Category: Siyasət

0

Natiq Ağayev sahibkarların yanında, maneələr tarixə qovuşur

Bu gün Balakən RİH-in inzibati binasında iş adamları və sahibkarlarla rayon rəhbəri Natiq Ağayevin görüşü oldu. Son 14 ildəki görüşlərdən fərqli olaraq bu dəfə tədbirdə xeyli sayda iş adamı və sahibkar iştirak edirdi. Təbii ki, səbəb də bəlli idi: hər zamankı kimi seçilmiş bir neçə nəfər, daim “yüklənənlər” deyil, görüş elanını eşidib gələn hər kəs iştirak etmişdi. Hətta o qədər çox idi ki, zal adam tutmurdu, koridorda kürsü qoyub oturmuşdular.

Unutmayaq ki, son 14 ildə Balakənin quruculuq işlərində cənab Prezidentin ayırdığı böyük məbləğli vəsaitlə görülən işlər istisna olmaqla, qalan işlərin az qala tamamını Balakənin iş adamları və sahibkarları “yüklənmə” yolu ilə həyata keçiriblər.

Tədbiri Natiq müəllim iştirakçıları salamlayaraq açdı. Rəhbər əvvəlki vəziyyətdən tam hali olduğunu göstərərək çıxışına iş adamlarını əmin etməklə başladı:

•             Tam arxayın, əmin şəraitdə işinizi quracaq, fəaliyyət göstərəcəksiniz.

•             Heç kim sizə münasibətdə neqativ hallara yol verməyəcək, haqsız və əsassız tələblər irəli sürülməyəcək.

•             Əvvəlki eybəcər istəklər, “yükləmələr” olmayacaq, iş adamlarına heç bir maneə yaradılmayacaq.

O, xaricdəki iş adamlarını da dəvət edərək Balakənə investisiya qoymağa çağırdı. Qanun çərçivəsində işlərini qurmaq üçün hərtərəfli dəstək veriləcəyini, hüquqi məsləhətlərdən tutmuş bilik səviyyəsində köməklik göstəriləcəyini vurğuladı.

Sonra söz Şəki-Zaqatala Regional Məşğulluq Filialının Təhlil və Tərəfdaşlarla İş şöbəsinin müdiri Vaqif Əsədullayevə verildi. O, iş adamlarına təqdim olunan güzəştlərdən, məşğulluğun təminində müəyyən kateqoriyalara tanınan imtiyazlardan, iş mühitinin inkişafı üçün yaradılan şəraitdən danışdı və bildirdi ki, sahibkarlar müraciətlərini elektron hökumət portalı üzərindən də edə bilərlər.

Təkliflər və müzakirələr

Natiq müəllim əlavə etdi ki, iş adamlarına avadanlıqlar ona görə veriləcək ki, onlar müəyyən sayda işçi götürsünlər. O, iş yerlərinin açılması və iş şəraitinin yaradılması üçün bir çox istiqamətlər göstərdi. Bəzi məmurlara isə yerindəcə xəbərdarlıq edərək süründürməçiliyə yol verməməyi, iş adamlarına ciddi və həssaslıqla yanaşmağı tapşırdı.

Sahibkar Musalxan İbrahimov elektrik problemi ilə üzləşdiyini bildirdi və turizmin inkişafını təklif etdi. Natiq müəllim cavabında Balakəndə turizmin inkişafının vacib sahələrdən olduğunu, Katex şəlaləsi istiqamətində marşrutun açılmasının gündəmdə olduğunu, quru sərhədlərin açılması ilə turizmin beşqat artacağını qeyd etdi. Elektrik problemi ilə bağlı isə deputat Nəsib müəllimlə də görüşdüklərini,çox böyük dəstək verəcəyini və yaxın zamanda çatışmazlıqların aradan qaldırılacağını vurğuladı. Şəhərdə su və kanalizasiya xətlərinin mərhələli şəkildə yenilənəcəyi də bildirildi.

Sahibkar Vidadi Baydarov Balakən parkından və kanat yolunun məşhur dövründən söz açaraq hazırda kanatın işləmədiyini,rayona turist marağının azaldığını qeyd etdi. O, Balakən çayı boyunca Salban kəndinə qədər park-bulvar salınmasını təklif etdi və layihədə iştirak etməyə hazır olduğunu bildirdi.

