Category: Xəbərlər

0

📰 Şəhidlər unudulmur: Məhəmməd Ramazan oğlunun anım mərasimi
Bu gün Şəhidlər xiyabanında Vətənimizin igid oğlu, şəhid Abdullayev Məhəmməd Ramazan oğlunun anım günü tədbiri keçirildi. Tədbirdə şəhidin ailəsi, yaxınları, ictimaiyyət nümayəndələri, məktəblilər və gənclər iştirak edərək onun müqəddəs xatirəsini ehtiramla yad etdilər.
Çıxış edənlər Məhəmməd Ramazan oğlunun Vətən uğrunda göstərdiyi qəhrəmanlıqdan danışaraq, onun fədakarlığının gənc nəsil üçün örnək olduğunu vurğuladılar. Şəhidimizin həyat yolu və döyüş meydanında göstərdiyi igidliklər hər kəsin qəlbində dərin iz buraxıb.
Mərasimdə şəhidin məzarı önünə gül dəstələri qoyuldu, dualar oxundu. Məktəblilər və gənclər onun xatirəsinə həsr olunmuş şeirlər səsləndirdilər, şəhidin adını daim yaşatmaq üçün bir daha söz verdilər.
Bu cür tədbirlər bir daha göstərir ki, xalqımız öz qəhrəman övladlarını heç vaxt unutmur. Abdullayev Məhəmməd Ramazan oğlu kimi igidlərin xatirəsi hər zaman uca tutulacaq, onların ruhu gələcək nəsillərə milli qürur və vətənpərvərlik hissi aşılayacaq.

Yeni Balakən

0

Balakəndə şəhid ailələri ilə səmimi görüş

Bu gün Balakən Rayon İcra Hakimiyyətində (RİH) şəhid ailələri ilə geniş tərkibdə görüş keçirildi. Görüşdə həm Birinci Qarabağ, həm də İkinci Qarabağ müharibəsinin şəhid ailələri iştirak edirdi.

Tədbiri giriş sözü ilə açan rayon icra başçısı Natiq Ağayev şəhid ailələrini görməkdən və tanımaqdan məmnunluq duyduğunu bildirdi. O, hər bir ailəni dinləməyə, onların problemlərinə dəstək olmağa və kömək etməyə hazır olduğunu vurğuladı.

Başçı öz həyat yolundan da söz açaraq 35 ilini hərbi xidmətə həsr etdiyini, Birinci Qarabağ müharibəsinin iştirakçısı olduğunu, Dövlət Təhlükəsizlik Xidmətində mühüm tapşırıqlar yerinə yetirdiyini qeyd etdi. “Müharibə mövzusu mənə yad deyil, od-alovun içindən çıxmışam,” – deyə o, şəhid ailələrinin dərdini daha dərindən anladığını ifadə etdi.

Sadəliyi və təvazökarlığı ilə seçilən Natiq müəllim işçilərinə və digərlərinə ona “cənab başçı” deyə müraciət etməyi qadağan edərək, xalqa xidmət üçün göndərildiyini, səmimiyyətini isə tədbir boyu ayaq üstə dayanaraq göstərdi. İki saata yaxın davam edən görüşdə şəhid ailələrinin problemləri dinlənildi, bir çox məsələlərin yerindəcə həllinə göstəriş verildi, digərlərinə isə qanun çərçivəsində izahlar verildi.

Başçı ailələrə tövsiyə edərək bildirdi: “Şəhidlik müqəddəs məqamdır. İcazə verməyin ki, kimlərsə bu adı şəxsi məqsədləri üçün istifadə etsin.”

Şəhid ailələrinin irəli sürdüyü təkliflərin bir çoxu artıq Balakən üçün planlaşdırılan işlər siyahısında idi. Natiq Ağayev yaxın günlərdə rayonun su-kanalizasiya sisteminin yenidən qurulacağını, su probleminin həll olunacağını müjdələdi.

