Yeni Balakən qəzeti

0

Azərbaycan artıq üçüncü dəfədir ki, ECO-nun Zirvə görüşünə ev sahibliyi edir.
Əvvəlki iki Zirvə görüşü 2006-cı və 2012-ci illərdə paytaxt Bakida keçirilmişdi.İqtisadi Əməkdaşlıq Təşkilatı 1985 -ci ildə üç ölkənin -İran,Pakistan və Türkiyənin Təşəbbüsü ilə yaradılıb.Təşkilatın əsas məqsədi redional iqtisadi əməkdaşlığı genişləndirmək və nəqliyyat infrastrukturunu dərinləşdirmək idi.

Sovet İttifaqı dağılandan sonra İƏT -in əhatə dairəsi xeyli genişləndi.Mərkəzi Asiya ölkələri -Qazaxıstan,Qirğızistan,Özbəkistan və Tacikistan bu təşkilata üzv olublar.Qafqaz regionundan Azərbaycan 1992-ci ildən İƏT-ın üzvləri sırasına daxildir.Bu genişlənmə təşkilata siyasi baxımdan yeni imkanlar qazandırdı.Azərbaycan bu proseslərdə fəal iştirakla regionun ən strateji coğrafi mövqedə yerləşən ölkə kimi ön plana cıxdı.Ən əsası isə budur ki, Azərbaycan bu təşkilatı yalnız iqtisadi funksiyaları yerinə yetirən bir qurum kimi görmür.
Bakı üçün bu qrum ölkənin öz siyasi modelini ,sabitlik yanaşmasını ,regional baxışını üzv ölkələrə ötürmək üçün yaxşı bir platformadır.Artıq Azərbaycanın təşəbbüsü ilə bir çox beynəlxalq tədbirlər keçirilir.
Ölkəmizin təşəbbüsü ilə İƏT çərçivəsində indiyədək bir sıra mühüm layihələr həyata keçirilib. Bakı şəhərində təşkilatın bir neçə yüksək səviyyəli sammitinə və nazirlər görüşünə ev sahibliyi gerçəkləşdirilərək respublikamızın regional əməkdaşlıqda fəal mövqeyi nümayiş etdirilib.
Azərbaycan zəngin enerji resurslarına malik ölkə olaraq İƏT məkanında enerji təhlükəsizliyinin təminində mühüm tərəfdaşdır. Neft, qaz və bərpa olunan enerji sahəsində həyata keçirilən layihələr təşkilatın üzv dövlətləri ilə enerji əməkdaşlığını gücləndirir. Azərbaycan qazının TANAP və TAP boru kəmərləri ilə Avropaya nəql edilməsi İƏT-in üzvü olan Türkiyə və digər region ölkələri üçün enerji təchizatında alternativ marşrutların açılmasına şərait yaradır.
Bununla yanaşı, ölkəmiz bərpa olunan enerji sahəsində də təcrübəsini paylaşaraq “yaşıl” enerji təşəbbüslərinin dəstəklənməsində fəal iştirak edir. İƏT-in dayanıqlı inkişaf gündəliyinə uyğun olaraq Azərbaycan ekologiya, iqlim dəyişikliyi və rəqəmsal transformasiya sahəsində də birgə təşəbbüsləri dəstəkləyir.
“Yaşıl enerji zonası” elan olunan Qarabağ və Şərqi Zəngəzur bölgələri bu baxımdan potensial əməkdaşlıq məkanları kimi diqqət çəkir. Bundan əlavə, rəqəmsallaşma və innovasiya sahəsində Azərbaycanın təcrübəsi təşkilatın digər üzvləri üçün nümunəvi model rolunu oynaya bilər. Elektron hökumət, vergi islahatları və biznes mühiti üzrə modern yanaşmalar üzv dövlətlərlə paylaşılaraq qarşılıqlı öyrənməyə zəmin yaradır.