Sizin gəlişiniz qış fəslinə təsadüf etsədə,bahar havası hiss olunur-deyə sözə başlayan iş adamı Məhəmməd Bazarov isə torpaq koordinatları, bağbanların maarifləndirilməsi və bağçılıq işinə peşəkar dəstəyin göstərilməsi ilə bağlı məsələləri səsləndirdi. Bununla bağlı rəhbərlə ayrıca görüşmək istədiyini bildirdi.Görüş istəyi müsbət qarşılandı.

Başçı sahibkarlara qanuni ət kəsimi yerlərinin yaradılmasını təklif etdi. Bu, həm qiymətlərin ucuzlaşmasına, həm də həkim nəzarətində gigiyenik şəraitdə ətin emalına səbəb olacaq.

Sahibkarların rəyləri

İş adamı Mahir Caniyev görüşü maarifləndirici adlandıraraq xeyli bilgi əldə etdiyini bildirdi. Əfqan Balayev isə Natiq Ağayevdən razı qaldığını, iş adamlarının incidilməyəcəyinə inandığını və yeni rəhbərə, onun timsalında ölkə başçısına güvənərək sahibkarlıq fəaliyyətini davam etdirəcəklərini vurğuladı.

Natiq müəllim gələcəkdə tikiləcək obyektlərin və görüləcək işlərin müasir görünüşlü, Balakən memarlığına və şəhərsalmanın tələblərinə uyğun, keyfiyyətli şəkildə olmasının vacibliyini qeyd etdi. O, görüşdən məmnun qaldığını bildirərək sahibkarlara uğurlar arzuladı.

                                                                Yeni Balakən

• Facebook

Daha çox foto üçün üstdəki facebook işarəsinə tıkla

0

Deputat Balakənli seçicilərin istəklərini Milli Məclisdə səsləndirdi.

Artıq iki gündür, 2026-cı ilin Dövlət büdcəsi haqqında qanun layihəsi hökumət üzvlərinin birgə iştirakı ilə Milli Məclisin plenar iclasında müzakirəyə çıxarılıb. Hələ sabah da davam edəcək müzakirələrdə deputatlar öz fikirlərini səsləndirir, vətəndaşları narahat edən məsələlərə toxunur, təklif və rəylərini bildirirlər. Səsləndirilən fikirlər içərisində hörmətli deputatımız Nəsib Məhəməliyevin toxunduğu bir sıra ciddi narahatlıq doğuran məqamlar var ki, onu izləyicilərin diqqətinə çatdirmağı zəruri hesab edirik.

Millət vəkili hökumət üzvləri qarşısında seçiciləri narahat edən bir sıra məqamlara da toxunub,problemləri də qaldırıb:
“Bir millət vəkili olaraq fürsətdən istifdə edərək, təmsil olunduğum Balakən rayonunun seçiciləri tərəfindən qaldırılmış bəzi problemləri diqqətinizə çatdırmağı özümə borc bilirəm.
1. Regionların 2019-2023 illərdə sosial-iqtisadi inkişafı Dövlət Proqramında Balakən rayonu üzrə həyata keçirilməsi nəzərdə tutulan tədbirlərin icrasının başa çatdırılması.
2. Rayon mərkəzindən 18 km aralıda yerləşən və 30 min əhalinin yaşadğı Qabaxçöl qəsəbə xəstəxanasının yenidən tikilməsi. Bu barədə cənab Prezidentin müvafiq göstərişi olmuşdu və aidiyyəti mərkəzi icra orqanları tərəfindən razılıq əldə olunmuşdu. Əgər, yenidən inşası mümkün olmasa, hökumətdən kapital təmir üçün vəsaitin ayrılmasını xahiş edirəm.
3. Balakən dağətəyi rayondur və eko, aqro və digər turizm sahələrinin inkişafı üçün münbit şərait mövcuddur. Bu baxımdan, Katexçay şəlaləsinin turizm marşrutuna daxil edilməsi məqsədə uyğun olardı. Hesab edirəm ki, Milli Qoruqlardan və biosferadan istifadə haqqında qanun qəbul edilməsi, dağətəyi rayonlarda turizmin inkişafına, məşğulluq səviyyəsinin yüksəlməsinə, sosial problemlərin həllinə xidmət edərdi.
4. Rayon ərazisindən axan Dağ çayları sistemində beton-bənd, sahil bərkitmə işlərinin aparılması.
5. İşsizliyin aradan qaldırılması istiqamətində, Özünü məşğulluq proqramlarının genişləndirilməsi.”

