk olunub. Xalqımız həyatını Azərbaycanın tərəqqisinə həsr etmiş Ümummilli Liderini heç vaxt unutmur və unutmayacaqdır.

Konfransın sonunda Ulu Öndər Heydər Əliyevə həsr olunmuş film nümayiş etdirilib.

Sonra Ümummilli Liderin anım günü ilə əlaqədar ehsan mərasimi təşkil olunub.

                                                Yeni Balakən

• Facebook

Daha çox foto üçün üstdəki Facebook işarəsinə tıkla.

0

Balakən rayonunda “Min ildə bir dəfə doğulan kəs, tarixdə əbədi yaşayacaqdır” başlığı altında tədbir keçirilib

11 dekabr 2025-ci il tarixdə keçirilən tədbirdə ilk öncə Dövlət Himni səsləndirilib, Ulu öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.

Daha  sonra ŞZRMİ-nin Balakən rayonu üzrə baş məsləhətçisi Şəfəq Hacıyeva çıxış edərək Heydər Əliyevin milli dövlətçilik tarixindəki rolundan danışıb və gənc nəslin bu irsdən faydalanmasının vacibliyini xüsusi vurğulayıb.

Balakən rayon Mədəniyyət Mərkəzinin işçiləri və könüllülərinin iştirakı ilə xalq şairi Zəlimxan Yaqubun “Əbədiyyat dastanı” poeması əsasında Ulu öndər Heydər Əliyevin anım gününə həsr olunmuş ədəbi-bədii kompozisiya nümayiş etdirilib. “Min ildə bir dəfə doğulan kəs, tarixdə əbədi yaşayacaqdır” adlı kompozisiya Ulu öndərin zəngin həyat yolunu, dövlətçiliyimizin möhkəmləndirilməsində müstəsna xidmətlərini və xalq yaddaşında əbədi yaşayan irsini bədii ifadələrlə təqdim edib.

Tədbirdə həmçinin Şəfəq Hacıyevanın fortepianoda müşayiəti ilə gənc vokalist Vasif Qasımovun ifasında Sevil Əliyevanın “Əziz anam” mahnısı təqdim olunub və tədbir iştirakçıları tərəfindən böyük maraqla qarşılanıb.

Tədbir çərçivəsində iştirakçılar Ulu öndər Heydər Əliyevin anım gününə həsr olunmuş kitab sərgisi ilə də tanış olublar.

                                                                                                                             Zöhrə Bakeyeva

0

                Balakəndə “Valideyn–məktəb əməkdaşlığı” mövzusunda I Valideyn Konfransı keçirildi

Bu gün, 11 dekabr 2025-ci il, Balakən rayonunda Şəki–Zaqatala Regional Təhsil İdarəsinin təşkilatçılığı ilə “Valideyn–məktəb əməkdaşlığı” mövzusunda I Valideyn Konfransı baş tutdu. Tədbir Dövlət Himninin səsləndirilməsi və Azərbaycanın ərazi bütövlüyü uğrunda canını fəda etmiş bütün şəhidlərin, eləcə də gənc nəslin təhsilinə daim xüsusi diqqət göstərmiş Ümummilli Lider Heydər Əliyevin əziz xatirəsinin bir dəqiqəlik sükutla yad edilməsi ilə başladı.

Təhsil sektorunun aktual məsələləri diqqətə çatdırıldı

Konfransın açılış nitqini Balakən Təhsil Sektorunun müdiri Mehparə Mirzəyeva etdi. O, çıxışında rayon üzrə təhsilin mövcud vəziyyəti, məktəblərin fəaliyyəti, əldə olunan nəticələr və qarşıda duran hədəflər barədə geniş məlumat verdi.

Daha sonra Şəki–Zaqatala Regional Təhsil İdarəsinin müdir müavini Hafiz Pənahov mövzuya dair slayd təqdimatı ilə çıxış edərək valideyn–məktəb əməkdaşlığının müasir təhsil sistemində rolundan, bu əməkdaşlığın uşaqların inkişafına təsirindən danışdı.