Çıxış edən ailələr başçını “Balakənə xoş gəldiniz” sözləri ilə salamlayaraq ona uğurlar arzuladılar. Cavabında Natiq Ağayev vurğuladı: “Çalışdığım bütün sahələrdə birinci olmuşam, ən yüksək mükafatlara layiq görülmüşəm. Burada da üzü ağ, alnı açıq işləyəcəyəm. Fəaliyyətim həm sizlər həm də Prezident qarşısında şəffaf olacaq və bunu bütün qurumlardan da tələb edəcəyəm.”

O, Balakənə təyin olunmağından qürur duyduğunu, yeni iş yerlərinin açılacağını, rayonun nümunəvi bölgəyə çevriləcəyini bildirdi. “Əziz şəhid ailələri, mənim uğurlarımda sizin dəstəyiniz vacib və arzulanandır. Güvənimiz qarşılıqlı və dəyərlidir,” – deyə icra başçısı çıxışını tamamladı.

                                                                           Yeni Balakən

P.S.Bəziləri vardır ki,birlikdən,gücdən qorxarlar,xoflanırlar,əndişə duyarlar- halbuki bu güclə dost olmaq,bundan yaxşı məqsədlərdə istifadə etmək varkən.Bunlardan biri olan sabiq başçı İslam Rzayev,şəhid ailələrinin Balkəndə böyük güc olduğunu görərək bundan hər zaman narahat idi.Bəzilərinin xətalarından,eqosundan məhərətlə istifadə edən sabiq başçı şəhid ailələrini üç yerə bölüb birini digərinə qarşı qoyaraq,-Parçala,hökm et!-prinsipi ilə qarşısına çıxacaq tək gücü də neytrallaşdırmışdı.Qruplar arası körüklənən bixoş münasibət çox da dərinləşmədən,səbəbkar və “maşa”lar bu bədbəxtçilik üzərində qurulan “xöşbəxliyin” “həzzini” yaşarkən bir anda rayonda maskalı doktorlar peyda oldu və artıq sancı verməyə başlayan bu “kör bağırsağı” əməliyyat etdilər..

İlkin peşə etibarıyla həmən doktorlardan olan Natiq Ağayevə qalan isə əməliyyat sonrası da steril şəraiti yaratmaqla reanimasiya  prosesini uğurla tamamlamaq,xəstə idarəetməni tam sağaldaraq həyata bəxş etməkdir.

0

Deputat Balakənli seçicilərin istəklərini Milli Məclisdə səsləndirdi.

Artıq iki gündür, 2026-cı ilin Dövlət büdcəsi haqqında qanun layihəsi hökumət üzvlərinin birgə iştirakı ilə Milli Məclisin plenar iclasında müzakirəyə çıxarılıb. Hələ sabah da davam edəcək müzakirələrdə deputatlar öz fikirlərini səsləndirir, vətəndaşları narahat edən məsələlərə toxunur, təklif və rəylərini bildirirlər. Səsləndirilən fikirlər içərisində hörmətli deputatımız Nəsib Məhəməliyevin toxunduğu bir sıra ciddi narahatlıq doğuran məqamlar var ki, onu izləyicilərin diqqətinə çatdirmağı zəruri hesab edirik.