Nəsib müəllimin qaldırdığı bu məsələlərin müsbət həlli Balakənin iqtisadi,sosial həyatında önəmli ölçüdə dəyişikliklər yaradacağı aşıkardır.Balakənlinin səsi olduğunu bir daha göstərən hörmətli millət vəkilimizə uğurlar və qaldırdığı məsələlərin qısa zamanda həllini tapmasını dilyəyirik.

                                                                                                                             Yeni Balakən

0

Yeni başlanğıc: Natiq Ağayevin ilk vətəndaş qəbulu

Balakən Rayon İcra Hakimiyyətinin yeni başçısı Natiq Ağayev bu gün ilk dəfə vətəndaşlarla rəsmi görüş keçirdi. Qəbul RİH binasında baş tutdu və yerli sakinlərin müxtəlif sosial, iqtisadi və məişət məsələləri ilə bağlı müraciətləri dinlənildi.

Bilindiyi kimi, Balakən RİH-də vətəndaş qəbulları hər həftənin üçüncü günü İcra Hakimiyyətinin inzibati binasında, dördüncü günlər isə kənd və qəsəbələrdə keçirilir. Bu görüşlər rayon rəhbərliyinin vətəndaşlara daha yaxın olmaq, onların problemlərini yerindəcə dinləmək və operativ həll yolları tapmaq məqsədini daşıyır.

Natiq Ağayevdən öncə onun Göyçayda vətəndaş sevgisi ilə qazandığı ad-sanı, ünü gəlib çatmışdı Balakənə. Bəlkə bu, bəlkə də gəldiyi ilk gündən Balakəndə gördüyü işlərin sakinlərdə yaratdığı xoş təəssürat, inam hissi idi — bilmirik. Amma bir şey aydın idi: bu günki qəbulda xeyli insan vardı. Xeyli də dərd, problem gətirmişdilər. Sanki uzun illərin dərd-sərlərinə çarə, ümid işığını görürdülər Natiq Ağayevin nurlu üzündə, dodaqlarının arasından çıxacaq hər kəlməsində, sözündə… Elə olacağa da bənzəyirdi.

Başçı hər bir müraciəti diqqətlə dinləyərək, aidiyyəti üzrə tapşırıqlar verdi və problemlərin mərhələli şəkildə həll olunacağını bildirdi. Bu görüş, Balakəndə yeni bir idarəçilik ruhunun doğulduğunu göstərdi — həm ümidli, həm də insanlara yaxın.

“İnsanların dərdini dinləmək, onları eşitmək — bizim borcumuzdur.” — Natiq Ağayev

                                                                                                    Ramazan Abal

1

Azərbaycan Respublikası Prezidentinin Sərəncamı ilə Balakən Rayon İcra Hakimiyyətinin başçısı təyin olunan

Natiq Nuşravan oğlu Ağayev noyabrın 13-də Azərbaycan Respublikası Prezidentinin köməkçisi – Prezident Administrasiyasının Ərazi-təşkilat məsələləri şöbəsinin müdiri Zeynal Nağdəliyev tərəfindən rayon ictimaiyyətinin nümayəndələrinin iştirakı ilə kollektivə təqdim olunub.

“Yeni Balakən”  xəbər verir ki, Zeynal Nağdəliyev təqdimatda çıxış edərək, dövlətimizin başçısının tapşırıq və tövsiyələrini çatdırıb.

N.Ağayev ona göstərilən etimada görə minnətdarlıq edib.