Bugünkü Zirvə görüşünün Qarabağda, Xankəndidə təşkil edilməsinin xüsusi mənası var. Ermənistanın işğalından azad edilmiş torpaqlarımızda artıq bir neçə mühüm beynəlxalq tədbir keçirilmişdir. Şuşada 2023-cü ildə ECO-nun Nazirlər Şurasını, 2024-cü ildə Türk Dövlətləri Təşkilatının ilk qeyri-rəsmi Zirvə görüşünü və bu ilin may ayında Laçında Azərbaycan, Türkiyə və Pakistan rəhbərlərinin üçtərəfli Zirvə görüşü.
Bu gün isə ECO-nun Zirvə görüşü Xankəndidə, yeni inşa edilmiş Konqres Mərkəzində keçirilir. İyulun 4-də Xankəndi şəhərində keçirilən İƏT-in 17-ci Zirvə Görüşündə yuxarıda vurğulanan məsələlər ətrafında geniş bəhs olunub.
Prezident İlham Əliyevin çıxışında Azərbaycanın İƏT-in işində həmişə fəal iştirak etdiyi, bu təşkilata üzv ölkələrlə əlaqələrin inkişafının daim diqqət mərkəzində saxlanıldığı, keçən il tarixdə ilk dəfə olaraq qurum məkanında COP29 konfransının reallaşdırıldığı, habelə həmin toplantıda inkişaf etməkdə olan ölkələrə maliyyə yardımının 100 milyarddan 300 milyard ABŞ dollarına qədər artırılmasının razılaşdırıldığı, İtki və Zərər Fondunun işlək vəziyyətə gətirildiyi diqqətə çatdırılıb.
Deputat Nəsib Məhəməliyev

Beynəlxalq münasibətlər və parlamentlərarası əlaqələr komitəsinin üzvü

0

2025-il iyun ayının 30-da Şəki Heydər Əliyev Mərkəzində, Azərbaycan Teatr Xadimləri İttifaqının xadimləri Şəki Zaqatala regional Mədəniyyət İdarəsinin tabeliyində olan əməkdaşlarla görüş keçirdi. Görüşdə Azərbaycan Respublikası Teatr Xadimləri İttifaqının sədri, Azərbaycanın Xalq Artisti, Teatr və Kino aktyoru Hacı İsmayılov, Xalq artisti, “İlham” miniatür teatrının direktoru, ADMİU-nin “Musiqili Teatr aktyoru” kafedrasının müdiri İlham Namiq Kamal,
ADMİU-nin “Teatr/Kino aktyoru” kafedrasının müdiri, Əməkdar artist, 3-cü dərəcəli “Əmək” ordenli professor, “Sənətkar” medalı laureatı, tanınmış aktyor və bədii qiraətçi Azad Şükürov,
Xalq artisti, Akademik Milli Dram Teatrının baş rejissoru işləmiş hal-hazırda Bakı Bələdiyyə Teatrının Baş rejissoru Mərasim Fərzəlibəyov,Əməkdar Mədəniyyət xadimi, Akademik Milli Dram Teatrının direktoru İlham Əsgərov,Şəki-Zaqatala Regional Mədəniyyət İdarəsinin rəisi Emil Bədəlov və bir sıra tanınmış teatr və kino xadimləri iştirak ediblər. Bu sahədə xidməti olan bəzi Mədəniyyət işçiləri Teatr Xadimləri İttifaqının Fəxri Fərmanları ilə təltif edilib.Xoş haldır ki,təltif olunanların arasında məşhur “Qara Volqa” filminin baş rolların ifaçılarında biri, Balakənlimiz olan tanınmış aktyor,bədii qiraətçi,Balakən Mədəniyyət Mərkəzinin direktoru Arzu Ocaqverdiyev də var.

Arzu Ocaqverdiyev tear sahəsindəki uğurlu fəaliyyətinə görə Azərbaycan Respublikası Mədəniyyət Nazirliyinin və Azərbaycan Teatr Xadimləri İttifaqının “Fəxri Fərman”ları ilə təltif olunub.Balakən mədəniyyəti, ölkə mədəniyyətinin bir çox sahələrində özünəməxsus yeri ilə seçilir,fərqlənir.Təbii ki,bu uğurların arxasında mədəniyyət sahəsindən anlayan Arzu müəllim kimi və digər peşəkar əməkdaşların zəhməti,əziyyəti,sənəti,fəaliyyəti durur..

Arzu Ocaqverdiyevi rayonumuz adından təbrik edir,işində,fəaliyyətində uğurlar diləyirik.Səsi,sorağı həmişə yüksəklərdən,təltiflərdən gəlsin.

Xəbər verildiyi kimi, Rusiyaya vizasız getmək hüququ olan xarici vətəndaşlardan ölkəyə giriş üçün QR kodu tələb olunacaq.

Belə ki, iyunun 30-dan etibarən Rusiyaya vizasız daxil olmaq istəyənlər “Gosuslugi RuID” vasitəsilə əvvəlcədən QR kodu əldə etməlidirlər.