Millət vəkili hökumət üzvləri qarşısında seçiciləri narahat edən bir sıra məqamlara da toxunub,problemləri də qaldırıb:
“Bir millət vəkili olaraq fürsətdən istifdə edərək, təmsil olunduğum Balakən rayonunun seçiciləri tərəfindən qaldırılmış bəzi problemləri diqqətinizə çatdırmağı özümə borc bilirəm.
1. Regionların 2019-2023 illərdə sosial-iqtisadi inkişafı Dövlət Proqramında Balakən rayonu üzrə həyata keçirilməsi nəzərdə tutulan tədbirlərin icrasının başa çatdırılması.
2. Rayon mərkəzindən 18 km aralıda yerləşən və 30 min əhalinin yaşadğı Qabaxçöl qəsəbə xəstəxanasının yenidən tikilməsi. Bu barədə cənab Prezidentin müvafiq göstərişi olmuşdu və aidiyyəti mərkəzi icra orqanları tərəfindən razılıq əldə olunmuşdu. Əgər, yenidən inşası mümkün olmasa, hökumətdən kapital təmir üçün vəsaitin ayrılmasını xahiş edirəm.
3. Balakən dağətəyi rayondur və eko, aqro və digər turizm sahələrinin inkişafı üçün münbit şərait mövcuddur. Bu baxımdan, Katexçay şəlaləsinin turizm marşrutuna daxil edilməsi məqsədə uyğun olardı. Hesab edirəm ki, Milli Qoruqlardan və biosferadan istifadə haqqında qanun qəbul edilməsi, dağətəyi rayonlarda turizmin inkişafına, məşğulluq səviyyəsinin yüksəlməsinə, sosial problemlərin həllinə xidmət edərdi.
4. Rayon ərazisindən axan Dağ çayları sistemində beton-bənd, sahil bərkitmə işlərinin aparılması.
5. İşsizliyin aradan qaldırılması istiqamətində, Özünü məşğulluq proqramlarının genişləndirilməsi.”

Nəsib müəllimin qaldırdığı bu məsələlərin müsbət həlli Balakənin iqtisadi,sosial həyatında önəmli ölçüdə dəyişikliklər yaradacağı aşıkardır.Balakənlinin səsi olduğunu bir daha göstərən hörmətli millət vəkilimizə uğurlar və qaldırdığı məsələlərin qısa zamanda həllini tapmasını dilyəyirik.

                                                                                                                             Yeni Balakən

0

Vətən uğrunda canını fəda edən igid: Faiq İbadovun anım günü keçirildi

Balakən rayonunun Sarıbulaq kəndində doğulmuş və Vətən uğrunda şəhid olmuş Faiq İbadovun xatirəsi bu gün doğma kəndində ehtiramla anıldı.

Faiq İbadov 1993-cü il mayın 31-də Sarıbulaq kəndində dünyaya göz açıb. 1999-2010-cu illərdə M.F.Axundov adına Sarıbulaq kənd tam orta məktəbində təhsil alaraq, gənclik illərini vətənə sevgi ilə yoğrulmuş bir mühitdə keçirmişdir. 2011-ci ildə müddətli həqiqi hərbi xidmətə çağırılan Faiq, 2011-2013-cü illərdə Azərbaycan Silahlı Qüvvələrinin “N” saylı hərbi hissəsində xidmət etmişdir.

2020-ci il sentyabrın 27-də başlanan Vətən müharibəsində Suqovuşanın azadlığı uğrunda gedən döyüşlərdə iştirak edən Faiq İbadov, oktyabrın 1-də qəhrəmancasına şəhid olmuşdur. Doğma Sarıbulaq kəndində torpağa tapşırılan igid əsgər, Azərbaycan Respublikasının Prezidenti İlham Əliyevin 15 dekabr 2020-ci il tarixli Sərəncamına əsasən ölümündən sonra “Vətən uğrunda” medalı ilə təltif edilmişdir.

Ailəli olan Faiq İbadovun bir oğlu — İsmixan yadigar qalmışdır.

Bu gün Sarıbulaq kəndində şəhidin anım günü münasibətilə tədbir keçirildi. Tədbirdə Balakən Rayon İcra Hakimiyyəti, Sarıbulaq kənd tam orta məktəbi, Peşə məktəbi, YAP Balakən rayon təşkilatı, Səfərbərlik və Hərbi Xidmətə Çağırış üzrə Dövlət Xidməti, rayon polis şöbəsi, din xadimləri, Dini Qurumlarla İş üzrə Dövlət Komitəsi, qeyri-hökumət təşkilatları, kənd ictimaiyyəti və şəhid ailələri iştirak etdilər.