3

İCRA BAŞÇILARININ YERİ NİYƏ DƏYİŞDİRİLDİ ? – ZƏRURİ SƏBƏBLƏR VƏ MÜHÜM GÖZLƏNTİLƏR

Prezident İlham Əliyev müxtəlif bölgələrə yeni rəhbərlər təyin etdi. Fuad Nəcəfli Prezidentin Naxçıvan Muxtar Respublikasındakı səlahiyyətli nümayəndəsi vəzifəsindən azad edildi. Mahiyyət etibarı ilə səlahiyyətli nümayəndəlik xüsusi nümayəndəliklə birlikdə yeni regional idarəetmə modeli idi. Bu həm kadrlar, həm yeni yaradılan sistem üçün bir imtahandır. Görünür ki, Fuad Nəcəfli bu imtahandan keçə bilmədi. Son zamanlar Muxtar Respublikadan olan bəzi ictimaiyyət nümayəndələri problemlərlə bağlı öz narazılıqlarını ifadə edirdilər. Eyni zamanda Fuad Nəcəflinin Muxtar Respublikadakı qurumların fəaliyyətinə müdaxiləsi də hiss edilirdi. Məsələn, Naxçıvanda bəzi qurumların, o cümlədən Ali Məclisin rəhbəri yoxdur. Bu ümumi idarəetmə sisteminə mənfi təsir göstərən amildir. Yəni təyin edilən səlahiyyətli nümayəndə Ceyhun Cəlilov isə nisbətən gənc və daha mülayim kadr imici yaradır. Cəlilov Azərbaycanın ASAN Xidmətlə bərabər ən uğurlu lahiyyərltindən olan DOST Xidmətin rəhbərliyində çalışıb. Sonradan Naxçıvan Muxtar Respublikasının Əmək və Əhalinin Sosial Müdafiəsi naziri, daha sonra isə Muxtar Respublikasının Baş Naziri olub. Həm yeni idarəçilik metodunu mənimsəyib, həm də Naxçıvanın idarəçiliyində yaxından iştirak edib. Eyni zamanda muxtar respublika əhalisinin problemlərini bu sahəyə rəhbərlik etmiş şəxs olaraq dərindən bilir ki, bu önəmli faktdır. Çünki Naxçıvanda əhalinin sosial məsələlərinin və idarəetmənin sağlamlaşdırılmasına ciddi şəkildə ehtiyyac var. Ceyhun Cəlilov bu baxımdan uğurlu kadrdır. Dövlət başçısı eyni zamanda Elşən Həsənlinin Kürdəmir rayon İcra Hakimiyyətinin başçısı təyin edilməsi haqqında da Sərəncam imzaladı. Elşən Həsənli bu təyinata qədər Bakı şəhəri Sabunçu rayon İcra Hakimiyyəti başçısının 1 – ci müavini olub. İcra strukturlarında yetişmiş kadrdır. Eyni zamanda bu sahədə icra başçılarının strukturun öz daxilindən gəlməsi ənənəsini də qoya bilər. İlham Əliyev həmçinin Elxan İbrahimovu Kürdəmir rayon İcra Hakimiyyətinin başçısı vəzifəsindən azad edərək Bakı şəhəri Nəsimi rayon İcra Hakimiyyətinin başçısı təyin etdi. Elxan İbrahimov Azərbaycanda Qərb təhsilli yeganə rayon rəhbəridir. Dövlət başçısının onu paytaxtın mərkəzinə təyin etməsi son zamanlar Bakıda keçirilən beynəlxalq tədbirlərin