Mütəxəssislərin çıxışları və aktual mövzular

Konfrans çərçivəsində Azərbaycan Respublikasının Ailə, Qadın və Uşaq Problemləri üzrə Dövlət Komitəsinin Zaqatala Uşaq və Ailələrə Dəstək Mərkəzinin sosial iş üzrə mütəxəssisi Şəhla Məmmədova, həmçinin Balakən Rayon Polis Şöbəsinin Yetkinlik yaşına çatmayanlarla profilaktik işin təşkili qrupunun baş inspektoru Sahil Bayramov mövzu ətrafında çıxış edərək valideynlərin maarifləndirilməsi, uşaqların təhlükəsizliyi və sosial rifahı ilə bağlı vacib məqamları diqqətə çatdırdılar.

Panel müzakirələri və qarşılıqlı fikir mübadiləsi

Rəsmi çıxışlardan sonra tədbir panel müzakirələri ilə davam etdi. Valideynlər, müəllimlər və təhsil mütəxəssisləri arasında aparılan fikir mübadiləsi əməkdaşlığın daha da gücləndirilməsi, valideynlərin təhsil prosesinə sistemli şəkildə cəlb olunması və uşaqların hərtərəfli inkişafının təmin edilməsi baxımından xüsusi əhəmiyyət daşıdı.

Konfransın məqsədi

Tədbirin əsas məqsədi məktəb və məktəbəqədər təhsil müəssisələri ilə ailə arasında tərəfdaşlığı möhkəmləndirmək, valideyn iştirakını artırmaq, uşaqların rifahını və təhsil mühitində sosial dəstəyi gücləndirməkdən ibarət idi.

Yeni Balakən

1

“Dövlətlə xalqın birliyi: Balakən Cümə Məscidində görüş”

Bu gün Balakən Cümə Məscidində rayon rəhbəri Natiq Ağayev rayonun din xadimləri və dindarları ilə görüş keçirdi. Görüşdə rayonun müxtəlif bölgələrindən gələn din xadimləri, Dini Komitənin əməkdaşları iştirak edirdi. Qonaqlar əvvəlcə məscid və minarə ilə tanış oldular, daha sonra Balakən qazısı İbrahim İbrahimovun müşayiəti ilə məscidə daxil oldular.

Məsciddə onları gözləyən dindarlarla salamlaşan Natiq Ağayev çıxışına başlayaraq, Balakənin din xadimlərini və dindarlarını görməkdən məmnun olduğunu, belə gözəl insanları və təbiəti olan rayona rəhbər təyin edilməsindən qürur duyduğunu bildirdi. Din xadimləri və tədbir iştirakçıları da rəhbəri “Xoş gəldin” sözləri ilə qarşılayaraq, onun fəaliyyətində uğurlar arzuladılar.

Natiq Ağayev çıxışında vurğuladı ki, görüşün əsas məqsədi insanlarla birbaşa ünsiyyətdə olmaq, onların dərd-sərlərini dinləmək, problemlərin həllinə kömək etmək və dövlətə olan inamı möhkəmləndirməkdir. O, dindarların rayonun nüfuzlu şəxsləri, ağsaqqalları olduğunu qeyd edərək, onların rayon həyatında fəal iştirakını, görülən işlərə münasibət bildirməsini, məsləhət və tövsiyələrini eşitmək istədiyini söylədi.

Rayon rəhbəri qarşıda görüləcək işlərdən danışaraq, elektrik, su və kanalizasiya problemlərinin həlli üçün lazımi materialların və işçi qüvvəsinin artıq gətirildiyini, işlərin bir neçə gün ərzində başlanacağını bildirdi. O, Balakənin strateji mövqeyinə toxunaraq, iki dövlətlə həmsərhəd olan bu bölgədən həm dostun, həm də düşmənin keçdiyini vurğuladı və problemlərin birlikdə həll olunmasının vacibliyini qeyd etdi.

Natiq Ağayev ehsan süfrələrində ifrat və israfın az olduğunu məmnuniyyətlə qeyd etsə də, dilənçilərin, xüsusilə də kiçik yaşlı uşaqların çoxluğundan narahatlığını dilə gətirdi. Onların məktəbə gedib təhsil almalı olduqlarını vurğulayaraq, bu məsələdə maarifləndirici tədbirlərin keçirilməsini zəruri saydı.

Görüş İkindi namazı üçün oxunan azanla sona çatdı. Rayon rəhbəri ayrılarkən növbəti dəfə eyni safda, camaatla birgə namaz qılmaq və yenidən görüşmək arzusunu ifadə etdi.