Məktəblilər və şəhidin oğlu İsmixan tədbirdə atasına həsr olunmuş şeirlər səsləndirdilər. Qonaqlar çıxış edərək Faiq İbadovun qəhrəmanlığından, onun Vətənə olan sevgisindən və gənclərə örnək olan həyat yolundan danışdılar. Tədbir şəhidin evində keçirilən dini mərasimlə yekunlaşdı.

                                                                                            Ramazan Abal

0

Yeni başlanğıc: Natiq Ağayevin ilk vətəndaş qəbulu

Balakən Rayon İcra Hakimiyyətinin yeni başçısı Natiq Ağayev bu gün ilk dəfə vətəndaşlarla rəsmi görüş keçirdi. Qəbul RİH binasında baş tutdu və yerli sakinlərin müxtəlif sosial, iqtisadi və məişət məsələləri ilə bağlı müraciətləri dinlənildi.

Bilindiyi kimi, Balakən RİH-də vətəndaş qəbulları hər həftənin üçüncü günü İcra Hakimiyyətinin inzibati binasında, dördüncü günlər isə kənd və qəsəbələrdə keçirilir. Bu görüşlər rayon rəhbərliyinin vətəndaşlara daha yaxın olmaq, onların problemlərini yerindəcə dinləmək və operativ həll yolları tapmaq məqsədini daşıyır.

Natiq Ağayevdən öncə onun Göyçayda vətəndaş sevgisi ilə qazandığı ad-sanı, ünü gəlib çatmışdı Balakənə. Bəlkə bu, bəlkə də gəldiyi ilk gündən Balakəndə gördüyü işlərin sakinlərdə yaratdığı xoş təəssürat, inam hissi idi — bilmirik. Amma bir şey aydın idi: bu günki qəbulda xeyli insan vardı. Xeyli də dərd, problem gətirmişdilər. Sanki uzun illərin dərd-sərlərinə çarə, ümid işığını görürdülər Natiq Ağayevin nurlu üzündə, dodaqlarının arasından çıxacaq hər kəlməsində, sözündə… Elə olacağa da bənzəyirdi.

Başçı hər bir müraciəti diqqətlə dinləyərək, aidiyyəti üzrə tapşırıqlar verdi və problemlərin mərhələli şəkildə həll olunacağını bildirdi. Bu görüş, Balakəndə yeni bir idarəçilik ruhunun doğulduğunu göstərdi — həm ümidli, həm də insanlara yaxın.

“İnsanların dərdini dinləmək, onları eşitmək — bizim borcumuzdur.” — Natiq Ağayev

                                                                                                    Ramazan Abal

2

Yazılarımızın birində qeyd etmişdik S.Gözəlov küçəsindəki vəziyyətdən,küçə ticarətindən,səbəblərindən və sairə barədə yazacağıq,geniş müzakirə edəcəyik deyə..Anonsunu verdiyimiz hər mövzunu ətraflı ələ alacağıq gedişata nəzərən.

Bilidiyimiz kimi rayon rəhbəri dəyişdi,bu dəyişiliklə bərabər Balakənlilərin  ümidləri cücərdi, müsbətə,yaxşıya doğru olmasını istədiyi,ümid etdiyi,arzuladığı bir çox gözləntiləri də varlığını hiss etdirməyə başladı..İstəklərdən  biri S.Gözəlov küçəsində bazarın qarşısındakı 15 il davam edən əcaib,diskonfort vəziyyətin,eybəcərliyin düzəlməsi idi.Nəhayət ki,rayona yeni təyin olunan başçı Natiq Ağayevin sakinlərin gözləntilərinin,arzularının reallaşmasına doğru atdığı ilk addımlarından biri 15 illik küçə ticarətini,S.Gözəlov küçəsindəki xaotik,eybəcər vəziyyəti düzəltməsi,küçəni qaydaya salması oldu.İndi bazarın qabağı güllük,gülüstanlıqdır.Səliqə,səhman,qayda,qanun.Maşın dayanacaqları üçün xətlər çəkilib,qanunsuz nə qədər quraşdırılmış əlavələr vardısa hamısı sökülüb,avtomobil yolunun içindəki və səkilərdəki ticarət tamamilə yığışdırılıb..Bu əməli işə, mənzərəyə baxanda sanki başçının daxili aləmini,mədəniyyətini,Balakənə yanaşmasını,Balakənliyə xidmətini,işinə məsuliyyətini,dövlət başçısına verdiyi sözə,vədə sədaqətini görürsən.Hər kəsə ləzzət edir bu gözəllik,səliqə-səhman,rahatçılıq.Amma hər kəsdə bir əndişə,narahatçılıq da var ki,bu gözəlliyin ömrü nə qədərdir?..