təşkili baxımından əhəmiyyətlidir. İnnovativ və geniş xaric dil bilgisi olan kadrların paytaxt rayonlarına rəhbər təyin edilməsi həm Bakının idarəetməsinin müasirləşdirilməsi, həm də xarici tədbirlərin daha səmərəli keçirilməsinə yardım edəcəkdir. Prezident İlham Əliyev Vüqar Novruzovu Naftalan şəhər İcra Hakimiyyətinin başçısı vəzifəsindən azad edərək Göygöl rayon İcra Hakimiyyətinin başçısı vəzifəsinə, Orxan Mürsəlovu isə Gədəbəy rayon İcra Hakimiyyətinin başçısı vəzifəsindən azad edərək Göyçay rayon İcra Hakimiyyətinin başçısı təyin edilməsi haqqında Sərəncam imzaladı. Hər iki icra başçısının başqa rayonlara təyinat alması onların əvvəl işlədiyi bölgələrdə etimadı doğrultduğunu göstərir. Dövlət başçısı eyni zamanda Elvin Paşayevi Göygöl rayon İcra Hakimiyyətinin başçısı vəzifəsindən azad edərək Qax rayon İcra Hakimiyyətinin başçısı təyin edilməsi haqqında Sərəncam imzaladı. Elvin Paşayev Kənd Təsərrüfatı Nazirliyindən gəlmiş kadrdır. Bölgələrdə bu sahələrin dirçəldilməsinə ciddi ehtiyac var. Qaxda həbs edilmiş icra başçısı Musa Şəkiliyevin dövründə buraxılmış kobud səhvlərə görə aqrar sahənin inkişafı xeyli geridə qalırdı. Yeni icra başçısının ilk işi ehtimal ki, Qaxda kənd təsərrüfatı sahəsinin canlandırılması olacaq. Prezident İlham Əliyev həmçinin Natiq Ağayevin Göyçay rayon İcra Hakimiyyətinin başçısı vəzifəsindən azad edilərək Balakən rayon İcra Hakimiyyətinin başçısı təyin edilməsi haqqında Sərəncam imzaladı. Natiq Ağayev uzun illər təhlükəsizlik orqanlarında çalışıb, 2022 – ci ildə Göyçaya icra başçısı təyin edilib. Əvvəlki icra başçısı İslam Rzayevin dövründə buraxılan olduqca ciddi səhvlər, bir çox sahədə baş qaldıran nöqsanlar rayonda DTX – nın əməliyyat keçirməsi və icra başçısının həbs edilməsi ilə nəticələndi. Qeyd edim ki, Natiq Ağayev Balakən tarixində icra başçısı təcrübəsi olan ilk rayon rəhbəri kimi tarixə düşəcək. Azərbaycan müstəqillik qazandıqdan sonra Balakənə heç vaxt başqa rayonda təcrübəsi olan icra başçısı təyin edilməyib. Bu isə rayon idarəçiliyinə daha peşakar yanaşmanın göstərilməsi baxımından önəmlidir. Natiq Ağayevin Balakəndə mövcud olan bir çox problemi yerinə qoyacağı, sağlam mühit yaradacağı da şübhəsizdir. Yeni icra başçısının Göyçayda göstərdiyi müsbət nəticə, haqqında söylənilən yüksək fikirlər bu fikirlərin formalaşması üçün ciddi zəmin hazırlayır.