Ramazan Abal

• Facebook

Daha çox foto üçün Facebook nişanına toxun

Prezident İlham Əliyev “Kənd təsərrüfatı təyinatlı torpaqlarda inşa edilməsi və ya quraşdırılması nəzərdə tutulan müvəqqəti tikililər barədə məlumatlandırma Qaydaları”nı təsdiqləyib.
Yeni Balakən.az xəbər verir ki, bununla bağlı dövlət başçısı yeni fərman imzalayıb.

Nazirlər Kabineti fərmandan irəli gələn məsələləri həll etməlidir.

Dövlət başçısı həmçinin 27 dekabr 2023-cü il tarixli fərmanı ilə təsdiq edilmiş “Şəhərsalma və tikinti fəaliyyətinin vahid informasiya təminatı sisteminin Əsasnaməsi”ndə dəyişiklik edib.

Dəyişikliyə əsasən, məlumatlandırma mexanizmi sahəsində:

– sifarişçi tərəfindən Torpaq Məcəlləsində nəzərdə tutulmuş müvəqqəti tikililər barədə məlumatlandırılan orqana məlumatların və sənədlərin təqdim edilməsi;

– məlumatlandırılan orqan tərəfindən müvəqqəti tikililərin vahid uçotunu aparmaq məqsədilə müvafiq məlumatların və sənədlərin elektron qaydada Tikintilərin Dövlət reyestrinə ötürülməsi;

– Tikintilərin Dövlət reyestrində müvəqqəti tikililər barədə məlumatlar və sənədlər təhlil edildikdən sonra sənədlər tam olduğu halda müvəqqəti tikililərə dair məlumatların reyestrdə uçota alınması və bu barədə sifarişçiyə sistem vasitəsilə dərhal bildiriş göndərilməsi, sənədlər tam olmadığı halda isə onların tamamlanması üçün zəruri hərəkətlər barədə məlumatlandırılan orqana və sifarişçiyə məlumat göndərilməsi;

– məlumatlandırılan orqan tərəfindən müvəqqəti tikili barədə məlumatların və sənədlərin sistem vasitəsilə Elektron Hökumət İnformasiya Sistemi üzərindən İqtisadiyyat Nazirliyinə, Kənd Təsərrüfatı Nazirliyinə və Fövqəladə Hallar Nazirliyinə ötürülməsi;

– məlumatlandırılan orqanı məlumatlandırmaqla, sifarişçi tərəfindən müvəqqəti tikilinin sökülməsi barədə məlumatların Tikintilərin Dövlət reyestrinə ötürülməsi nəzərdə tutulur.

0

Natiq Ağayev sahibkarların yanında, maneələr tarixə qovuşur

Bu gün Balakən RİH-in inzibati binasında iş adamları və sahibkarlarla rayon rəhbəri Natiq Ağayevin görüşü oldu. Son 14 ildəki görüşlərdən fərqli olaraq bu dəfə tədbirdə xeyli sayda iş adamı və sahibkar iştirak edirdi. Təbii ki, səbəb də bəlli idi: hər zamankı kimi seçilmiş bir neçə nəfər, daim “yüklənənlər” deyil, görüş elanını eşidib gələn hər kəs iştirak etmişdi. Hətta o qədər çox idi ki, zal adam tutmurdu, koridorda kürsü qoyub oturmuşdular.

Unutmayaq ki, son 14 ildə Balakənin quruculuq işlərində cənab Prezidentin ayırdığı böyük məbləğli vəsaitlə görülən işlər istisna olmaqla, qalan işlərin az qala tamamını Balakənin iş adamları və sahibkarları “yüklənmə” yolu ilə həyata keçiriblər.

Tədbiri Natiq müəllim iştirakçıları salamlayaraq açdı. Rəhbər əvvəlki vəziyyətdən tam hali olduğunu göstərərək çıxışına iş adamlarını əmin etməklə başladı:

•             Tam arxayın, əmin şəraitdə işinizi quracaq, fəaliyyət göstərəcəksiniz.

•             Heç kim sizə münasibətdə neqativ hallara yol verməyəcək, haqsız və əsassız tələblər irəli sürülməyəcək.

•             Əvvəlki eybəcər istəklər, “yükləmələr” olmayacaq, iş adamlarına heç bir maneə yaradılmayacaq.