Natiq Ağayevin daha gözəl bir addımı isə,mən bunun maddi,texniki tərəfindən daha çox mənəvi tərəfini dəyərləndirirəm.Belə ki,uzun illər az qala sovetlər dönəmindən bağlı qalan bir küçə vardı,indiki adıyla Zərifə Əliyeva küçəsi.Küçənin bağlı qalmasına bahənə kimi səbəb  o küçədə məktəb girişinin olması deyilirdi amma əsil səbəbi isə o küçədə gələn bütün başçıların qaldığı,qalması üçün nəzərdə tutulan evin olması idi.”Padişahlar” istəmirdilər maşın səsləri onları narahat etsin,Zərifə xanımın adını daşıdığı küçəni ancaq özləri üçün istifadə edirdilər.Natiq Ağayev o mifi dağıtdı, küçəni açdı,giriş-çıxışı əngəlləyən şlaqbaumu sökdürüb atdırdı.Beləliklə həm Zərifə Əliyeva adının hörmətini,həm də o küçədə hərəkət edəcək sakinlərin rahatçılığını qaytardı.Məktəbin giriş hissəsində küçəyə  sürəti məhdudlaşdırıcı fiziki əngəl quraşdırıldı,küçə bir tərəfli hərəkətə istiqamətləndirildi,yol hərəkəti nişanları taxıldı. Son 15 ildə yığılan,qalaqlanan problemlərin kiçicik hissəsi idi bunlar…

Nə deyək, gözəl başladı Natiq Ağayevin ilk işləri,ilk günü.Xalq deyir ki,davamı gəlsin.Görünən odur ki,hörmətli başçının hələ görəcəyi çox işi var. Uğurlar arzulayırıq.

Balakən tarixinə yol açan biri kimi düşmək gözəldir.

                                                                                               Ramazan Abal

1

Azərbaycan Respublikası Prezidentinin Sərəncamı ilə Balakən Rayon İcra Hakimiyyətinin başçısı təyin olunan

Natiq Nuşravan oğlu Ağayev noyabrın 13-də Azərbaycan Respublikası Prezidentinin köməkçisi – Prezident Administrasiyasının Ərazi-təşkilat məsələləri şöbəsinin müdiri Zeynal Nağdəliyev tərəfindən rayon ictimaiyyətinin nümayəndələrinin iştirakı ilə kollektivə təqdim olunub.

“Yeni Balakən”  xəbər verir ki, Zeynal Nağdəliyev təqdimatda çıxış edərək, dövlətimizin başçısının tapşırıq və tövsiyələrini çatdırıb.

N.Ağayev ona göstərilən etimada görə minnətdarlıq edib.