Rusiyaya səyahətdən ən azı 3 gün əvvəl qeydiyyat tələb olunur: məlumatlarınızı, marşrutunuzu, səfər məqsədinizi daxil etməli və xarici pasportun şəkli,biometrik şəkil,3 variantda sistemin göstərdiyi şəkilləri rusca səsləndirərək səs yükləməlisiniz. Xarici vətəndaş fövqəladə hallarda girişdən 4 saat əvvəl də qeydiyyatdan keçə bilər,zərurəti yaradan sənədləri təqdim etmək şərtilə.

QR kod 90 gün ərzində etibarlıdır.Pilot rejim 2026-cı ilin iyun ayına qədər davam edəcək.

P.S. Bu layihə experimentaldır. Sınaq rejimindədir.Vətəndaş tərəfdən doldurulması könüllüdür.Rusiya dövləti tərəfindən məcburiyyət yoxdur.Əsasən quru sərhədlərindən giriş üçün nəzərdə tutulur,çünki hava yollarından girişdən öncə (qabaqcadan alınmış bilet vasitəsilə) gələn şəxs haqda məlumatlar sistemdə olur.

0

Müasir dövrdə ali təhsil müəssisələrində tələbələrin imtahanlarda yüksək nəticələr əldə etməsi onların bilik səviyyəsinin göstəricisi kimi qəbul edilir. Lakin təcrübə göstərir ki, bir çox hallarda tələbə imtahanda yüksək bal toplasa da, eyni mövzu üzrə bir müddət sonra sual verildikdə “bilirəm, amma izah edə bilmirəm” cavabını verir. Bu vəziyyət təhsildə əzbərləmənin, amma dərk etmənin olmadığını göstərir.

Araşdırmalar və müşahidələr göstərir ki, bu problemin əsas səbəblərindən biri bəzi dərs vəsaitlərinin və mühazirə materiallarının tərcümə olunmuş, yəni orijinal düşüncə tərzindən uzaq və tələbəyə yad formada təqdim olunmasıdır. Nəticədə bəzi tələbələr mövzunu anlayışla deyil, əzbərləmə ilə mənimsəyir və qısa müddətli hafizədə saxladığı məlumatı tətbiq edə bilmir. Bu hal bütün universitetlərə aid edilməsə də, əhəmiyyətli sayda ali təhsil müəssisələrində müşahidə olunur və təhsilin səmərəliliyinə təsir edən əsas faktorlardan biri kimi qiymətləndirilir.

Əslində, tələbə evdən çıxaraq tələbə həyatına qədəm qoyur, məqsədi bir mütəxəssis olaraq yetişmək və gələcəkdə peşəkar işçi kimi cəmiyyətə fayda verməkdir. Bu yol isə daha ali məktəbə qəbul zamanı ixtisas seçimi ilə başlayır. Lakin bəzən şagirdin maraq dairəsi dinlənilmədən, araşdırılmadan, sadəcə topladığı bala uyğun olaraq ixtisas seçilir. Nəticədə illər sonra həmin gənc anlayır ki, ya maraq dairəsində olmayan bir ixtisas üzrə təhsil alıb, ya da müasir dövrün tələblərinə uyğun gəlməyən, perspektivsiz bir sahəyə yönəlib.

Halbuki müasir texnologiya və informasiya dövrü tələb edir ki, istənilən sahədə qərar verilərkən daha dərindən araşdırma aparılsın, şagirdlərin maraq və potensialı nəzərə alınsın. Əgər bir gənc gələcəkdə peşəkar kadr olaraq yetişmək və çalışacağı müəssisədə daha məhsuldar olmaq istəyirsə, bu prosesin ilk şərti onun ÖZ İŞİNİN VURĞUNU olmasıdır. Sevdiyi, maraq duyduğu sahədə təhsil alan tələbə həm dərsi daha yaxşı anlayır, həm də gələcəkdə yüksək peşəkarlığa daha tez çatır.

Müasir dövrdə isə iş tapmaq bəziləri üçün olduqca rahat, digərləri üçün isə ən ağır və dəhşətli bir mərhələyə çevrilib. Universitet illərində ixtisasını dərindən öyrənən, psixologiya biliyinə malik olan, ünsiyyət bacarıqları zəngin, müasir texnologiyalara açıq, xarici dil biliklərinə sahib və bütün bunlarla yanaşı, netvorkingi– yəni əlaqələr şəbəkəsi – geniş olan bir tələbənin işsiz qalmaq ehtimalı çox aşağıdır. Əks halda, bu xüsusiyyətlərdən məhrum olan bir gənc üçün iş tapmaq prosesi həm psixoloji, həm də praktiki baxımdan çox çətin olur.