Politoloq-tarixçi

Zeynal Əmralıyev

P.S.Bəziləri deyir ki,rayona nə tez başçı qoyuldu..İdarəetmə heç nəyi,heç kimi gözləmir.İlin sonuna yaxın bütün rəhbərlik yerləri tam səlahiyyətlilərlə dolu olmalıdır,çünki noyabr ayı və büdcə işləri gələn ilin, 2026-cı ilin büdcə proqnozlarının,dəqiqləşmələrinin rayon və şəhərlərdən mərkəzə təqdim olunduğu,rayon rəhbərlərinin imzasıyla təsdiq olunduğu ay və işlərdəndəndir.

1

Bayram günündə seçicilərlə görüş: Nəsib Məhəməliyev Balakənin Şambul və Meşəşambul kəndlərində vətəndaşların səsini dinlədi.

Bayram günündə istirahət etməyi seçmək əvəzinə, Milli Məclisin deputatı Nəsib Məhəməliyev Balakən rayonunun Şambul və Meşəşambul kəndlərinə səfər edərək vətəndaşlarla birbaşa görüş keçirdi. Bu addım, onun seçicilərə olan sadiqliyinin və daim əlçatan olmasının bariz nümunəsidir.

🗓 8 Noyabr Zəfər Günü və 9 Noyabr Bayraq Günü münasibətilə təbrik

Görüşlərin əvvəlində Nəsib müəllim kənd sakinlərini bu iki mötəbər bayram münasibətilə təbrik etdi. O, Balakəndə, doğma seçicilərinin arasında olmağın, bayram sevincini onlarla paylaşmağın onun üçün xüsusi önəm daşıdığını vurğuladı. Bu, sadəcə bir rəsmi qəbul deyil, həm də xalqla birgə olmağın, onların sevincinə və dərdinə şərik çıxmağın təcəssümüdür.

🗣 Vətəndaşların səsi eşidildi

Hər iki kənddə keçirilən vətəndaş qəbulu zamanı sakinlər müxtəlif sahələrdə üzləşdikləri problemləri, gündəlik həyatlarında qarşılaşdıqları çətinlikləri deputata çatdırdılar. Nəsib Məhəməliyev:

•             Bəzi məsələləri yerindəcə həll etdi,

•             Bəzilərinin icrasını köməkçisinə tapşırdı,

•             Vaxt tələb edən müraciətləri isə aidiyyəti qurumlar qarşısında qaldıracağına söz verdi.

Bu yanaşma, onun seçicilərə olan məsuliyyətini və səmimi münasibətini bir daha nümayiş etdirdi.

📱 Fərqli platformalarda daima ünsiyyətdə

Deputatın seçicilərlə ünsiyyəti yalnız üz-üzə görüşlərlə məhdudlaşmır. O, köməkçisi vasitəsilə və sosial şəbəkə hesabları üzərindən də daima əlaqədə olur. Bu, müasir kommunikasiya vasitələrindən səmərəli istifadə edərək vətəndaşların səsini hər zaman eşitmək istədiyinin göstəricisidir.

🌿 Balakənin kəndlərində canlı ünsiyyət

Şambul və Meşəşambul kəndlərində keçirilən bu görüşlər, yerli sakinlərin deputatla birbaşa təmas qurmasına, problemlərini şəxsən çatdırmasına imkan yaratdı. Bu, həm də kəndlərin ictimai həyatında aktivliyin və vətəndaş iştirakçılığının artmasına xidmət edir.

                                                                              Ramazan Abal

• Facebook

Daha çox foto üçün üstdəki Facebook ikonuna tıkla

2

Tarixə yön verən böyük zəfər.

Böyük Türk milləti ailəsinin önəmli üzvü,Türk İslam dövlətlərinin lokomotivlərindən olan Azərbaycanımın kürəsəlçi güdümündə,rus-fars-erməni öncülüyündəki varlığımıza yönəlik təhdit, işğal siyasəti üzərində,onlara qarşı aparılan mübarizədə, qanlı müharibədə tarixi zəfər qazandı,qələbə çaldı.Elə bir zəfər ki,dünyada dastana döndü,dillər əzbəri, örnək oldu,dünya hərb məktəblərində dərsliklərə salındı,Azərbaycanla hər kəs hesablaşmağa başladı.Azərbaycan adlı Dövlətimin bu tarixi zəfəri daha böyük bir oluşuma yol açdı:Türk Dövlətləri Birliyinə.Azərbaycanımın başlatdığı mübarizənin davamı, açdığı yolla hələ qət ediləcək məsafələr var..Növbəti addım:TURAN.İnşallah bir sonrakı addım son 200 ilə qədər tarixən və kökdən, bizə məxsus və idarəçiliyimizdə olan əzəli və əbədi torpaqlarımız,bütöv Azərbaycan üzərində hökmranlığımızın,hakimiyyətimizin bərqərar olmasıdır..

Bu gün tarixi zəfərimizin beş illiyidir.Respublika səviyyəsində,o cümlədən Balakənimdə böyük coşquyla,sevinclə,qürurla qeyd olunur.Bu Zəfər Günü bir ayrı gözəldir,hisslər,duyğular tam dolğun,ən üst həddədir Balakənimdə,Balakənlilərimdə.Bilmirəm nədəndir amma çox gözəldir..