1

İCRA BAŞÇILARININ YERİ NİYƏ DƏYİŞDİRİLDİ ? – ZƏRURİ SƏBƏBLƏR VƏ MÜHÜM GÖZLƏNTİLƏR

Prezident İlham Əliyev müxtəlif bölgələrə yeni rəhbərlər təyin etdi. Fuad Nəcəfli Prezidentin Naxçıvan Muxtar Respublikasındakı səlahiyyətli nümayəndəsi vəzifəsindən azad edildi. Mahiyyət etibarı ilə səlahiyyətli nümayəndəlik xüsusi nümayəndəliklə birlikdə yeni regional idarəetmə modeli idi. Bu həm kadrlar, həm yeni yaradılan sistem üçün bir imtahandır. Görünür ki, Fuad Nəcəfli bu imtahandan keçə bilmədi. Son zamanlar Muxtar Respublikadan olan bəzi ictimaiyyət nümayəndələri problemlərlə bağlı öz narazılıqlarını ifadə edirdilər. Eyni zamanda Fuad Nəcəflinin Muxtar Respublikadakı qurumların fəaliyyətinə müdaxiləsi də hiss edilirdi. Məsələn, Naxçıvanda bəzi qurumların, o cümlədən Ali Məclisin rəhbəri yoxdur. Bu ümumi idarəetmə sisteminə mənfi təsir göstərən amildir. Yəni təyin edilən səlahiyyətli nümayəndə Ceyhun Cəlilov isə nisbətən gənc və daha mülayim kadr imici yaradır. Cəlilov Azərbaycanın ASAN Xidmətlə bərabər ən uğurlu lahiyyərltindən olan DOST Xidmətin rəhbərliyində çalışıb. Sonradan Naxçıvan Muxtar Respublikasının Əmək və Əhalinin Sosial Müdafiəsi naziri, daha sonra isə Muxtar Respublikasının Baş Naziri olub. Həm yeni idarəçilik metodunu mənimsəyib, həm də Naxçıvanın idarəçiliyində yaxından iştirak edib. Eyni zamanda muxtar respublika əhalisinin problemlərini bu sahəyə rəhbərlik etmiş şəxs olaraq dərindən bilir ki, bu önəmli faktdır. Çünki Naxçıvanda əhalinin sosial məsələlərinin və idarəetmənin sağlamlaşdırılmasına ciddi şəkildə ehtiyyac var. Ceyhun Cəlilov bu baxımdan uğurlu kadrdır. Dövlət başçısı eyni zamanda Elşən Həsənlinin Kürdəmir rayon İcra Hakimiyyətinin başçısı təyin edilməsi haqqında da Sərəncam imzaladı. Elşən Həsənli bu təyinata qədər Bakı şəhəri Sabunçu rayon İcra Hakimiyyəti başçısının 1 – ci müavini olub. İcra strukturlarında yetişmiş kadrdır. Eyni zamanda bu sahədə icra başçılarının strukturun öz daxilindən gəlməsi ənənəsini də qoya bilər. İlham Əliyev həmçinin Elxan İbrahimovu Kürdəmir rayon İcra Hakimiyyətinin başçısı vəzifəsindən azad edərək Bakı şəhəri Nəsimi rayon İcra Hakimiyyətinin başçısı təyin etdi. Elxan İbrahimov Azərbaycanda Qərb təhsilli yeganə rayon rəhbəridir. Dövlət başçısının onu paytaxtın mərkəzinə təyin etməsi son zamanlar Bakıda keçirilən beynəlxalq tədbirlərin təşkili baxımından əhəmiyyətlidir. İnnovativ və geniş xaric dil bilgisi olan kadrların paytaxt rayonlarına rəhbər təyin edilməsi həm Bakının idarəetməsinin müasirləşdirilməsi, həm də xarici tədbirlərin daha səmərəli keçirilməsinə yardım edəcəkdir. Prezident İlham Əliyev Vüqar Novruzovu Naftalan şəhər İcra Hakimiyyətinin başçısı vəzifəsindən azad edərək Göygöl rayon İcra Hakimiyyətinin başçısı vəzifəsinə, Orxan Mürsəlovu isə Gədəbəy rayon İcra Hakimiyyətinin başçısı vəzifəsindən azad edərək Göyçay rayon İcra Hakimiyyətinin başçısı təyin edilməsi haqqında Sərəncam imzaladı. Hər iki icra başçısının başqa rayonlara təyinat alması onların əvvəl işlədiyi bölgələrdə etimadı doğrultduğunu göstərir. Dövlət başçısı eyni zamanda Elvin Paşayevi Göygöl rayon İcra Hakimiyyətinin başçısı vəzifəsindən azad edərək Qax rayon İcra Hakimiyyətinin başçısı təyin edilməsi haqqında Sərəncam imzaladı. Elvin Paşayev Kənd Təsərrüfatı Nazirliyindən gəlmiş kadrdır. Bölgələrdə bu sahələrin dirçəldilməsinə ciddi ehtiyac var. Qaxda həbs edilmiş icra başçısı Musa Şəkiliyevin dövründə buraxılmış kobud səhvlərə görə aqrar sahənin inkişafı xeyli geridə qalırdı. Yeni icra başçısının ilk işi ehtimal ki, Qaxda kənd təsərrüfatı sahəsinin canlandırılması olacaq. Prezident İlham Əliyev həmçinin Natiq Ağayevin Göyçay rayon İcra Hakimiyyətinin başçısı vəzifəsindən azad edilərək Balakən rayon İcra Hakimiyyətinin başçısı təyin edilməsi haqqında Sərəncam imzaladı. Natiq Ağayev uzun illər təhlükəsizlik orqanlarında çalışıb, 2022 – ci ildə Göyçaya icra başçısı təyin edilib. Əvvəlki icra başçısı İslam Rzayevin dövründə buraxılan olduqca ciddi səhvlər, bir çox sahədə baş qaldıran nöqsanlar rayonda DTX – nın əməliyyat keçirməsi və icra başçısının həbs edilməsi ilə nəticələndi. Qeyd edim ki, Natiq Ağayev Balakən tarixində icra başçısı təcrübəsi olan ilk rayon rəhbəri kimi tarixə düşəcək. Azərbaycan müstəqillik qazandıqdan sonra Balakənə heç vaxt başqa rayonda təcrübəsi olan icra başçısı təyin edilməyib. Bu isə rayon idarəçiliyinə daha peşakar yanaşmanın göstərilməsi baxımından önəmlidir. Natiq Ağayevin Balakəndə mövcud olan bir çox problemi yerinə qoyacağı, sağlam mühit yaradacağı da şübhəsizdir. Yeni icra başçısının Göyçayda göstərdiyi müsbət nəticə, haqqında söylənilən yüksək fikirlər bu fikirlərin formalaşması üçün ciddi zəmin hazırlayır.