“Turan Tədris Mərkəzi”

Nəriman İbrahimov

0

Maqamedov Hacı Seyfullah oğlu – sədaqətli əmək, nümunəvi insanlıq.

Müxtəlif peşə sahələrində bəziləri işləri ilə, bəziləri isə şəxsiyyətləri ilə tanınır. Amma nadir hallarda bu iki xüsusiyyət bir insanda ahənglə birləşir. Balakənin tanınmış siması,görüşdüyü insanın üzündə təbəssüm yarada bilən,bir çoxumuzun ərkyana Hacı dayı deyə müraciət etdiyimiz, Maqamedov Hacı Seyfullah oğlu bu cür nadir nümunələrdəndir. O, 1961-ci il yanvarın 1-də (01.01.1961) anadan olub.Nizami adına şəhər 1 saylı tam orta məktəbi bitirib,1980-ci ildə hərbi xidmətə yollanıb.Hərbi xidmətdən qayıtdıqdan sonra Kənd Təsərrüffatı Texnikumunda iqtisadçı ixtisası üzrə qiyabi təhsil alıb.Ailəli,iki övlad atası,iki də nəvə babasıdır.

1983-cü ildən Balakən rayon Hərbi Komissarlığında təlimatçı,baş təlimatçı,şöbə rəisinin köməkçisi,hal hazırda isə qeydiyyat şöbəsinin müfəttişi vəzifəsində çalışır.İşini,iş yerini,kollektivini,xalqa xidmət etməyi sevəndir.İş yerinin,binanın,invertarların təmiz saxlanılmasından tutmuş 1941-45-ci il müharibəsi iştirakçılarının vəsiqələrinin bərpası,sənədlərinin qaydaya salınması,Çernobıl,Əfqanıstan veteranlarının,1992-ci il Qarabağ müharibəsi veteranlarının sənədlərinin bərpası,qaydaya salınması və bu kimi məsuliyyətli işlər Hacı müəllimin fəaliyyətində öz səliqə səhmanı,dəsti xətti ilə görünən və görülən işlərdəndir. Uzun illər Səfərbərlik və Hərbi Xidmətə Çağırış üzrə Dövlət Xidmətinin Balakən rayon şöbəsində xidmət edən Hacı müəllim peşəkarlığı, təvazökarlığı və səmimi münasibəti ilə həm kollektivin, həm də vətəndaşların dərin rəğbətini qazanıb.

Onun əmək fəaliyyəti sadəcə statistik göstəricilərlə ölçülməz. Bu, illərlə formalaşan insan münasibətləri, dərin etimad və yüksək etik davranışlarla dolu bir yolun hekayəsidir. İşə zamanında və məsuliyyətlə yanaşması, vətəndaş müraciətlərinə göstərdiyi diqqət və səbir, onu dövlət-məmur münasibətlərinin uğurlu nümunəsinə çevirib.

Rəhbər və vətəndaşlar nə deyir?

Şöbə rəisi:
“Hacı müəllim kollektivimiz üçün təkcə təcrübəli əməkdaş deyil, həm də dayaqdır. Onun həm gənclərə yön verdiyi yanaşması, həm də prinsipial mövqeyi bütün iş prosesində özünü göstərir. Onunla çalışmaq özü bir məktəbdir.”

Qabaxçöllü vətəndaş:
“Mən ilk dəfə müraciət edəndə tərəddüd içində idim. Amma Hacı müəllimin səmimiyyəti, diqqətlə dinləməsi və problemi qısa zamanda həll etməsi məni çox sevindirdi. Onun kimi məmurlar dövlətə və insanlara ümid bəxş edir.”

Gənc əməkdaş:
“Hər gün ondan nəsə öyrənirik. Yalnız işgüzarlığı deyil, insanlara yanaşması, sakitliyi və mədəni davranışı bizi də dəyişdirir. O bizim üçün bir örnək, istiqamətdir.”

Söhbətimizin sonunda Hacı müəllimdən onun barəsində “Yeni Balakən” qəzetində gedəcəyi yazı haqda fikrini soruşuram:

Alqışlayıram.Təqdirə layiqdir.Yazı sadəcə mənim barəmdə,şəxsim haqda olduğu üçün demirəm,ümumiyyətlə uzun müddət işləyən,xidməti,iş təcrübəsi olan,vətəndaş rəğbətini,xalq sevgisini qazanmış insanları tanıtmaq,onları unutmamaq üçün tarixin yaddaşına qeyd edərək saxlamaq,əbədiləşdirmək,uzun illərə dayalı iş və həyat təcrübəsindən istifadə etmələri, yeni,gənc nəsillərə,əməkdaşlara bir yol,cığır,örnək olaraq göstərmək,təbliğ etmək baxımından yerində və əvəzsizdir.”Yeni Balakən”in bu cürə yanaşması,diqqəti,səmimiyyəti üçün təşəkkür edirəm.
Yol göstərən izlər..