O, xaricdəki iş adamlarını da dəvət edərək Balakənə investisiya qoymağa çağırdı. Qanun çərçivəsində işlərini qurmaq üçün hərtərəfli dəstək veriləcəyini, hüquqi məsləhətlərdən tutmuş bilik səviyyəsində köməklik göstəriləcəyini vurğuladı.

Sonra söz Şəki-Zaqatala Regional Məşğulluq Filialının Təhlil və Tərəfdaşlarla İş şöbəsinin müdiri Vaqif Əsədullayevə verildi. O, iş adamlarına təqdim olunan güzəştlərdən, məşğulluğun təminində müəyyən kateqoriyalara tanınan imtiyazlardan, iş mühitinin inkişafı üçün yaradılan şəraitdən danışdı və bildirdi ki, sahibkarlar müraciətlərini elektron hökumət portalı üzərindən də edə bilərlər.

Təkliflər və müzakirələr

Natiq müəllim əlavə etdi ki, iş adamlarına avadanlıqlar ona görə veriləcək ki, onlar müəyyən sayda işçi götürsünlər. O, iş yerlərinin açılması və iş şəraitinin yaradılması üçün bir çox istiqamətlər göstərdi. Bəzi məmurlara isə yerindəcə xəbərdarlıq edərək süründürməçiliyə yol verməməyi, iş adamlarına ciddi və həssaslıqla yanaşmağı tapşırdı.

Sahibkar Musalxan İbrahimov elektrik problemi ilə üzləşdiyini bildirdi və turizmin inkişafını təklif etdi. Natiq müəllim cavabında Balakəndə turizmin inkişafının vacib sahələrdən olduğunu, Katex şəlaləsi istiqamətində marşrutun açılmasının gündəmdə olduğunu, quru sərhədlərin açılması ilə turizmin beşqat artacağını qeyd etdi. Elektrik problemi ilə bağlı isə deputat Nəsib müəllimlə də görüşdüklərini,çox böyük dəstək verəcəyini və yaxın zamanda çatışmazlıqların aradan qaldırılacağını vurğuladı. Şəhərdə su və kanalizasiya xətlərinin mərhələli şəkildə yenilənəcəyi də bildirildi.

Sahibkar Vidadi Baydarov Balakən parkından və kanat yolunun məşhur dövründən söz açaraq hazırda kanatın işləmədiyini,rayona turist marağının azaldığını qeyd etdi. O, Balakən çayı boyunca Salban kəndinə qədər park-bulvar salınmasını təklif etdi və layihədə iştirak etməyə hazır olduğunu bildirdi.

Sizin gəlişiniz qış fəslinə təsadüf etsədə,bahar havası hiss olunur-deyə sözə başlayan iş adamı Məhəmməd Bazarov isə torpaq koordinatları, bağbanların maarifləndirilməsi və bağçılıq işinə peşəkar dəstəyin göstərilməsi ilə bağlı məsələləri səsləndirdi. Bununla bağlı rəhbərlə ayrıca görüşmək istədiyini bildirdi.Görüş istəyi müsbət qarşılandı.

Başçı sahibkarlara qanuni ət kəsimi yerlərinin yaradılmasını təklif etdi. Bu, həm qiymətlərin ucuzlaşmasına, həm də həkim nəzarətində gigiyenik şəraitdə ətin emalına səbəb olacaq.

Sahibkarların rəyləri

İş adamı Mahir Caniyev görüşü maarifləndirici adlandıraraq xeyli bilgi əldə etdiyini bildirdi. Əfqan Balayev isə Natiq Ağayevdən razı qaldığını, iş adamlarının incidilməyəcəyinə inandığını və yeni rəhbərə, onun timsalında ölkə başçısına güvənərək sahibkarlıq fəaliyyətini davam etdirəcəklərini vurğuladı.

Natiq müəllim gələcəkdə tikiləcək obyektlərin və görüləcək işlərin müasir görünüşlü, Balakən memarlığına və şəhərsalmanın tələblərinə uyğun, keyfiyyətli şəkildə olmasının vacibliyini qeyd etdi. O, görüşdən məmnun qaldığını bildirərək sahibkarlara uğurlar arzuladı.

                                                                Yeni Balakən

• Facebook

Daha çox foto üçün üstdəki facebook işarəsinə tıkla