Balakənin gözəlliyi təkcə təbiətində deyil, insanlarında da əks olunur. Lakin bu gözəlliyin içində bir narahatlıq var: rayonun küçələrində piyadalar üçün nəzərdə tutulmuş səkilər, əslində, piyadaların deyil, betonun hökm sürdüyü sahələrə çevrilib.
Səki deyil, divar: 90 dərəcəlik “qalxış”
Rayonun bir çox küçələrində səkilər tam 90 dərəcə bucaqla inşa olunub. Bu, nəinki estetik baxımdan uyğunsuzdur, həm də funksional olaraq ciddi problemlər yaradır. Əlil arabası ilə hərəkət edən vətəndaşlar bu səkiləri istifadə edə bilmirlər. Uşaqlı analar da uşaq arabasını bu sərt bucaqlı səkilərə qaldıra bilmədikləri üçün avtomobil yoluna çıxmaq məcburiyyətində qalırlar.
Piyadalar yolda, sürücülər əsəbi
Səkilərin düzgün qurulmaması səbəbindən piyadalar avtomobil yolunun içərisində hərəkət edir. Bu isə həm qəza riskini artırır, həm də sosial gərginlik yaradır. Bəzi sürücülər piyadalara siqnal verir, kobud ifadələr işlədir, hətta maşını onların üstünə sürür. Bu davranışlar cəmiyyətin mədəni səviyyəsinə yaraşmır və insan ləyaqətinə ziddir.
Hər kəs üçün əlçatan səki necə olmalıdır?
Müasir şəhərsalma prinsiplərinə görə, səkilər tədricən yüksəlməli və enişlər də eyni şəkildə olmalıdır. Panduslar – yəni meyilli keçidlər – əlillər, analar və yaşlılar üçün vacibdir. Səki eni ən azı 1.5 metr olmalı və heç bir obyekt tərəfindən zəbt edilməməlidir.
Həll yolları: Bu problemin həlli üçün rayon icra hakimiyyəti və bələdiyyə strukturları tədbir görməlidir. Layihələndirmə işlərinə yenidən baxılmalı, sakinlərin ehtiyacları nəzərə alınmalıdır. Eyni zamanda, yerli media olaraq bu məsələ gündəmdə saxlanılacaq, sakinlərin səsi eşitdiriləcəkdir.
Balakənin səkiləri sadəcə beton parçası deyil – onlar insanların gündəlik həyat yoludur. Bu yolun təhlükəsiz, rahat və hər kəs üçün əlçatan olması cəmiyyətin inkişaf göstəricisidir. Səkiyə qalxa bilməyən bir ana, yolun ortasında qalan bir əlil, bezmiş bir piyada – bunlar sadəcə statistik deyil, real insanlardır. Onların səsi olmağın vaxtıdır.
Ramazan Abal