Hacı müəllimin portreti yalnız zahiri nüfuz deyil, həm də onun xarakterinin bir güzgüsüdür: sakit, ciddi, dinləməyi bacaran və heç vaxt insanlarla münasibətdə etik çərçivələri pozmayan. Onun fəaliyyəti – həm rəsmi vəzifə, həm də insani missiyadır.

Gələcək nəsillər bu cür nümunələrlə yetişdikcə, cəmiyyət daha da güclənəcək. Onun həyatı və fəaliyyəti bir daha sübut edir ki, istedad, zəhmət və vicdan birləşəndə, ortaya unudulmaz izlər çıxır.

Ramazan Abal

26 iyun 2025-ci il.

0

Balakən rayon Hədisov adına Yeni Şərif kənd tam orta məktəbinin akt zalında Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Balakən rayon Komissiyasının təşkilatçılığı ilə 26 İyun- “Narkotik vasitələrin sui-istifadəsi və qanunsuz dövriyyəsi ilə Beynəlxalq Mübarizə Günü” ilə əlaqədar tədbir keçirildi. Tədbiri giriş sözü ilə açan rayon icra hakimiyyəti başçısının birinci müavini, Narkotik Vasitələrin Qanunsuz Dövriyyəsinə Qarşı Mübarizə üzrə Balakən rayon komissiyasının sədri Turan Dibirov narkomaniyanın insanların həyat və sağlamlığına, mənəvi-əxlaqi dəyərlərə və sosial-iqtisadi inkişafa mənfi təsirləri barədə ətraflı məlumat verərək, narkomaniyanın və onun törədə biləcəyi fəsadların qarşısının alınmasında gənclərin üzərinə düşən ictimai vəzifələr barədə tədbir iştirakçılarını məlumatlandırmışdır.

Tədbirdə iştirak edən Vətən Müharibəsi Qəhrəmanı Fərid Əliyev, rayon prokurorunun köməkçisi Qabil Əlizadə, Qabaqçöl polis bölməsinin rəisi, polis polkovnik leytenantı Vilayət Allahverdiyev, Səfərbərlik və Hərbi Xidmətə Çağırış üzrə Dövlət Xidmətinin Balakən rayon şöbəsinin zabiti Niyazi Şirinov, Şəki-Zaqatala Regional Gənclər və İdman İdarəsinin Balakən rayonu üzrə sektor müdiri Rasim Paçalov mövzu ətrafında çıxış etmiş, narkomanlığa qarşı mübarizənin hər bir vətəndaşın bilavasitə vəzifəsi olduğunu vurğulamışlar.

Daha sonra tədbir iştirakçılarına rayon Mədəniyyət Mərkəzi tərəfindən təqdim olunan “Külə dönmüş arzular” tamaşası təqdim olundu. Tamaşa izləyicilər tərəfindən maraqla qarşılanıb.

Tədbirin sonunda “Külə dönmüş arzular” tamaşasının iştirakçılarına “Təşəkkürnamə” və hədiyyələr təqdim olundu,xatirə şəkillər çəkildi.

1

Bir çox kollektivlərlə,dəfələrlə Qarabağa səyahət etmişəm.Bu gün səfərini media olaraq müşayət etdiyim kollektiv, Balakən Uşaq İncəsənət Məktəbidir.Balakən UİM-in kollektivi gözəl kollektivdi və bu gözəllik məktəbin direktoru idarəetmədə müasir düşüncəli,klassik ruhlu,mərd,geniş anlayış sahibi,insan sevən Arifə Tağıyevanın rəhbərliyi sayəsindədir.Mən də qatılıram bu gözəl kollektivə,yolumuz Qarabağadır. Balakən UİM-nin Qarabağ səfəri Azərbaycan Respublikasında 2025-ci ilin “Konstitusiya və Suverenlik İli” elan edilməsi haqqında Azərbaycan Respublikası Prezidentinin Sərəncamı çərçivəsindədir.