Zəfər Günü münasibəti “Yeni Balakən” KİV olaraq öncə Ali Baş Komandanı,müzəffər ordumuzu,bu zəfəri bizə daddıran şəhidlərimizin valideynlərini,şəhid ailələrini,qazilərimizi,müharibə iştirakçılarını səmimi qəlbdən təbrik edir,Zəfər bayramı sevincini Siz əziz Balakənlilərimin timsalında Azərbaycanımızla,bütöv Türk dünyasıyala paylaşır,bölüşürük.Qoy hər zaman bölüşdükcə çoxalan,paylaşdıqca artan sevinclərimiz,zəfərlərimiz olsun!

                                                                                      “Yeni Balakən” qəzetinin baş redaktoru

                                                                                                          Ramazan Abalov

1

Balakəndə Dövlət Bayrağı Günü: Qürur, ehtiram və vətən sevgisi

Bayraq – bir millətin kimliyi, bir xalqın qürurudur. 9 Noyabr Dövlət Bayrağı Günü münasibətilə Balakən Bayraq Muzeyində keçirilən tədbir, bu qürurun canlı ifadəsinə çevrildi. Tarixlə duyğunun, ehtiramla vətən sevgisinin qovuşduğu bu gün, Balakənin yaddaşına qızıl hərflərlə yazıldı.Tarixə və şəhidlərə ehtiramla başlayan bu gün, bayrağımıza olan sonsuz sevginin ifadəsi oldu.

Tədbirdə Balakən Rayon İcra Hakimiyyəti başçısının səlahiyyətlərini müvəqqəti həyata keçirən Turan Dibirov, RİH kollektivi, YAP Balakən təşkilatının sədri Azad Balayev, hüquq mühafizə orqanlarının rəhbərləri, təhsil və səhiyyə sahəsinin nümayəndələri, Gənclər evi və idarəsi, bələdiyyə nümayəndələri, şəhid ailələri, qazilər, QHT-lər və digər ictimai qonaqlar iştirak edirdilər.

Tədbiri peşəkar aparıcı Arzu Ocaqverdiyev idarə edirdi. Azərbaycan Respublikasının Dövlət Himni səsləndirildi, şəhidlərin xatirəsi bir dəqiqəlik sükutla yad edildi. Ardınca bayrağın tarixinə həsr olunmuş film nümayiş olundu – ekran qarşısında susqunluq və qürur bir araya gəldi.

Çıxışlar: Tarixə və duyğuya səyahət

İlk çıxış edən Turan Dibirov, Dövlət Bayrağı Gününün təsisindən danışaraq vurğuladı ki, son beş ildə üçrəngli müqəddəs bayrağımız dövlətimizin bütün bölgələrində dalğalanır. O qeyd etdi ki, Ali Baş Komandanın komandanlığındakı müzəffər ordumuzun suverenliyini və ərazi bütövlüyünü  bərpa etdiyi dövlətimizin hər bölgəsində bayrağımız əbədi dalğalanacaq…

Ardınca çıxış edən Turanə xanım, 2002-ci ildə Şəki şəhərində Ulu Öndər Heydər Əliyevlə görüşünü xatırladı. O zaman tələbə olan Turanə xanım görüş boyunca Azərbaycan bayrağını dik tutaraq sevgi və ehtiram nümayiş etdirmişdi. Bu davranışı Ulu Öndərin diqqətini çəkmiş, o Turanə xanımı yanına çağıraraq təşəkkür etmişdi. Turanə xanım həmin anları tədbir iştirakçıları ilə bölüşdü və bayrağa olan sevgisinin dərinliyini ifadə etdi.

“Bayraq yalnız bir simvol deyil – o, xalqın ruhudur. Mən o bayrağı tutarkən, sanki bütün Azərbaycanı qucaqlayırdım.” – Turanə xanım

Mədəniyyətin salamı: Bayrağa həsr olunmuş sənət

Tədbir Balakən Mədəniyyət Mərkəzinin hazırladığı bayraq gününə həsr olunmuş bədii kompozisiya ilə davam etdi. Musiqi, şeir və teatr elementləri ilə zənginləşdirilmiş proqram bayrağa olan sevgini sənətin dili ilə ifadə etdi, iştirakçılarda qürur və duyğusal təəssürat yaratdı.