Politoloq-tarixçi

Zeynal Əmralıyev

P.S.Bəziləri deyir ki,rayona nə tez başçı qoyuldu..İdarəetmə heç nəyi,heç kimi gözləmir.İlin sonuna yaxın bütün rəhbərlik yerləri tam səlahiyyətlilərlə dolu olmalıdır,çünki noyabr ayı və büdcə işləri gələn ilin, 2026-cı ilin büdcə proqnozlarının,dəqiqləşmələrinin rayon və şəhərlərdən mərkəzə təqdim olunduğu,rayon rəhbərlərinin imzasıyla təsdiq olunduğu ay və işlərdəndəndir.

1

ELAN

Əziz Dostlar – hörmətli söz sərrafları, görkəmli şairimiz Surağat Qurbaninin “BU TORPAĞA VURULMUŞAM” kitabının təqdimat mərasimi Balakən rayonu Katex kənd Surağat Qurbanov adına 1 saylı tam orta məktəbdə noyabrın 28 də saat 13:30-da,Balakən şəhər MKS-nin binasında, dekabrın 1-i saat 15:00-da keçiriləcək.

Dəvətlisiniz.

Azərbaycan Respublikası Prezidentinin Sərəncamı ilə Natiq Nuşravan oğlu Ağayev Balakən rayonuna icra başçısı təyin olundu.
Azərbaycan Respublikası Konstitusiyasının 124-cü maddəsinin II hissəsini rəhbər tutaraq qərara alıram:
Natiq Nuşravan oğlu Ağayev Göyçay Rayon İcra Hakimiyyətinin başçısı vəzifəsindən azad edilsin.
Başqa bir sərəncamla Natiq Ağayev Balakən rayonuna icra başçısı təyin olunub..
12 noyabr 2025, 13:12