Uzun illər işğalda olmuş,10.11.2020-ci il tarixdə isə cəmi 44 günlük müharibəylə ərənlərimizin şücaəti, qəhrəmanlığı sayəsində azad olmuş Qarabağımızı görmək,gəzmək hər kəsin istəyi,arzudur.Qarabağ həm də musiqimizin,mədəniyyətimizin beşiyidir,bir çox dahi sənətkarlarımızın,ustadlarımızın məmləkətidir.İncəsənət,musiqi kollektivinin Qarabağı görmək ikiqat arzusudur.

Səhər saat 07:00-da Balakən UİM-in qarşısından bu arzunu reallığa çevirəcək səfərə,gerçəyə aparan yola düşürük.Günortaya yaxın Ağdama çatırıq.Ağdamın bir tərəfi erməni vandallığının ən son həddi yəni bu günün Xirosiması bir tərəfi isə dövlətimiz tərəfindən inşa edilməkdə olan dünyanın ən gözəl şəhəri olacaq Ağdam.Keçmişindəki bütün tarixi abidələr bərpa olunur, həmçinin Ağdam Cümə Məscidi.Səfərimizin ilk durağı Ağdam Cümə Məscididir.Məscidə daxil olub iki rəkəat namaz qıldıqdan sonra məscidin imamı,Ağdamın axundu Mehmanla söhbət edirik.Mehman savadlı,dostcanlı insandır.Bizə Ağdamın,məscidin,yaxınlıqdakı xaraba görünüşündə olan binaların tarixindən danışdı.Mehmanla söhbətimizin ən maraqlısı Ağdam Cümə Məscidinə dövlətimizin Başçısı İlham Əliyev tərəfindən gətirilib qoyulan o kiçicik daş(şəkildə var) parçasını barədə idi.Belə ki,Ağdam işğal altında olduğu zaman ATƏT-in Minsk qrupunun üzvlərindən biri Heydər Əliyevə görüşlərinin birində kiçik bir daş parçası verir və deyir ki: Bu daşı Ağdam Cümə Məscidindən götürmüşəm,sizə xatirə olaraq verirəm.Heydər Əliyev də daşı götürür və cavabında deyir ki: Bu daş aid olduğu yerə,yerinə qayıdacaq.Və elə də olur.30 ildən sonra həmən daşı Heydər Əliyevin oğlu İlham Əliyev Ağdamı işğaldan azad edərək,orda bərpa etdiyi Ağdam Cümə Məscidində yerinə qoyur.. Daş məsciddə şüşə vitrində xatirə olaraq saxlanılır.
Ağdamda ikinci durağımız Şəhidlər Xiyabanıdır.1-ci Qarabağ müharibəsinin əfsanəvi batalyonu “Balakən Qartalları”nın komandiri Azərbaycanın Milli Qəhrəmanı Allahverdi Bağırovun məzarını ziyarət edərək Şəhidlərimizin ruhundan fatihə oxuduq. Ağdamdan çıxırıq Əsgərana tərəf.Gəlib çatdıq Əsgəran qalasına.Tarixi qalada xatirə şəkillər çəkərək yolumuza davam edirik üzü Xocalıya.Xocalı adı hər nə qədər kürəsəlçilərin erməni-rus icrasında Türkə qarşı ən böyük soyqırımın ünvanı olaraq qalsada,Şərqi Zəngəzur bölgəsinin ən müasir inkişafına sahib rayonun adı kimi,özü də fərqlənəcək. Bu istiqamətdə böyük işlər görülür orda dövlətimiz tərəfindən. Xocalı kiçik bir rayondur,o başında “Xankəndi” tabelası görünür. Və Xankəndinə daxil oluruq.Elə girişdən başlayan mənzərəylə insanda o qədər hisslər, duyğular oyanır ki..Uzun illərin həsrəti,özləmi, yanında vüsalı.Vüqarı,qüruru.Qalib dövlətin qalib vətəndaşı olduğunun duyğusu orda bir ayrı cürə gəlir sənə,dolğun,olğun hiss edirsən. Ayağını Xankəndi torpağına basdığında şər üzərində qələbənin fəxarətini yaşayırsan..