                                                                                       Ramazan Abal

• Facebook

Daha çox foto üçün üstdəki Facebook işarəsinə toxun

1

8 Noyabr Zəfər Günü münasibətilə Balakən rayonunda əlamətdar bir təşəbbüs həyata keçirildi — ümumrayon səviyyəsində ağacəkmə aksiyası. Tədbir Poştbinə kəndi ərazisində, gələcəkdə sakinlərin və yol keçən qonaqların istirahət edə biləcəyi park kimi nəzərdə tutulan, gözəl mənzərəli yol kənarında baş tutdu.

Bu mənalı aksiyada Balakən Rayon İcra Hakimiyyətinin başçısının səlahiyyətlərini müvəqqəti olaraq həyata keçirən Turan Dibirovun rəhbərliyi ilə RİH kollektivi, hüquq-mühafizə orqanları, idarə və təşkilatlar, şəhər təsərrüfatı nümayəndələri, şəhid ailələri, qazilər, Balakən ASAN Xidmət mərkəzinin kollektivi, Yeni Azərbaycan Partiyası Balakən təşkilatı, səhiyyə işçiləri və digər qonaqlar iştirak etdilər.

Hər iştirakçı bir ağac əkərək həm şəhidlərimizin xatirəsini əbədiləşdirdi, həm də gələcək nəsillərə yaşıl bir miras qoydu. Aksiya təkcə ağac əkməklə yekunlaşmadı — ağacların sağlam böyüməsi, mal-qara və digər xarici təsirlərdən qorunması üçün sahənin kənarına taxtadan hasar da çəkildi. Bu, tədbirin davamlılıq və qayğı ilə həyata keçirildiyini göstərən nümunəvi bir addım oldu.

Balakən bu təşəbbüslə bir daha sübut etdi ki, zəfər yalnız tarixdə deyil, təbiətdə də yaşamalıdır. Əkilən hər ağac həm şəhidlərimizin ruhuna ehtiram, həm də gələcəyimizə ümidin rəmzidir.

                                                                                          Ramazan Abal

• Facebook

Daha çox foto üçün üstdəki Facebook işarəsinə toxun

1

Balakənlilərin istəkləri və yeni ümidlər.

Balakən Rayon İcra Hakimiyyəti Başçısının səlahiyyətləri,rayonun idarə olunması müvəqqəti olaraq Balakən RİH-in birinci müavin Turan Dibirova rəsmən həvalə olunmuş,verilmişdir.

Qeyd edək ki,Balakən RİH-in başçısı İslam Rzayev 30.10.2025 tarixdə həbs olunmuş və həmin tarixdə də Azərbaycan Respublikası Prezidentinin sərəncamı ilə vəzifəsindən azad edilmişdir.

Dibirov Turan Eldar oğlu 1986-cı ildə Balakən rayonunun Qullar kəndində anadan olub.

2007-ci ildə Azərbaycan Kənd Təsərrüfatı Akademiyasını iqtisadiyyat və idarəetmə ixtisası üzrə fərqlənmə diplomu ilə bitirib. 2016-cı ildə Azərbaycan Respublikasının Prezidenti yanında Dövlət İdarəçilik Akademiyasında dövlət və bələdiyyə idarəetməsi ixtisası üzrə magistr təhsili alıb.

Əmək fəaliyyəti bu ardıcıllıqla ilə davam etmişdir: 2008-ci ildə Balakən Rayonu Gənclər və İdman İdarəsində gənclərlə iş üzrə aparıcı məsləhətçi, 2011-ci ildə Balakən Rayon İcra Hakimiyyəti başçısı Aparatında Sosial-iqtisadi məsələlər şöbəsində aparıcı məsləhətçi,2016-cı ildə Balakən Rayon İcra Hakimiyyəti başçısı Aparatının Sosial-iqtisadi inkişafın təhlili və proqnozlaşdırılması şöbəsində müdir müavini, 26.09.2022-ci il tarixdə isə qulluqda yüksəliş yolu ilə Balakən Rayon İcra Hakimiyyəti başçısının birinci müavini vəzifəsinə təyin olunub.

2011-ci ildən YAP-nın üzvüdür. Evlidir, 2 övladı var.