Xankəndində otelimizə yerləşdikdən sonra gec də olsa naharımızı edib biraz dincəlirik.Xankəndinə dəfələrlə səfər etsəm də heç vaxt gecə qalmamışdım.Xankəndinin gecələri bir başqa olurmuş.Gec nahar etdiyimizdən,biraz da dincəldikdən sonra şəhər gəzintimiz axşam çağına təsadüf edir.Otellər,restoranlarla dolu Xankəndində ən müasir tikinti,quruculuq,bərpa işləri gedir.Xankəndinin hal hazırkı görüntüsü işçilər,sahibkarlar,tələbələr və turislərdir.Böyük marketlər şəbəkələri Xankəndini də sarmış,hər küçədə bir şəbəkə marketinə rast gəlinir.Bir çox görməli,gəzməli yerləri dolaşdıqdan sonra yoruluruq. Şəhərin mərkəzində böyük samovarın qaynadığı bir çay ocağında yorğunluğumuzu çıxartmaq,samovar çayı içmək üçün əyləşirik.Gözəl samovar çayını qurtumlaya-qurtumlaya şəhərin mənzərəsindən həzz alır,şirin söhbət edirik.Necə deyərlər çaylar bahənə,söhbət şahanə..
Gecə düşür.Xankəndinin bir yay gecəsində otelimizə doğru addımlayırıq.Bu gecənin sabahı,Qarabağın tacı Şuşaya qalxacağıq. Sakit,sərin gecəli,təmiz və quru havası olan Xankəndində şirin,rahat yuxu yatırıq.Səhər tezdən başlayan inşaat işlərinin,texnikanın səsinə oyanırıq.Buralarda hələ xoruz banlamır.Səhər yeməyimizi yedikdən sonra Xankəndində dünən çata bilmədiyimiz bir yer qalmışdı: Qarabağ Universiteti.
Bu Universitet Qarabağdakı siyasi qələbəmizin təzahürüdür.İstədiyin yeri hərb gücüylə ala bilərsən,bu hərbi qələbədir. Orada məskunlaşdığın zaman isə bu siyasi qələbədir.”Qarabağ Universiteti” Xankəndində məskunlaşma yaradacaq.Universitetin həyətinə daxil oluruq,xatirə şəkillər çəkirik.Mühafizəyə təşəkkür edirik.Onların müşayəti ilə Universitetin içərisi ilə tanış oluruq,yaradılmış şəraiti əyani görürük.Universitet daha da böyüyür.Bu il 1400 tələbə ilə ilk dərs ilini başa vuran təhsil ocağına gələn il daha çox tələbə gələcək.Universitetin yanında əlavə korpusların tikilməkdə olduğunu da gördük.
Burdan ayrılıb gedirik Şuşaya.Şuşaya qalxdıqca aşağıda biraz əvvəl ayrıldığımız Xankəndi görünür,sanki ovcumuzun içindəymiş kimi.
Şuşaya daxil oluruq.İlk dayanacağımız şəhərin girişindəki Şuşa qalasıdır.Səfər iştirakçıları Şuşa qalası ilə tanış olub burda da xatirə şəkillər çəkdirdikdən sonra şəhərə daxil oluruq.”8 Noyabr” küçəsində Şuşa şəhəri Azərbaycan Respublikası Prezidentinin Xüsusi Nümayəndəliyi binasının qarşısında qoyulmuş, cənab Prezidentin səyi nəticəsində ölkəyə qaytarılmış üzərində erməni düşmənçiliyinin,vəhşiliyinin izləri olan Xurşidbanu Natəvanın,Bülbülün,Üzeyir Hacıbəyovun ermənilər tərəfindən güllələnmiş büstlərinin olduğu parkı ziyarət edirik.Yaxınlıqda yerləşən Yuxarı və Aşağı Gövhər Ağa məscidlərinə baş çəkirik.İncəsənət məktəbinin müəllimi, Nəbi müəllimin sevinci yerə göyə sığmır,”Aşağı Gövhər Ağa” məscidinin yanında 15 yaşındaykən,40 il əvvəl gəldiyi sanotoriyanı görür(təbii ki,xarabalıqlarını),xatirələri canlanır gözündə.Xəyalı onu 40 il geriyə aparır və bizə xatırladıqlarını, yerlərini əli ilə göstərərək danışır..

Yuxarı Gövhər ağa məscidinin arxasından dolaşaraq M.P.Vaqifin məqbərəsinə,ordan 30 metr yuxarı Cıdır düzünə qalxırıq.Cıdır düzündə ad günü bu günə təsədüf edən,Balakən UİM-nin bu ilki məzunu Diana balamızı məktəbin direktoru,dərin düşüncəyə malik Arifə müəllimə hədiyyə ilə təbrik etdi.Təbii ki,Diana da Cıdır düzündə qeyd olunan bu doğum gününü unutmayacaq. İlk olaraq hərbi,sonra isə bir çox siyasi,mədəni tədbirlərin məkanı olan Cıdır düzü səfər iştirakçılarının ən yadda qalan xatirələrindən olacaq.Səfərin son dayanaca İsa bulağıdır.Şuşadan Laçın yoluna,ordan da İsa bulağına enirik.İsa bulağının sərin suyu,oranın sakit,yaşıl təbiəti, dadlı hazırlanmış,ləziz nahar yeməyi -hələlik, bu qədər-deyərək həm səfərimizə,həm də yazımıza bir fasilədir.

İnşallah,gələn görüşlərdə görüşmək diləyilə..

0

Bir neçə il əvvəl Axundov küçəsinin sakinləri küçələrinin asfalt örtüyünün xarab olmasından,çala-çuxurların çoxluğundan,gecə işıqlanmasının yoxluğundan şikayətlənmişdilər.Mətbuat olaraq bu məsələni işıqlandırmışdıq.Sonra məsələyə baxıldı,küçə öncə qazılaraq su xətləri yeniləndi.Yenilənən su xətlərinin üzəri bir xeyli müddət örtülməsə də sonradan örtülərək küçənin tamamı asfaltlandı.Çox da qəşənq görünür,indi də.Sakinlər sevindilər hətta mətbuat vasitəsilə əməyi keçənlərə təşəkkür də etdilər.Və gözlədilər gecə işıqlanmasına başlanılsın,tamamlansın,gecələri də “ağ günə” çıxsınlar.Gecə işıqlanmasının quraşdırılması başladı küçənin o başından,H.Əliyev prospekti tərəfdən.Ta gəldilər, Axundov küçəsinin C.Məmmədquluzadə küçəsiylə kəsişməsində sanki qarşılarından “qara pişik” keçdi.O gün,bu gündü,aradan ildən çox vaxt keçir iş dayanıb.Küçənin 40%-i gecə işıqlanması ilə təmin olub şəhərsayağı,qalan 60%-i,küçənin sonuna, S.Vurğun küçəsinə qədər ərazidə yaşayan sakinlər qalıb gecənin əsarətində.Küçənin qalanının sakinləri deyir ki:-Bəs biz adam deyilik?..Küçəmizin qalanı nə vaxt aydınlanacaq?

İstənilən icra edilən vəzifə,fəaliyyət qanunlar əsasında təsis edildiyindən, vəzifənin icrasında və fəaliyyətin gerçəkləşdirilməsində qanunlar pozularsa dövlətin 3-cü təməli yəni məhkəmələr devrəyə girər,nəticədə zədələnən haqq-hüquq varsa onu bərpa etdirər,təqsirkarın cəzalanmasına hökm edər.Bütün icra edilən vəzifə və fəaliyyətlər xalq adına,Heydər Əliyevin məşhur kəlamında -“Xalq dövlət üçün yox,dövlət xalq üçün olmalıdır”-deyildiyi kimi xalqın rifahına olmalıdır.Məhz bu nöqtədə dövlətin 4-cü təməli olan mətbuat devrəyə girər,xalq adına görülən işləri bütün xalqın görməsini,bilməsini sağlar,xalqı tam məlumatlandırmaq üçün araşdırar və xalqın da bir istəyi,tələbi,fikri,sözü varsa onu qarşı tərəfə çatdırar.Mətbuatın rolunu dəqiq anlamaq üçün yenə Heydər Əliyevin mətbuat haqda “Mətbuat xalqla dövlət arasında canlı sinirdir” kəlamını və Azərbaycan Respublikasının Prezidendi İlham Əliyevin Şuşa şəhərində keçirilən II Beynəlxalq Media Forumundakı çıxışında dediyi “Mətbuat bizlərə yön verməli,istiqamətləndirməlidir” cümləsini azacıq dərindən düşünmək yetər ki,özəlliklə müasir Azərbaycan dövlətinin banisinin və onun davamçısının fikri,istəyi üst-üstə düşür,eyni istiqamətdədir.

Bir çox mətbuatı anlamayan,dövlətin 4-cü təməlini bilməzdən gələn vəzifə,fəaliyyət sahibi,xüsusilə məmuriyyət “-Bizim səhifəmiz var”- deyərək özəl sosial şəbəkə səhifəsini KİV ilə bir tuturlar.Onlar unudurlar ki,sənə aid olanla hamıy aid olan eyni şey deyil və KİV-in,mətbuatın bir prinsipi var:Tərəfsiz,qərəzsiz,vicdanlı,obyektiv olmaq.Söhbət özəl səhifələrdən gedəndə bu prinsiplərdən ikisi orda olmur və heç kəs də “öz ayranına tuş” demez.

Artıq gəlinən nöqtə,görünən odur ki,mətbuatla işləyə bilməyən işləyə bilməyəcək,çətin olacaq.